من کَے آں، ءُ منی راجی ڈُبّہ چی اِنت۔۔۔۔۔۔؟؟
یک بلوچ زھگے ءِ بِستار ءَ مارا زانگی اِنت کہ ما کَے ایں ءُ مئے راجی ڈُبّہ چی اِنت، اگاں ما زانت ءُ پھم اِت کہ مئے راجی ڈُبّہ ءُ زِمّہ واری چی اِنت ءُ مارا چوں پیلو کنگی اِنت، گُڑا من پہ سِدک گْوش آں کہ دُژمِنیں ریاست مارا داں دیر ءَ ایردست ءُ گُلامی ءِ کبس ءَ بندیگ کُت نہ کنت۔۔۔۔۔۔۔۔۔
مرچی ما گوں اُورتچاری ءَ بِہ چار اِیں کہ اے ورنا چہ وتی بھارمیچیں ورنائی ءَ سرگْوستگ اَنت ءُ پِدائی پرچا کنگ ءَ اَنت، زان ءَ اے چہ گوھریں زِندمان ءَ بیزار اَنت۔۔۔۔۔۔؟؟
نا! بلکیں اِیشاں یک بلوچ زھگے ءِ بِستار ءَ پھم اِتگ کہ ما کَے اِیں ءُ مارا چی کنگی اِنت، اگاں نا جھانی راجدپتر ءَ چوشیں بالادے گِندگ نہ بیت کہ آیاناں لال ءُ مُروارِدیں زِند ءِ پُرلِزّتیں شام ءُ روزرد، ماھِکانیں شپ ءُ ھیر مینتگیں کَوش، گورگیں بام ءُ پُلّ بچکندیں سُھب دوست نہ بوتگ اَنت۔۔۔۔۔۔۔۔۔۔
بلے! آیاں اے کُلیں واھشت ءُ تماھاناں پُشت جتگ ءُ وتی راجی ڈُبّہ ءِ پیلو کنگ زِندگی ءُ زِرد ءِ مستِریں واھگ ءُ ارمان زانتگ، پمشکا مرچی ند پہ آیانی سِپت ءُ ستا، توسیپ ءُ ساڑاھگ ءَ چابُک ءُ ھُدوکی اِنت۔۔۔۔۔۔۔۔۔۔۔
گُڑا۔۔۔۔۔؟؟
نُوں مارا جیڑگ ءَ ھوار وتی راجی زِمہ واری ءُ ڈُبّہ ءِ پیلو کنگ ءَ زِند ءِ ھر گام ءَ ساجو ءُ ساڑی بُوَگی اِنت، چی ءَ کہ باندا راجی گْوستانک ءَ آیوکیں پدریچ کہ وان اِیت، گُڑا اَچ ما اے جُست ءَ الم کنت کہ یک زھگے ءِ بسات ءَ شُمئے کِرد چے بوتگ پہ ایردست ءُ گُلامیں راج ءَ۔۔۔۔۔۔۔۔۔؟
بِہ گْوش! من ءُ تو چے پسّو دئیں آیوکیں پدریچ ءَ کہ ما وتی راجی ڈُبّہ پیلو کُتگ ءُ رپتگ اِیں۔ اے درگت ءَ اگاں من رد مہ بَہ آں ( اگاں رد بوت آں پَھِلی لوٹاں ) ، جاھے ونتگ اَت کہ کسے ءَ نبشتگ اَت ” یک رھگِیرے چہ کبرِستانے ءِ کِرّ ءَ گْوزگ ءَ بیت، تہ گِند اِیت یک زھگے اُوشتاتگ ءُ کبرے ءَ پیشاپ ( مِس ) جَنَگ ءَ اِنت۔ ھمے رھگِیر چہ زھگ ءَ پُرس اِیت کہ اے کبر ءَ ترا زان ءَ چے کُتگ کہ تو بے بلاہ اِیشی ءَ پیشاپ ( مِس ) جَنَگ ءَ ئے۔۔۔۔۔۔۔۔۔؟
