روچ دِیگر ءِ شند ءَ اِیر کپتگ اَت ءُ من ھیالانی آتراپ ءَ جیڑگ ءَ اِت آں کہ سنگتے چہ گِس ءَ درکپت ءُ منی کِرّ ءَ اتک ءُ درّائینت ئے۔۔۔۔۔۔۔ھاں سنگت! ھال کن تھنا نِشتگ ءُ چے جیڑگ ءَ ئے۔۔۔۔۔۔۔؟
من سر سُرینت ءُ گْوشت: ھو! تھنائی ءِ چاڑیں ھیال مارا برے پھناتے کشّ اَنت۔۔۔۔۔۔۔، بلے دِل اِنت کہ پہ وتی سھڑینگ ءَ ھزار ماسگ بند اِیت ءُ بوجیت، داں آجوئی ءِ رُژن سرّیچیں جلشک سھرا مہ بیت مئے ماسگانی سر کدی راست نہ بیت۔۔۔۔۔۔۔۔۔
گوں منی اے گپّانی اِشکنک ءَ پد پہ اجکّھی سنگت ءَ گْوانکو دست ءَ اَت ءُ پہ ناگتی آھے چہ زُبان ءَ درکپت۔۔۔۔۔۔۔۔۔۔۔۔۔، من کہ سنگت ءِ دْروشم دیست تہ ھمے پھم اِت کہ گْوانکو ءَ الم ناوشیں ھالے شِنگ اِتگ۔۔۔۔۔۔۔۔۔۔۔۔۔، من انچو پہ بے سمائی جُست کُت کہ ھاں سنگت! ھیر اِنت۔۔۔۔۔۔۔۔۔؟
سنگت ءَ پسّو نہ دات ءُ پہ اجکّھی اُوشتوک اَت ءُ گْوانکو ءَ چارگ ءَ اَت۔۔۔۔۔۔۔۔۔۔۔۔، من انچو پہ ھلاھُوشی پاد اتکاں ءُ سنگت ءِ گْوانکو چار اِت داں شش ھون میچلیں اکس اَنت۔۔۔۔۔۔۔۔۔۔، چہ ھمے ھون میچلیں اکساں یکّے ساجد پنّام سمیر ، زھور پنّام بالی ، اکبر پنّام ھمّل ، سابِر کادِر پنّام تاھِیر اَت۔۔۔۔۔۔۔۔۔۔۔۔۔۔۔۔۔۔، آ دگہ دوئیں ورناھاں من جاہ آرگ ءَ نہ اِت آں۔۔۔۔۔۔۔۔۔۔۔۔۔۔،بلے باور بُوَگ ءَ نہ اَت کہ اے ساجد ءُ بالی، ھمّل ءُ تاھِیر اَنت۔۔۔۔۔۔۔۔۔۔
وھدے اے ھون میچلیں اکس کہ منی چمّانی دیم ءَ پِر گْوست اَنت، دِل ءِ جیڑگانی سر سِست ءُ ھیالانی مَھری رھت ءُ دیم پہ گُلیں کولواہ ءِ آپریچ ءَ رھادگ بوت۔ سارتیں کَوش ءِ چِڑکّہ پْرشتگ اَت ءُ دِھکان گوں ڈگاراں مُلمہ، شِپانک گوں رمگانی چارینگ ءَ۔۔۔۔۔۔۔۔۔۔۔۔۔۔۔، ھمُک دیم ءَ کہ چم شانک دات اَنت راجی جنگولاں سنگر گپِتگ اَت اَنت ءُ لدیگ ءُ بشوشگانی ھُولّگ ءُ توار اَت۔۔۔۔۔۔۔۔۔۔۔۔۔۔۔۔۔۔،بلے اُستاد جنگیان ءِ بھشت گوناپیں ھنکین ءُ گُلیں گندچاھی پہ ساجد ءِ تُنّاپیں ودار ءَ بانور اَت۔ مِھلب ءُ مِسکانی آتار ءَ تیوگیں گیدی جکسینتگ اَت ءُ ھرکس پہ سالونک ءِ ودار ءَ ودارِیگ اَت، بلے بانوریں گندچاھی ءِ دِل گیش ودارِیگ بوت۔۔۔۔۔۔۔۔۔۔
ھیالانی مَھری وھدے دیمتِر ءَ جُنز اِت، گُڑا ھمّلیں اکبر ءِ شے کُنری گوں وتی نگوریں بالاد ءَ پہ شاتے ھالو، چاپ ءُ نازینک جَنَگ ءَ اَت کہ منی تنگوئیں بچّ پہ ھزار مُراد پمّن واتر ءُ منی شاگیں گْوانزگ ءِ چنڈّینگ ءُ کرار بکشیں لیلوھانی اُوماناں زُرتگ ءُ پیداک اِنت۔ پمّنی نگوریں بالاد ءِ سمبھینگ ءَ وتی زاپِرانیں ھون منی شار ءِ دامُن ءَ شلینتگ اَنت ءُ گْوستانک ءِ تاکاں اے نبیسّ اِتگ کہ ما مُرت کُت۔۔۔۔۔