کمبر جان (رپیک) یک ھستی یے – زیشان منان

نزاناں بلاھیں وھدے گوستگ من ءَ کدی اے مارشت نیتکگ منی گوں کمبر جان ءَ یات بندوک انت یا من ءَ آئی سر ءَ چیزے نبشتہ کنگی انت،اے پیم نہ انت کہ من ءَ کمبر جان کدی یات نیتکگ من دلءَ مدام جیڑ اِتگ کہ آ زندانی انت ءُ زندان چوناھا ازابے بلے پہ کمبر جان ءِ وڑیں مردمے ءَ کہ آ ساری ءَ چہ نادراہ انت کہ یک چمے تیوگ ءَ شتگ ءُ دومی چم ءَ چہ ھم کم گند ایت بلے اے ھیال ءَ من ءَ اچانک گور جت کہ منی گوں کمبر جان ءَ لھتیں ساھت ھست کہ من آ ساھتاں ، من آ بندوکیں یاتاں درشان بہ کن آں،زمانگ وھد ءُ دور چیکس تیز بہ بنت، بیت کنت اے یک (نفسیاتی) تبی راستی یے کہ انسان ءِ زھنی یا ھیالی ردوم کار ءَ وتی پیم ءَ دیم ءَ روان کنت آ کسی مرزی ءَ نہ بیت بلکیں وتی ءَ کنت کہ ائی ءَ را کدی کجا ءُ کجام یاتانی ھند ءُ دمکاں روگی انت ، کجا اوشتگی انت ، پہ چیکس وھد ءَ یا کجام ھیال ءَ کدی آیگی انت ،کدی نہ آیگی انت؟ اے درستیں گوں زھنی یا (نفسیاتی) تبی ردوم ءَ گوں کاینت ءُ رو اَنت ۔

2015 ءَ ساری من واجہ کمبر نزانتگ نہ کہ نام اشکتگ اگاں اشکتگ ھم من ءَ یات نہ بیت کمبر نامی ئیں من باز مردم زاناں بلے دو کمبر کہ آواں گوں منی نزیکی ھست آواں چہ یکےکمبر( رپیک) کہ 15 گْوبشان( نومبر) 2017ءَ چہ بیگواہ انت ءُ یکے شھید کمبر (اشرپ)کہ 30 بھاران (جنوری) 2016ءَ منان جان گوں ھوار مستونگ کلی دتوا شھید کنگ بوت ۔

اے 2015 ات من اوالی رندا کمبر( رپیک جان ءِ نام اشکت واجہ کمبر ،وھدے کہ واجہ کسیرا مردم گش انت زھن ءَ اولی اکس یک پیرین مردمے اکس جوڑ بیت کہ آ پیریں یا ھما اُمر ءَ رس اِتگ کہ پیری ءِ نزیک ءَ انت ھیر رند ءَ بازیں مردم من دیستگ کہ آیاں مھلوک ءَ واجہ گُشتگ بلے پیر نہ بوتگ اَنت پمیشکا واجہ گشتگ اش کہ آوانی کار ءُ زمہ واری ھمے وڑیں بوتگ اَنت ،بازیں اے پنام ءِ ھکدار بوتگ اَنت ءُ بازیں جاگہ گوں اے پنام ءَ نہ انساپی ھم بوتگ بلے واجہ کمبر جان پہ اے پنام ءَ ءُ اے پنام پہ کمبر جان ءَ جوڑ ات اے پنام اے جاگہ ءَ سد در سد برابر ات کہ آ راستی ءَ یک واجھے اَت ،من کمبر جان دیست آ یک پیٹیں، نہ سک لاگر نہ سک زنڈ ءُ چمانی واستا چشمکے چم ءَ ٹیشو پیپرے دست ءَ کہ وار وار ءَ چم ئِے ساپ کرت، انچوش لگ اِت کہ یک مردمے باز کتاب ونتگ کہ چمے ھراب بوتگ اَنت، کمبر جان ءِ نندگ پاد آیگ گپ کنگ ءِ تہ ءَ یک سنگینّی ءُ گرانی یے مان ات،پد ءَ من چیکس وار کمبر جان دیستگ اے ھم یاد نہ بیت بلے آ وھداں منی گوں کمبر جان ءَ ھچ وڑیں سنگتی ءُ نزیکی نیست ات وھد گوزاں بوت اَنت کہ مئے زند ءِ گرانیں روچ پہ من سر بوت کہ بابا منان جان شھید کنگ بوتگ ،آہ اے ٹپّ کہ انگت تاجگ انت ھر روچ جتا جائیں دروشماں بیت۔ لھتیں روچ گوستاں من ءَ سنگتے ءَ کلوہ کرت پلاں جاگہ ءَ بیا کمبر جان ترا گندگ لوٹ ایت من شتاں واجہ کمبر جان ھمود ءَ ات پاد اھت منی دیم ءَ ،نشت ھمے دیوان بوت مزاک ءُ مسکرا ،زند ءِ جنجال بگر ءُ بدارانی سر ءَ ءُ مزاک مزاک ءَ من ءَ کمبر جان ءَ گشت دل ءَ مکن من ترا ساری ءَ گندگ ءَ ترس اتگ آں کسے ءَ تئی سوج چہ دور ءَ من ءَ داتگ من وتی راہ چمداں بدل کرتگ ھا ھا ھا ھا بلے منی ھیال تئی بابت ءَ رد بوتگ ھمے ھند ءَ باز دیر ما دیوان کرت بازیں سرھالانی سر ءَ گپ کرت چو یاد نہ بیت کجام کجام انت رند ءَ من واتر بوتاں وتی جاگہ برے برے پون ءَ گوں کمبر جان ھال بوان بوت ۔۔۔
کمبر جان یک انسانے ات کہ ھر کس ءَ شرپ دات ئِے ءُ چہ وت کستریناں ھم شرپ ،ازت،مھر دلاسا،تسلہ بکشات ئِے ، کمبر جان شکسے نہ ات بلکیں ھستی یے ات کہ آئی ھستی یک پھناتے نہ ات بلکیں بازیں تک ءُ پھنات اِت اَنت کہ آیانی تہ ءَ مھر بہ بیت،سرپدی بہ بیت، سادگ مزاجی،سنگتی ،اِلم دوستی،راج دوستی اے دروستیں پھنات ھست ات اَنت کدی کہ کمبر جان گوں ھوال بوتگ یک مھروانیں ساھگے بوگ ءِ مارشت داتگ ئِے کدی کہ دیستگ ھنچوش گمان بوتگ پہ ساھتے ھمے مار اِتگ کہ مئے نیمروچیں زندانی سر ءَ یک سارتیں ساھگے اوشتوک انت آ بہ بھائیں مھر ءِ دروشم ءَ بہ بیت یا آئی تسلہ ،آئی سنگتی ، جیڑھانی سر ءَ گپ ءُ ھبر آواں گوں اِلم ءُ زانت ءِ بنیاد ءَ ھل کنگ، اے کُلانی سوج مدام کمبر جان ءَ مارا داتگ کدی کہ گند ءُ نندے بوتگ۔۔۔