ھمے زھگ رھگِیر ءِ پسّو ءَ چو دنت ءُ گْوش اِیت: تو گْوش ئے کہ اے کبر ءَ ترا چے کُتگ تو اِیشی ءَ پیشاپ ( مِس ) جَنَگ ءَ ئے۔۔۔۔۔۔۔۔۔۔۔؟ بلکیں پیشاپ ( مِس ) وتی جاہ ءَ من اِیشی ءَ لانت کن آں۔۔۔۔۔۔۔۔۔
رھگِیر گیش اجکّا بیت ءُ پد ءَ جُست کنت، اے زان ءَ کئی کبر اِنت کہ تو اِیشی ءِ سر ءَ چو آس ءُ اَبروک ئے۔۔۔۔۔؟
زھگ رھگِیر ءِ پسّو ءَ دنت ءُ گْوش اِیت: من کہ اے کبر ءِ سر ءَ چو آس ءُ ابروک آں، اے منی پِت ءِ کبر اِنت۔ اگاں مرچی اِیشی ءَ منی آجوئی ءِ درگت ءَ جُھد بِہ کُت اِیں، مرچی من چو در پہ در نہ بوتگ اِت آں، بلے بژن کہ ھمائی ءِ کارپدانی برورد اِنت کہ من مرچی اے روچانی دیمپان آں۔۔۔۔۔۔۔۔۔
مرچی اے زھگ ءِ داستان پمّا کُلاں زانت سرّیچیں درونتے، انچوش کہ ما چرے درونت ءَ اِلم ءُ زانتے در بِہ بَر اِیں، اگاں نا مئے آکبت باندا ھمے داب ءَ بیت۔ پمشکا مارا مرچی وتی ٹاھواری گِرگی اِنت، چی ءَ کہ مرچیگ ءَ ابید باندات مئے نہ اِنت نیکہ بیت۔۔۔۔۔۔۔۔۔
گُڑا سما کن!
اگاں تو لوٹ ئے کہ منی آکبت تھارونکی ءِ بدل ءَ رُژناہ ءُ واناک بِہ بیت، ترا چہ دُرستاں پیسر وتی راجی ڈُبّہ زانگ ءُ پیلو کنگی اِنت۔ چی ءَ کہ باندا آیوکیں پدریچ پہ تئی ڈسّگ ءُ پُولگ ءَ تئی کِردار ءَ چار اِیت ءُ ترا جاہ کار اِیت، اگاں نا بے کِردیں نام جھان ءَ پش نہ کپ اَنت۔
اگاں ما لوٹ اِیں کہ راج ءِ ھمراھی ءَ ما ھم زِندگ بِہ بَہ اِیں، گُڑا مارا یک انچیں شیشاریں کِردے پیلو کنگی اِنت داں باندا گیدی ءِ دِلبند ءَ چیدگ ءُ نکش بِہ بَہ اِیں۔
اے ھاتر ءَ المی اِنت کہ ما پہ راجی آجوئی ءِ دزگِرگ ءَ دیمونی ءِ دَیَگ ءَ چک ءُ پد مہ بَہ اِیں، چی ءَ کہ پہ زِندگ بُوَگ ءِ ھاتِر ءَ دیمونی اولی پدیانک اِنت، وھدے تو پہ ھر وڑیں دیمونی ءِ دَیَگ ءَ پدکِنِز نہ بَہ ئے، ترا گُڑا دُگنیا ءِ ھِچّ تاکت ءُ زُوراک پہ وتی مِنزل ءِ سر بُوَگ ءَ داشت نہ کنت۔۔۔۔۔۔۔۔
