دو ھزار یازدہ یا دوزدہ اَت، پہ دلجمی گْوشت نہ کن آں، بلے پارٹی ءِ کماش واجہ ھلیل بلوچ ( پیشیگیں چیئرمین خلیل بلوچ ) ماں آواران ءَ پارٹی ءِ کارانی رِد ءَ تر ءُ تابے ءَ اتکگ اَت، اے منی اولی رند اَت کہ سنگت سِراج جان ءِ ھمراھی ءَ سر ماں ھمّلیں اکبر ءِ پُلگونگیں ھنکین شے کُنری ءَ کپت۔۔۔۔۔۔۔۔۔۔۔
وھدے منی چمّاناں ھمّلیں اکبر ءِ دوار پُلگونگیں ھنکین شے کُنری ءِ زیارت نسیب بوت، تہ ءَ دِل ءَ اے ھیال چِست بوت کہ بلوچستان ءِ کُجام میتگ ءَ کہ سر کپ اِیت گْوش ئے ابرم ءِ زیبائی گوں ھمے بُندر ءِ بالاد ءَ پیوند کنگ بوتگ۔ کوہ ءُ کوچّگ ءِ مْیان ءَ چیدگیں ھنکین ابرم ءِ رنگانی ھما اِزم Art اَت کہ اِزمکار Artist اے زیبائیں نِدارگ ءِ وت یک کارِستے اَت۔۔۔۔۔۔۔۔۔۔
بلے! مرچی ابدمانیں اکبر ءِ داتگیں دیمونی ءَ ابرم ءِ اے زیبائی دِگہ گوناپے بکش اِتگ۔ ھمُک دیم ءَ کہ کسے چمّاں شانک دنت ءُ چار اِیت، آئی چمّاں ھمّلیں اکبر ءِ مزاریں دْروشم سھرا بیت کہ دیمونی ءِ برورد، مُلّ ءُ مُزّ ماتیں مرزبُوم ءِ آجوئی اِنت، ءُ آجوئی ءِ ھاتِر ءَ ما گوں دُژمِن ءَ دیم پہ دیم ءَ جنگ داتگ ءُ سرانی سوگات بکش اِتگ دانکہ باندا ما وتی گْوستانک ءِ تاکاں درونتے جوڑ بِہ بَہ اِیں ءُ بلوچ راج ءَ ھمے سرپدی بِہ دے اِیں کہ راجانی زِندگ بُوَگ ءِ مانزمان راجی جُھد ءُ گھگیری اِنت، مرچی کُجام راج کہ چہ جُھد ءُ گھگیری ءِ ساچانیں ساھگ ءَ دُور بوتگ اَنت گُڑا نہ منتگ اَنت۔۔۔۔۔۔۔۔۔۔۔۔۔
چی ءَ کہ گْوستانک وت ءَ وت کدی نبشتہ نہ کنت، بلکیں پہ گْوستانک ءِ تاکانی نبیسّگ ءَ دیمونی دَیَگ ھژدری اِنت۔ ما مرچی کہ اے دِگہ آجوئیں راجانی درور ءَ دے اِیں کہ آیاں وتی ایردستیں راج ءُ گُلامیں سرڈگار چہ بدّیں جورانی دست ءَ موک اِتگ ءُ آجو کُتگ، گُڑا مارا آیانی پُژدر ءَ ھمے گِندگ کَیت کہ آیاں پہ وتی ڈیھ ءِ ریزانی بوجگ ءَ دیمونی داتگ ءُ نوں اے پدیانک ءَ سر بوتگ اَنت کہ آجوئی ءِ کَوش پہ مُوازے کشّ اِیت۔۔۔۔۔۔۔۔۔۔،
اگاں ما لوٹ اِیں کہ مئے ماتیں گُلزمین چہ درآمدانی دست ءَ آجو ءُ ما آئی وتواجہ ءُ واھُند بِہ بَہ اِیں، گُڑا مارا چو اکبر ءُ آئی لکّی ئیں سنگتانی داب ءَ، اے زِندانی ءُ ندْر بوتگیں سرانی داب ءَ دیمونی دَیَگ ءِ دِیدانک برجاہ دارگی اِنت۔۔۔۔۔۔۔۔۔۔۔۔، چی ءَ کہ دیمونیانی مُزّ آجوئی اِنت۔۔۔۔۔۔۔۔۔۔