دومی رند ءَ سنگو اھتگگ منی نیمگءَ من ءَ گُشت ئِے کہ واجہ ءِ نیمگ ءَ چکرے جن ایں شپ ءِ وھد ات ما در آھت ایں اود ءَ سر بوت اِیں کمبر جان ات گوں وتی مھر ،تسلہ،بچکندگ ءُ گپ ءُ دیواناں نشت ،بلو ،شاہ جان ھم ھمود ءَ ات اَنت مزاک ءُ مسکرا بوت واجہ ءَ من ءَ،شاہ جان ءُ بلو را سرومگ کرت ءُ ھم اکس ھم کش اِت ئِے پد ءَ دیوان بوت بلوچ راج،بلوچستان ،بلوچ جھد ،وانگ ءُ زانگ درستیں سرھالانی سر ءَ گپ بوت ءُ درستاں وتی ھیالانی درشان کرت ،من اد ءَ یک گپے اے مار اِت کہ کمبر جان سک وانوک ءُ پٹ ءُ پول کنوکیں مردمے ءُ دومی اے گپ ءَ کہ دروستیں سنگتاں مھر ،تسلہ دنت آوانی گپ ءُ ھیالانی کدر ءَ ھم کنت بہ گند ئے آ اُمر ءَ سک کسان انت یا کمو مستر انت درستانی گپاں گوش دار ایت ءُ آوانی مارشتانی کدر ءَ کنت۔بلاھیں گپ ایش انت کمبر جان باز پٹ ءُ پول کنوکیں مردمے ،باز کتاب وانوکیں مردمے بلے مارا اے گپے کدی اھساس ھم نداتگ ئِے کہ من اے چیز پٹ ءُ پول کرتگ یا آ چیز ونتگ یا من چہ شما امر ءُ تجربہ ءَ مستر آں،راستی ءَ من دیستگ بازیں مردم کہ آ وتی الم ءُ زانت ءِ بیم ءَ را نشان داینت کسے کہ گپے بہ کنت ڈارک کتاب ءِ بابت ءَ زور ایت ءُ دومی ءَ را ملامت کنگ ءِ جھد ءَ کنت وتی زانت ءُ پھم ءَ چہ مردماں ترسین اِیت ھنچو کہ زالمے چہ وتی توپک ءَ مردماں ترسین ایت آ چہ وتی سرپدیاں یا وتی امر ءِ مستری ءَ کہ دومی ءَ ملامت کنت آئی سر ءَ گپے بئیت گڑا وتی امر ءِ سلاہ ءَ کارمرز کنت اگاں کتابے ءِ سلاہ مہ بیت کہ من اے جاگہ ءَ آں۔ منی نزیک ءَ شرپ درستانی انت آ کسان انت یا مزن، تو وت ءَ وت گوں سنگتاں ،مردماں ھما پیم کن ئے ترا گوں ھما وڑیں شرپ ،تبے دیگ بیت ،وتی expression