پمشکا من گْوش آں مرچی جھ بجن اِت، باندات ءِ روچ پہ کس ءَ ودار نہ کنت۔ انچوش کہ دُژمِن پہ مئے چُکچینی، نیست ءُ نابود کنگ ءَ در کپتگ، گُڑا ما پرچا پہ آئی ءِ ولگوج کنگ ءَ در نہ کپ اِیں۔۔۔۔۔۔۔۔۔؟؟
اے جُست مارا ھرکس ءَ گوں وت ءَ کنگی اِنت۔۔۔۔۔۔۔۔۔۔۔۔۔۔۔، اگاں اے جُست ءِ پسّو درکپت کہ مارا وتی راجی ڈُبّہ پیلو کنگی اِنت، گُڑا پہ سِتک بِہ زان کہ دُژمِن ءِ بام ءَ جورکاں داتگ۔۔۔۔
پمشکا اے دوئیں دانک پہ راجی جُنز ءِ باسک ءُ رھشُونی کنوکاں ءَ ارزِشت دار اَنت، اگاں کسے چو منی داب ءَ بِہ پھم اِیت۔ ما اگاں مرچی پہ راجی سیت ءُ نپّانی ھاتِر ءَ وتی سر ءُ چِٹّ نہ گِپت ءُ گوں دُگنیا ءَ ھمگام ءُ نوکیں شونداتاں دیم ءَ نیاتک اِیں، گُڑا تِپاکی ءُ یکمُشتی ءِ بدل ءَ ما گیش ودگ ودگ ءُ بیگواہ بَہ اِیں، بِہ گْوش!
اے بیگواہی مارا پہ وت ءَ شات بیت۔۔۔۔۔۔۔؟؟
من سرپد بَہ آں اے ھبر ھِچّ کسے ءِ زُبان ءَ نئیت کہ من ءَ پہ وت گار ءُ بیگواہ بُوَگ شات بیت، گُڑا پرچا۔۔۔۔۔۔؟؟؟
ما چہ وتی ساٹگ ءَ گیش ھما اداراہ ءَ مُھکم نہ کن اِیں کہ آ مئے ھستمان ءِ مانزمان اِنت۔۔۔۔۔۔۔۔۔۔
اے درگت ءَ ھمے جُست ودی بیت کہ مارا ھر یکّے ءَ وتی گْورجیگ گِرگی اِنت ءُ جُست کنگی اِنت کہ من کَے آں، پہ سِتک گْوش آں اے جُست بے پسّو نہ بیت، اگاں ما وتی بُورینگ ءَ ساجو نہ بوت اِیں، گُڑا پہ جزم گْوش آں ما وتی ھواری ءَ راجی جِنز ءَ ھم گوں بلاھیں تاوانے ءَ دُچار کن اِیں، باندا اے تاوان ءِ جُست ءَ مارا آیوکیں پدریچ الم کنت، گُڑا ما آیاں چے پسّو دے اِیں۔۔۔۔۔۔۔؟؟
پہ آیانی پسّو دَیَگ ءَ مئے گْور ءَ ھِچّ رنگیں پسّو نیست، ما بے پسّو بَہ اِیں۔۔۔۔۔
گھتر ھمیش اِنت پہ آیوکیں پدریچ ءِ جُست ءِ پسّو ءَ مارا مرچی جیڑگی اِنت ءُ وتی دگ تچک کنگی اِنت، وتی راجی ڈُبّہ ءُ زِمہ واری زانگی اِنت، اگاں نا گْوستانک مارا ھِچّ رنگ ءَ نہ بکش اِیت۔ اے نُوں گوم ءَ کپتگ کہ مارا پہ وت چے پکار اِنت، شرپداری یا رُزوائی۔۔۔۔۔۔۔۔۔۔۔، پرے ھاتِر ءَ ما دِلجم بِہ بَہ اِیں کہ راجدپتر ءُ آیوکیں پدریچ مارا ھِچّ رنگ ءَ نہ بکش اِیت۔۔۔۔۔۔۔۔
***
