آزمانک
شمال ءَ مان بستگ اَت ءُ گُباراں تانسریں میتگ وتی کوار ءَ کُتگ اَت، چہ گِس ءِ پُرشتگیں دریگ ءُ دروازگ ءَ ھاکشانی اَت۔ من ءَ ھمے جیڑگ جیڑگ ءِ مْیانجی ءَ سگریٹ کشّگ ءِ ھاجت پیڑاھان اَت کہ سَے سال پیسر یلہ داتگ اَت۔ من پاٹ ءِ سر ءَ چار اِت، کباٹ ءِ تھ ءِ کِتاب پِیشّ پیشّ کُت ءُ چار اِتاں، کلنڈیں پیتی ءِ زُلپی پُروشت ءُ وتی کْوھنگ شِنگینتاں، آنایے دست نہ کپت، چی ءَ کہ من لھتیں کلدار ھمد ءَ ڈکّ اِتگ اَت پہ کاردربری ءِ واستا، وائے تپتگیں نسیب کہ ھاجت ءِ اِیرموش کنگ ءَ درد ءِ درمان سُو نہ بوت۔۔۔۔۔۔۔۔۔۔۔۔
من پہ آراپیں ھاجت ءِ ریپینگ ءَ وس کُت، بلے درد ءِ دِیوال ڈُرینگ ءِ بدل ءَ منی جِند ءِ سر ءَ لُمبگ ءَ اَت۔ شمال ءَ تانسریں ھند ءُ دمگ آڈھور کُتگ اَت، بے بُندریں ھیالانی رودپتر ءِ تاک شِنگ ءُ شانگ اِت اَنت۔ من ءُ تھنائی وت ما وت ءَ جیگ پہ جیگ اِت آں کہ گِس ءِ در کسے ءَ ٹُکّ اِت، اول من اجکّا بوت آں ءُ مارِشتانی زیمر ءِ رنگ مٹّ اِت ءُ وسواسے ءَ گْورامباز کُت۔
کمو جیڑگ ءَ پد۔۔۔۔۔۔۔۔۔من چہ کُرشی ءِ سر ءَ پاد اتک آں ءُ شبندیں در بُتک، چاراں لاگر ءُ چنگ بروتیں ورناھے اُوشتاتگ۔ گوں اے لاگر ءُ چنگ بروتیں ورنا ءِ گِندگ ءَ ھور دِل ءِ دِریکگ ودّ اِت اَنت ءُ من وانگ بوت آں۔۔۔۔۔۔۔۔۔۔۔۔۔۔، من وانگ اِت آں کہ لاگریں ورنا ءَ دِرّائینت، بائیان! شالا تو من ءَ پجّا آرگ ءَ نہ ئے۔۔۔۔۔۔۔۔۔۔۔؟، گِس ءَ پُتِر، تو من ءَ الم پجّا کارئے۔
لاگریں ورنا ءِ اے ھبرانی اِشکنگ ءَ ھور منی مجگاں وڑ وڑیں جُست ودی بوت ءُ دِل ءِ دِریکگ ودّان۔۔۔۔۔۔۔۔۔۔۔، چی ءَ کہ من اے ساھت ءَ وتی بالاد ءِ اندر ءَ ھزار گونگیں جیڑہ ءُ جنجالانی دیمپان اِت آں، پمشکا من وت ءَ وت زانگ ءَ اِت آں کہ من کَے آں، ابید چہ لاگریں ورنا ءِ زانگ ءَ۔ بلے! اے ساھت ءَ بے بُندریں ھیالانی دامُن ءَ سگریٹ ءِ ھاجت گیش سرکشّان اَت۔۔۔۔۔۔۔
وھدے من اے ورنا وتی کرُوتکگیں کوٹی ءِ تہ ءَ آؤرت ءُ نادینت، چہ ربیتی جوڑ ءُ سلامتی ءَ پد من جگے آپ آؤرت ءُ ورنا گِلاسے آپ وارینت۔ چہ آپ ءِ وارینگ ءَ پد کسانیں ساھتے ءَ دوئیں نیمگاں بے تواری بوت۔۔۔۔۔۔۔۔۔۔۔۔۔۔، پمشکا من اجکّا ءُ ھیران اِت آں کہ مئے مْیان ءِ رُستگیں بے تواری ءَ کَے توکل کنت ءُ پُروش اِیت۔۔۔۔۔۔۔۔۔
