عالمی ادارہ صحت کے سربراہ ڈاکٹر ٹیڈروس ایڈہانوم نے اپنے ادارے کے کام کا دفاع کرتے ہوئے کورونا وائرس پر سیاست کو ختم کرنے پر زور دیا ہے۔
ڈاکٹر ٹیڈروس ایڈہانوم نے امریکی صدر کے بیان کی تردید کرتے ہوئے زور دیا کہ ’ہم ہر قوم سے قریب ہیں، ہم کلر بلائنڈ ہیں۔‘
واضح رہے کہ امریکی صدر نے کہا ہے کہ وہ ڈبلیو ایچ او کو دی جانے والی امداد ختم کرنے پر غور کریں گے۔ ڈونلڈ ٹرمپ چین میں کورونا وائرس کے حوالے سے عالمی ادارہ صحت کی کارکردگی پر تنقید بھی کرتے آئے ہیں۔
امریکی صدر ڈونلڈ ٹرمپ نے دعویٰ کیا ہے کہ عالمی ادارہ صحت نے کورونا وائرس کی وبا کو ’غلط‘ انداز میں دیکھا ہے۔
انھوں نے کہا کہ عالمی ادارہ صحت کو ’اپنی ترجیحات درست کرنا ہوں گی۔‘ انھوں نے مزید کہا کہ امریکہ اس بات کا تعین کرنے کے لیے کہ اس ایجنسی کو فنڈ جاری رکھا جائے یا نہیں ’ایک مطالعہ، تفتیش‘ کرنے جا رہا ہے۔
ڈونلڈ ٹرمپ نے کہا: ’ہر ایک کے ساتھ مناسب سلوک ہونا چاہیے اور لگتا ہے کہ ایسا نہیں ہو رہا۔‘
انھوں نے یہ بھی کہا کہ امریکہ مستقبل میں مستقل طور پر زیادہ وینٹی لیٹرز تیار کرے گا۔