، بلے زُوراک ءِ بیھار ءُ پادتراپ، ادارُکی لبّ ءُ متاھانی دیم ءَ سر باروٹی ءُ درآمدیں واجہ ءُ کاسگ چٹّیں میرانی دیم ءَ جھل نہ کُت، بلکیں اے درونت پہ آیوکیں پدریچ ءِ سوھو ءُ شیوار کنگ ءِ واستا چو دْرپشوکیں کندیل ءَ تھار دیمگیں شپ ءِ کُنٹ ءَ دْرپش اِیت ءُ منی ایردستیں راج ءَ آجوئی ءِ پنت ءَ دنت، بلے انگت ودارِیگ اِنت۔۔۔۔۔۔۔۔۔۔۔۔۔۔۔۔۔۔۔۔
دمے ءِ بالا کنگ ءَ پد ھیالانی مھری ءَ دیم دات پہ رزا جھانگیر ءِ چندنیں مرزبُوم ءَ کہ الگریں بالی ءِ آھگ ءِ ودار ءَ تیرتیج ءَ وت ءَ پہ دابے سِینگارتگ اَت، ھمُک دیم ءَ پُلگُدیں کاڑانی آشوبی سوت ءُ نازینک، ماتانی سِکین ءُ دِلبڈّی، ورناھانی تلاریں توکل ءُ ھاٹیگ دُژمِن ءِ چمّانی کُنٹگ اَت۔۔۔۔۔۔۔۔۔۔۔۔۔۔۔۔
ءُ بالی ءِ ھون میچل ءُ چو گْواڑگ ءَ سْرپتگیں بالاد بچکندگ ءَ اَت کہ من رزا جھانگیر ءُ بابا گْوھرام ءِ رند پداں وت ءَ کولیگ کُت، بلے چو لگوریں بیلانی داب ءَ سر جھل نہ کُت ءُ تیرتیج ءِ دمکاں نیاتک آں، چی ءَ کہ من گوں ماتیں گُلزمین ءَ ھور گُلیں تیرتیج ءِ دمکاں اے اھد کُتگ اَت کہ من کایاں۔۔۔۔۔۔۔۔بلے پہ شان ءُ مڑاہ۔۔۔۔۔۔۔۔۔۔۔
بلکیں سر ءَ لگوری ءِ پاگ ءَ نہ بنداں ءُ واتر نہ بَہ آں، چی ءَ کہ منی کِرّ ءَ رزا جان ءُ بابا گْوھرام ءِ مِسکیں ھونانی، کامریڈ اسد ءُ اے دِگہ مات ءِ تنگوئیں بچّانی ھونانی مُلّ آجوئی اِنت، ءُ آجوئی ءِ موکگ ءَ من ھم وتی سر ءِ بائینگ ءَ ھِچّ رنگ ءَ چک ءُ پد نہ بَہ آں۔۔۔۔۔۔۔۔۔۔۔، گوں ھمے پِگر ءُ لیکہ ءَ بالی ءَ گُلزمین ءِ وام گوں وتی مھلبیں ھوناں ادا کُت اَنت۔۔۔۔۔۔۔۔۔
چہ بالی ءِ دوار ءَ ساھتے ءِ جلّگ ءَ پد ھیالانی مَھری ءَ سارتیں آھے کشّ اِت ءُ دیم پہ تاھِیر جان ءِ گیڑ بالاد ءُ بھشت چھرگیں بُندر گُڑوپ ءِ پاند ءَ جمّاز بوت۔ وھدے کہ گُڑوپ ءِ رُنگراھاں پند بُرّان ءُ گیڑیں گُڑوپ ءَ سر بوت آں، تہ گِنداں زیارت ءِ سر ءَ چوگان ءُ پہ آیوکیں مردُمانی وش آتک ءَ سُھریں بیرکے کھیر ءِ سر ءَ گوں گْوات ءِ شیکّـگاں چنڈّگ ءَ اِنت، اول من اجکّا بوت آں کہ اے سُھریں بیرک پرچا مِکّ اِنت۔۔۔۔۔۔۔۔۔۔۔، گُڑا چہ بازیں جیڑگ ءَ پد من چہ کماشے ءَ پول کُت کہ اے سُھریں بیرک شُما پرچا مِکّ کُتگ۔۔۔۔۔۔۔۔۔۔۔؟؟
کماش ءَ پہ بے تواری من ءَ چار اِت ءُ گْوشت: بچّ! اے بیرک شھید تاھِیر جان ءِ مات ءُ پِت ءَ گوں وتی دستاں مِکّ کُتگ، ایشی ءِ مُول ءُ مُراد ھمیش اِنت کہ ھر آیوکیں مردُم چہ اے ھبر ءَ آشنا، سوھو ءُ شیوار بِہ بیت کہ اے دْراجیں پند ءِ آسر کنوک سالونکیں سرانی دیمونی اَنت۔۔۔، ءُ دیمونی ءِ چیدگ ءُ نِشان ھمے سُھریں بیرک اِنت، بلے انگت ودار ءِ سِیمسراں۔۔۔۔۔۔۔۔۔۔۔۔۔۔۔
