جنگانی بدّیں بولی | مھم جان گُل

0
236

اے ھبر ءَ تانسریں بلوچ راج سرپد ءُ سھیگ اِنت کہ مئے ماتیں گُلزمین جنگ آماچ اِنت، ءُ ھر نیمگ ءَ ماتیں گُلزمین مارا توار جَنَگ ءَ اِنت کہ بیا اِت لدیگیں لشکر ءَ من ءَ انگراں کُتگ ءُ گس گِس ءَ دُور کُتگ۔
منی لجّ ءُ ننگ ءِ سر ءَ وتی پنجگے سک داتگ اَنت۔ کِشار ءُ مچکِدگ، شھر ءُ بازار مانداشتگ اَنت، اے بنی آدم ءِ دْروشم ءَ رستر اَنت۔ بلکیں ھِچّ بجّارگ نہ بَہ اَنت ءُ منی مُلکی ھم نہ اَنت، منی ھم زُبان اُوں نہ اَنت، اے چو لیڑو ءَ مست ءُ ھِچّ نہ زان اَنت۔۔۔۔۔

ھو! بیا کہ نوں ما جنگ ءَ کپتگ اِیں ءُ جنگ ءِ دْروشم باز اَنت، پمشکا گِلّہ گوں جنگ ءُ دُژمِن ءَ ھچبر کنگ نہ بیت، پرچا کہ اے جنگ ءِ جار ما وت جتگ، وت وش آتک کُتگ پہ باندات ءِ سینگارگ ءَ۔۔۔۔۔

اے ھبر ما چہ راجدپتراں ونتگ کہ جنگ ھر وھد ءَ کہ بیت گُڑا جنگ ءِ دْروشم گوں تباھی ءَ بدل بیت۔ ھر وھد ءَ کہ منی دیم ءَ جنگ ءِ گال کپ اِیت، گُڑا تباھی الم وت ءَ سھرا کنت ءُ منی جان ءِ بند ءُ ریشگاں آس ماندار اِیت ءُ پد ءَ من ءَ گْوش اِیت کہ تباھی اِنت جنگ، بلے کس پہ وش ءُ وشدلی ھچبر اے تباھی ءَ وتی ھمگام نہ کنت ءُ اے تباھی ءِ تہ ءَ وت ءَ، ءُ وتئی کھول، راج ءُ زمین ءَ ھچبر چگل نہ دنت، پرچا کہ آ زانت کہ تباھی گار ءُ گُمسار کنت، بلے برے برے مردُم لاچار کنگ بیت کہ آ وت تباھی ءِ جمبوریں آس ءِ تہ ءَ وت ءَ، وتی کھول، راج ءُ زمین ءَ چگل بہ دنت، پرچا کہ بیدے جنگ ءَ دِگہ ھِچّ راہ ءُ در پشت نہ کپ اِیت۔ اگاں انگت راجے اے جنگ ءَ مہ زیر اِیت ءُ وتی ڈُبّہ ءُ زِمہ واری مہ لیک اِیت، گُڑا نہ مرچیگ پشت کپ اِیت نا کہ باندات مان اِیت۔۔۔۔۔۔۔

پمشکا راجدپتر مارا گْوش اِیت کہ راجاں پہ وتی ابدمانیں زندگی ءَ جنگ ءِ بُنیاد ءَ اِیر کِتگ ءُ جنگ ءِ جار پِرّینتگ داں ما دائِمی زندگ بِہ مان اِیں، چی ءَ کہ جنگ ترا چہ گاری ءَ رکّینیت۔ اَنچوش کہ بلوچ ءِ جنگ اِنت، اگاں اے جنگ مہ بیت اِیں گُڑا من پہ سِتک گْوش آں مرچی ما بلوچ نہ منتگ اِت اِیں، اے جنگ اِنت کہ مارا زندگ بُوَگ ءِ ھاٹیگ ءَ دَیَگ ءَ اِنت۔
اگاں نا مرچی زُوراک ءَ پہ زُورانسری بلوچ ءِ آکبت وتی جِند ءِ سرڈگار ءِ سر ءَ دیری گار ءُ گُمسار کُتگ۔ اے ھمے جنگ ءِ برورد اِنت کہ مرچی بلوچ پہ شانے وت ءَ بلوچے لیک اِیت ءُ پھر بند اِیت کہ من بلوچ ءِ گْوانزگ ءَ بلوچی لیلواں گوں بلوچ سرڈگار ءِ سر ءَ ودی بوتگ ءُ رُستگ آں۔
اے جنگ روچ پہ روچ گوں وتی تْرندیں گاماں دیم ءَ جُنزان ءُ مُھکم بُوھان اِنت داں گُلامیں بلوچ راج وتی آجوئیں سرڈگار ءِ دامُن ءَ رُژنائئں بانداتے ءِ واھُند بِہ بیت، ءُ جنگ داں آجوئی ءِ سُھردپیں بام ءِ دْرپشگ ءَ برجاہ مان اِیت۔۔۔۔۔۔۔۔

***

LEAVE A REPLY

Please enter your comment!
Please enter your name here