من گوں ھمے جیڑگاں گِر ءُ چیل اِت آں کہ لاگریں ورنا ءَ یکبرے پد ءَ منی نام گِپت ءُ دِرّائینت، ھاں بائیان! شالا تو من ءَ جاہ آرگ ءَ نہ ئے۔۔۔۔۔۔۔۔۔۔۔؟، بلے تئی اُوں گُناہ نہ اِنت کہ من ءَ دیریں مُدّتے بیت من ءُ تو چہ یکّے دومی ءَ سِستگیں۔۔۔۔۔۔، آ وھد ءَ من ءُ تو کہ سِستگیں کالج ءِ نودربر بوتگ اِیں۔۔۔۔۔۔۔۔، اے مْیان ءَ ھپت سال پُرّیں گْوستگ۔
ھاھاھاھاھاھاھا، چی ءَ کہ آ وھد ءَ منی دْروشم ھم اے داب ءَ نہ بوتگ۔۔۔۔۔۔۔۔۔، نوں من ءَ چمّاں دْروہ اِتگ ءُ ریش ءُ مِید ( مُود ) تاک کپتگ اَنت، پمشکا ترا میار پِر نیست بائیان، ترا میار پِر نیست۔۔۔۔۔۔۔۔۔۔۔
من پہ اجکّھی وتی چمّ چِست کُرت اَنت ءُ پہ ورنا ءَ شانک دات اَنت۔۔۔۔۔۔۔۔۔۔۔، چاراں یاداشت ءِ نِزوریں میم ءَ وت ءَ پھک شموشتگ ءُ بے بُندریں ھیالانی گْورکِشک ءَ رُنگراہ ءُ مُجیں ساھگے۔۔۔۔۔۔۔
چہ جیڑگ ءُ ھیال ءِ گْور کنگ ءَ پد۔۔۔، گیرانی درد بکشوکیں پتّر ءَ من ءُ جاڑا، کالج ءِ اے دِگہ نودربر۔۔۔۔۔۔۔۔۔، بیگاہ ءِ سر رِتکگیں ( سرّتکگیں ) پُرکیپیں رنگانی جلواہ جتائیں نِدارگے ساچگ ءَ اَت۔۔۔۔۔۔۔چہ پُشتی نیمگ ءَ نورھان ءِ اشکام بکشیں توار باتِن ءِ ھورک ءُ ھالیگیں دمکاں زیبائیں دردے سَمارگ ءُ نوکیں زھیرے ریسگ ءَ اَت۔۔۔۔۔۔۔
سباھاں زھیر پِربند اِیت شپاں چوں سوز الھان اِیت
کئے اِنت اے نادْراہ اِشک ءِ کئے اِنت کہ اِنچو بیمار اِنت
انچو جاڑا ءَ کند اِت ءُ من گُڑ اِت آں! چہ زُبان ءَ ناگتی در اَتک، بِل یار جاڑا من گوں اُستاد مُنیر ءِ شیئر ءُ نور ءِ اشکام بکشیں توار ءَ دِلگوش آں۔۔۔۔۔۔۔۔۔۔۔۔، چاراں لاگریں ورناہ ءِ کندگ ءُ ٹھکانی دْرد ءَ گیش شلگ بِندات کُت، ءُ من جیڑگانی زِر ءِ جُھلانک ءَ کپت آں۔۔۔۔۔۔۔۔
کسانیں ساھتے ءِ پِرگْوزگ ءَ پد لاگریں ورناہ ءَ دلگوش گْور کُت ءُ گْوشت، بائیان من تئی کالج ءِ ھم تبکّ جاڑا، من ءَ چو اے ھال ءَ بے ریائیں وھد ءِ ھاکم ءَ رسینتگ۔۔۔۔۔۔۔۔، اگاں نا! من چو کسانی ءَ تئی دیم ءَ کماشے نہ بوتگ اِت آں، ھاھاھاھاھاھا۔۔۔۔۔۔
چہ منی زُبان ءَ ناگت ءَ در اتکگیں راستی ءُ جاڑا ءِ ٹھکاں سما ءِ تار ژامبلینت اَنت ءُ من پہ اجکّھی جاڑا ءَ چارگ ءَ اِت آں کہ دِل ءَ نہ مرّینت۔۔۔۔۔۔۔۔۔ءُ من جاڑا امبازاں زُرت ءُ گُلائیش کُت۔ ارسانی شھکور ءَ ھار کُتگ اَت ءُ ھیالانی نوکیں درے بُتکگ اَت۔۔۔۔۔۔۔۔۔۔۔۔۔۔، ءُ من ءُ جاڑا ھمے ھیالانی اندر ءَ بیگواہ بوت اِیں۔۔۔۔۔۔۔۔
***