ءِ ھک باید انت درستاں بہ بیت آ چوناھیں گپ بہ بنت،شرپ بہ بیت، نبشتہ ءِ دروشم ءَ بہ بنت یا ساچستے اے ھک دروستاں ھست وتی ھدّ ءَ سک

repression

ءِ تھ ءَ مہ روت۔

من چہ اود ءَ در آھتاں وتی جاگہ ءَ آھتاں،کم کمءَ زند ءِ جاور ءُ ھال ھم مٹ بوت اَنت وھد ءِ رپتار دارگ نہ بیت روچ ھپتگ بنت ،ھپتگ ماہ،ماہ سال جوڑ بنت ءُ انسان برے گوں وھد ءِ رپتار ءَ گوں کپ اِیت ءُ برے پشت کپ اِیت ،منی گوں کمبر جان پون ءَ ھوال بواں بوتگ بلے یاد نہ کنت کدی چیکس بر ءَ ،پد ءَ یک برے من کمبر جان گوں اچانکی جاگھے ءَ ڈیک وارت من ءَ باز گُشت ئِے ، وانگ ءِ ،سنگتانی ،ھالتانی، پھریزے، اے کسانیں گندگے ات چے ءَ کہ کمبر جان ءِ وڑیں انسانے را راھگوزی گندگ ءَ دل ءِ اوپار نہ روت کہ جتائیں گپ ءُ سرھال انت آوانی سر ءَ دیوان ،مزاک ءُ مسکرا ،بلوچ ،بلوچستان ، بلوچ راجی جھد اے وڑیں سرھالاں پہ گیش ءُ گیوارئیں وھد لوٹ اِیت۔۔۔۔۔

دگہ برے من ءَ کمبر جان کلوہ کرتگ اَت بیا پلاں جاگہ من شوتاں اود ءَ نشتاں من کتابے وانگ ءَ اتاں ھمیشی سوج کرت ئِے من ءَ کہ آ کتاب

hypnotism

یا

hypnoanalysis

ءِ( تحلیلِ نفسی اردو ءَ)سر ءَ اَت، کہ انسان ءَ را یک انچیں شری (کیفیتے

trance

ئے تہ ءَ براں اود ءَ آئی بے زانتی چیکس جیڑگ ھست اَنت آواں گوں گپ ءَ الاج کن انت ،راج دپتر ءِ تھ ءَ باز رند ءَ مردمان ءَ hypnotize

ءِ وسیلہ پٹ ءُ لوٹ کنگ بوتگ کہ

general anesthesia

ءِ جاگہ کار گرگ بوتگ۔۔۔

hypnotism

ءِ زریہ ءَ بازیں تبی جیڑگ ،کسے ددّے کہ گپ کنگے جیٖڑگ ھست ئِے، مردمانی دیم ءَ گپ کرت نہ کنت ،مچیانی تھ ءَ گپ کنگ ءَ ترس ایت ،اے

hypnosis

ءِ جتائیں

therapy

یانی تہ ءَ اھت کن اَنت چوش کہ
C.B.T (cognitive- behavioral therapy) and methods like c.b.t
ھمے درستانی زریہ ابید چہ درمان ءَ یا درمان انی ھواری ءَ الاج بنت۔ گڑا من ءَ کمبر جان ءَ گُشت ھمے کتاب ءَ پہ من ھم راہ بہ دے پد ءَ۔ھند اِت ئِے ما چونیں سرھالانی سر ءَ گپ ءَ ایں من گشت چے کناں گلامیں چاگردانی تہ ءَ مردم چہ اے وڑیں جیڑھاں گوز انت مئے اے دیوان چمداں ھلاس بوت ۔۔۔
دگہ برے من ءَ کلوہ ئِے کرت بیا پلاں جاگہ ءَ اود ءَ شوتاں دیوان،چاہ، مزاک بوت اے رند ءَ

north koreaءِ kim dynastyءِ سر ءَ بابت ءَ گپے کرت کہ kim II-sung پدا kim jong-il پد ءَ kim jong- un ءِ north korea ءِ سر ءَ بلاھیں اسرے ھست ءُ north koreaءِ جند ءِ تیوگیں دنیا ءِ سر ءَ کہ آئی بازیں گیر انسانی ،گیر ھیوانی سلاہ جوڑ کرتگ آیانی اسر تیوگیں دنیا ءِ سر ءَ کپت کنت ۔۔۔۔

اے گوں کمبر جان ءَ منی گڈی دیوان اَت 2017ءَ 15 گْوبشان ءِ شپ ءِ گوربام ءَ سنگت ءَ گُشت کہ ازت ،ھسام، چراگ،کمبر جان چست کنگ بوتگ اَنت۔ وھد گوزاں بوت آئی ءِ ھمراھی ءَ درست برتگیں بندی ئیں سنگت چہ زندان ءَ آجو بوت اَنت بلے کمبر جان انگت بیگواہ اِنت ۔