چوش کہ من اے جُھد ءِ کسانیں پند ءَ ھزار گونگیں سنگتاں گوں دُچار کپتگ آں، بلے ھمّلیں اکبر ھما سنگت اِنت کہ آئی گوں وتی سر ءِ ندْر کنگ ءَ اے پیشداشت کہ راجی آجوئی ءِ چونیں ارزشتے، ءُ اے ارزِشت ءِ کدر ءُ شرپ ءَ ھما بالاد زانت کہ آ پہ ھر وڑیں دیمونی ءِ دَیَگ ءَ چک ءُ پد نہ بیت۔۔۔۔۔۔۔۔۔۔۔، ھمّل جان ءَ مارا اے پیشداشت کہ آجوئی ءِ مُلّ ءُ ارزِشت چی اِنت۔۔۔۔۔۔۔۔۔۔
مرچی من گوں وتی نِزوریں ند ءَ کوہ بالادیں ھمّل جان ءِ سر ءَ چے کہ نبشتہ بِہ کن آں کم اِنت۔۔۔۔۔۔، آئی داتگیں دیمونی ءَ ابید مھروانی ءِ داستان چو پچیں کِتابے ءَ منی دیم ءَ ایر اِنت پہ وانگ ءَ۔۔۔۔۔۔۔۔۔۔۔
چوناھا من وت بِہ گِندئے اے ھبر ءِ منّوگِر آں کہ چہ نمیرانی ءَ پد مارا سنگتانی مھر ءُ مھروانی، سنگتی ءِ پُرکیپیں نیاد، جُھد ءُ جپا دیم ءَ کا اَنت۔۔۔۔۔۔۔، بلے چوں کن آں کہ اے یاتانی نبیسّگ ھم منی رودپتر ءِ تاکانی شم ءَ وامے کہ نبیسّگی اَنت۔۔۔۔۔۔۔۔۔۔۔۔،
اگاں من اے یاتانی کماھگ ءِ نِزوریں جُھدے نہ کُت گُڑا وت ءَ آ سنگت ءِ مھر ءُ مھروانی، جُھد ءُ جپا، داتگیں دیمونی ءِ دیم ءَ گُناھکارے سرپد بَہ آں۔۔۔۔۔۔۔۔۔۔۔
پمشکا اے چاریں لبزانی کماھگ ءَ وتی پرز سرپد بَہ آں، ءُ اے ھبر ءَ من شرّ زاناں کہ منی اے چاریں لبز آئی داتگیں دیمونی، جُھد ءُ جپا، مھر ءُ مھروانی ءِ دیم ءَ تُشے ھم نہ بَہ اَنت، بلے بے باوریں دِل الم ساکم بیت کہ من وتی سنگتی ءِ پرز ءِ پیلو کنگ ءِ کسانیں جُھد ءُ کُوشستے کُت۔۔۔۔۔۔۔۔۔۔۔
مرچی بِہ گِندئے من دِل ءَ ھمے بِہ جیڑ آں کہ ھمّل چہ مئے نیادانی مجلِس ءَ دُور رپتگ دُروگے۔۔۔۔۔۔۔۔۔۔۔۔۔، چی ءَ کہ پہ شیشاریں مکسدے ءَ ندْریگ بوتگیں سر کدی نہ مِر اَنت، بلکیں آ دوبر تیجار بَہ اَنت ءُ راجی جُنز ءِ دیم ءَ برّگ ءِ واستا پد ءَ واتر کا اَنت۔۔۔۔۔۔۔۔۔۔۔۔۔۔
پمشکا من ءَ نبشتانک ءِ گُڈّی ءَ مھروان ءُ پِدائیگیں سلمان ھمّل ءِ اے شئیر گیر آھِگ ءَ اِنت
ھاک ءِ وشبو ءَ ھواریں پد ءَ واتر کا اِیں
جنگ ءِ کِسّھاں کاریں پد ءَ واتر کا اِیں
شور ءِ دِلبند گْواہ اِنت ما وتی سر داتاں
آس پہ دُژمِن ءَ گْواریں پد ءَ واتر کا اِیں
ما مُریدیں ءُ زمین پمّا گْوشے چو ھانی
اِشک ءَ انچو ما کُماریں پد ءَ واتر کا اِیں
ھر کُجا سبز باں آشوب ءِ گُلابیں گْواڑگ
رِتکگیں ھون ءِ بھاریں پد ءَ واتر کا اِیں
جی پہ آشوب ءِ یلیں بچّاں سراں بکشا اَنت
دوست ءُ ھمراھاں مزاریں پد ءَ واتر کا اِیں