من کہ کماش ءِ پسّو اِشکُت، تہ ھیالانی مَھری ءَ سر تاب دات ءُ گْوست ءِ پُتینک ءَ پیشکانڈگ ءَ مُلمہ بوت۔۔۔، دو ھزار سینزدہ ءِ سارتیں شپ گوں سنگتاں گیر اتک۔۔۔، کہ آ سنگتانی تہ ءَ سنگت لکمیر ھم ھوار اَت، بلے کماش ءِ سُھریں بیرک ءِ سِپت کنگ ءَ من ءَ دیمونی ءِ داستان سرپد کُت ءُ ھمے ڈس اِت کہ اے ھمے راجدوستی ءِ لیکہ اِنت کہ ماتانی تاسُپیں بچّ پہ سرانی کولیگ کنگ ءَ سرگِردار نہ بَہ اَنت ءُ پہ کندگ کندگ مرگ ءَ گْوانک جن اَنت کہ بیا ما ترا امباز کن اِیں دانکہ آیوکیں پدریچ چہ اے ھبر ءَ سھیگ ءُ سرپد، زانتکار ءُ آشنا بِہ بیت کہ من کُجام ولّ ءِ برّاں۔۔۔۔۔۔۔۔۔۔۔
ھمے راجدوستی ءِ لیکہ اِنت مردُم ءَ سوھو کنت کہ زمین ءِ تپتگیں ھاک ءِ رنگ ءُ بوہ۔۔۔۔۔۔۔۔۔۔۔۔۔۔، زیبائی ءِ جلشک چہ ھُدا ءِ
ھزاری ئیں بھشت ءَ دیماتِر۔۔۔۔۔۔۔۔۔۔۔۔۔۔۔۔۔۔۔، چی ءَ کہ اے تپتگیں ھاک ءِ اندر ءَ مئے ( بلوچ ءِ) ارواہ ءِ زیمر کلّ اِنت۔۔۔۔۔۔۔۔۔۔۔۔، اگاں اے تپتگیں ھاک مہ بیت، گُڑا ما ھم نہ بَہ اِیں، گُڑا گھتر ھمیش اِنت کہ چہ ھاک ءِ نہ بُوَگ ءَ پیسر ما مہ بَہ اِیں ءُ مئے سر ءَ راجدپتر ءِ تاکدیماں تژن ءُ پیگور، کُچلّیں شِگانے نبیسّگ مہ بیت، بلکیں ھمے نبشتگ بِہ بیت کہ ما پہ مرگ باج بُرتگ بلے سرجھلی پہ وت شات نہ کُتگ۔۔۔۔۔۔۔۔۔۔
گُڑا من پہ جزم گْوش آں کہ اے دابیں سرانی دیم ءَ اُوشتگ ءُ میلانک بُوَگ ریاست پاکستان نہ، بلکیں گیدی ءِ ھِچّ تاکت ءِ وس ءُ واک نہ اِنت۔۔۔۔۔۔۔۔۔۔۔۔
ءُ بلوچ گْوستانک اے شیدا ءُ آسبالُوئیں سراں پہ مُجّتی گیر کار اِیت کہ آیاں وتی زِرد ءِ ھزاری ئیں ارمان ءُ لکّی ئیں واھگاں ابید ملکموت دیم پہ دیم ءَ بیھار داتگ ءُ مرگ پہ بچکند امباز اِتگ۔
چوش کہ اے یک گْوستانکی راستی یے اگاں تو چہ مرگ ءَ پد پہ مُجّتی ابدمان بُوَگ لوٹ ئے،گُڑا وت ءَ چہ زِند ءِ ھمُک وشیاں در گوں دِیدانک ءُ مکسدے ءَ ھمگرنچ بِہ کن،چی ءَ کہ تئی رَوَگ ءَ پد تئی لیکہ تئی ھستمان ءِ مانزمان اِنت۔۔۔۔۔۔۔
جزماں! اے شپ سھار ءِ دامُن ءَ وتی کوار ءَ بوج اِیت ءُ دِل ءِ آزگیں ارماناں ساٹ اِیت۔۔۔۔، شھیدانی دیستگیں واب، زندانی ئیں پُسّگانی درد ءُ دوراں زُبانے رس اِیت ءُ آجوئی ءِ گْوانک ڈیھ ءِ ھر چاریں کُنڈاں چو بام ءِ اِستال ءَ دْرپش دنت، گُڑا من پہ سِدک گْوش آں کہ دیمونی راجانی ھستمان ءِ مانزمان، ابید ء دیمونی ءَ ما وت ءَ ابدمانیں زند ءِ ھونکّیں مِنزل ءَ ھِچّ رنگ ءَ سر کُرت نہ کن اِیں۔۔۔۔
