پاکستان کے صوبہ سندھ کی حکومت نے سندھ پولیس اور ڈی جی رینجرز کو آگاہ کیا ہے کہ تین کا لعدم تنظیموں نے صوبے کے تین بڑے شہروں کراچی، حیدرآباد اور سکھر میں بڑیحملوں کا منصوبہ بنایا ہے۔
اس حوالے سے متعلقہ اور مذکورہ حکام کو روانہ کردہ خط کے مطابق ان علیحدگی پسند تنظیموں میں بلوچ ریولیوشنری آرمی(بی آر اے)، بلوچ راجی آجوئی سنگر(براس)اور سندھو دیش ریولیوشنری آرمی (ایس آر اے)شامل ہیں۔ اس مقصد کے لیے مذکورہ تنظیموں نے وابستہ تخریب کاروں میں اسلحہ، گولہ بارود بھی تقسیم کردیا ہے۔
خط میں کہا گیا ہے کہ براہمداغ بگٹی کا سالا شجاع بگٹی کراچی کے ضلع جنوبی میں رہائش پذیر اور کراچی یونیورسٹی میں زیر تعلیم ہے۔ وہ انٹیلی جنس کمانڈر کے طور پر اپنی تنظیم کو تیکنیکی معلومات فراہم کرتا ہے۔وہ جامعہ کراچی کے طلبہ کو اپنی تنظیم میں شامل اور سکھر میں کارروائیوں کا منصوبہ رکھتا ہے جس کے لئے اہداف مقرر کر لئے گئے ہیں۔
اس کے علاوہ خیر پور بیرس کا زاہد چانڈیو جو بی آر اے سے تعلق رکھتا ہے اسے قانون نافذ کرنے والے دفاتر اور سرکاری عمارتوں کو نشانہ بنانے کی ذمہ داری سونپی گئی ہے، تمام قانون نافذ کرنے والے اداروں اور انسداد تخریب کاری کے لیے آپس میں مربوط اور تعاون کے لیے کہا گیا ہے۔
