اے ورناھاں!
سوگند تھار ماھیں شپاں دْرپشوکیں اِستالانی کہ چہ تھاری ءِ دِلبند ءَ رُژنے شھم اِیت ءُ سرجمیں جھان ءَ چم بکشائیت۔
سُھبانی لھمیں کوش کہ شُمارا زندگی ءِ سکین ءَ دنت۔
اے ورناھاں!
سوگند ھما جان کُشیں ساھتانی کہ شُمئے ماتاں درد ء زہ کش اِتگ ءُ شمارا زند بکشاتگ ، شُمئے پتاں ازابی سگ اِتگ ءُ شُمارا رُودینتگ۔ شُمئے پیریناں پہ وت نام اِشتگ ءُ زندگی کتگ ءُ کاراں اَتکگ انت۔
اے ورناھاں!
سوگند کہ سرڈگار ءِ مھر چہ زندگی ءِ بُنزھاں درکیت ءُ زِندمان ءَ رنگ بکشائیت۔ سوگند گلامی ءِ مارشت ءُ آجوئی ءِ ھیالے، جنز دوئینانی مْیان ءَ چہ زھم ءِ نیزہ ءَ ساپ تر ءُ بارگیں راھے۔ اَچ شُما ھر ھما ورنا، پیریں ءُ چک کہ جنزگ زانت، زندگ بیت۔
اے ورناھاں!
سوگند کہ جنز تھاروکیاں بُرز تر زندگی ءِ مانزمان اِنت، جنز رژنے ءُ رژن آجوئی ءِ چیدگ اِنت۔ تحقیق کہ گُلامی چہ تھاریاں سیاہ تر، بدرنگیاں چِہ بدرنگ تر، بدبوھاں چِہ بدبو تِر، بے نام ءُ بے رنگیں وابے۔ تحقیق کہ ھر ھما زمین زاد چہ واب ءَ بُست کنت، زندگ بیت۔ واب ءَ رنگ ءُ مانایے بکشائیت۔
اے ورناھاں!
سوگند کہ سر ڈگار ءِ مھر چہ ھر مھر ءَ دیماتِر، چہ ھر رُژن ءَ رُژناہ تر، تھاریانی بزیں راھاں درکَیت ءُ چو نوک سوریں کاڑے ءَ سمبھیت، بلے پہ ھماھاں کہ زندگ بُوَگ زان اَنت۔
اے ورناھاں!
سوگند کہ مرگ ءُ زند مدامی ھمراہ اَنت، ءُ زندگی مرگ ءِ سیمسراں اُوشتاتگ۔ چوش کہ مرگ پہ ھرکس ءَ انت، بلے زندگی پہ لھتینان پشت کپ اِیت۔
اے ورناھاں!
شُمئے پیریناں پہ وت نام پش گیتکگ ءُ شرپ اِشتگ، پہ مڑاہ ءُ شانے نمیران بوتگ اَنت۔ شُمئے ھم اُمر گلامی ءِ تند بستگیں سانکلاں گوں سُھریں ھونان بُران اَنت، شُمئے ھم مکتب پہ مدامی ئیں زندگی ءِ ھاتر ءَ وتی واھشتاں موکگ ءُ نمیران بیان اَنت۔ تحقیق کہ زند مرگ ءِ امانت ءُ مرگ زندگی ءِ مانزمان اِنت۔
اے ورناھاں!
سوگند چہ تھاریانی دلبند ءَ رُژن سھرا بیت، سوگند کہ آجوئی زندگی اِنت۔ سوگند کہ سرڈگار اچ شما زندگ بُوَگ ءِ واستیگ اَنت۔
***
