ماتیں گُلزمین چہ درآمد ءُ زُورگِر ءَ پہ وتی رکّینگ ءَ تِلائیں بچّاں وت دَرچِنت رُودینیت۔ ھمے بچّ کہ ورناہ بَہ اَنت، باندا ھمے پہ ماتیں گُلزمین ءِ پھازگ ءَ پِدا بَہ اَنت ءُ راجدپتر ءِ تاکاں ابدمان۔ پرچا کہ ماتیں گُلزمین زانت کہ منی اے ٹھلیں بچّ ابید ء منی امبازاں دِگہ ھِچّ جاہ ءَ تاھِیر ءُ کرار نہ گِر اَنت، ءُ ناکہ آیاں دِگہ کسے چو منی داب ءَ مھر دات کنت، چی ءَ کہ زمین ءَ وتی بچّ سک دوست اَنت۔
چہ ماتیں گُلزمین ءِ ھمے ننگ پھازُوکیں بچّاں یکّے ھاسِل جان اَت، ءُ ھاسِل جان یک ملنگ تب ءُ مھروانیں سنگتے اَت۔ من ءَ یات اِنت کہ من کسان اِت آں، کیچ ءَ ھاسِل جان پہ گل ءِ کارے ءَ مئے لوگ ءَ اتکگ اَت۔ چوناھا من ملنگیں ھاسِل جان پیسر ءَ دیستگ اَت، بلے وھدے من گوں آئی ءَ کہ ڈیک داتگ، گُڑا مُدام کند اِتگ ءُ گْوشتگ ئے کہ مامو تو وانگ ءَ رَوَگ ءَ ئے یا نہ۔۔۔۔۔۔۔؟
من کسانی ءَ وتی منّ ءَ شیتانُکے بیتگ آں، پمشکا ملنگیں ھاسِل جان ءَ من آئی ءِ پسّو ءَ ھمے گْوشت: رواں یا نہ رواں ترا چے کار۔۔۔۔؟ بُرو وتی راہ ءَ گِر، ترا منی کار ءَ گوں کار نیست۔ گُڑا ھاسِل جان ءَ ھمے ساھت ءَ بچکند اِت ءُ گْوشت: منی اُردُلیں برادر وانگ پہ مئے وڑیں گُلامیں راجاں المی اِنت، اگاں ما نہ ونت ءُ وتی کیمتی ئیں وھد زوال کُت، باندا پشیمانی ءَ ابید مارا ھِچ دست نہ کپت۔ اے آجوئی ءِ جُھد ءَ را باندا شُمئے دابیں وانِندگیں ورنایانی درکار بیت، ءُ دومی وانگ پہ ھر بنی آدم ءِ جِند ءَ گنجے۔ پہ کاگدے ءِ وانگ ءُ نبیسّگ ءَ دِگہ کسے ءِ چمدار نہ بیت، منی برادر بِہ وان، وتی وھد ءَ تھنا گوں لیب ءُ گْوازیاں زوال مہ کن، لیب ءُ گْوازی الم بِہ کن، بلے اول وانگ ءُ رند ءَ لیب ءُ گْوازی۔
آ ساھت ءَ من وتی کسانی ءِ موج ءُ ھیالانی واھُند اِت آں، پمشکا ملنگیں ھاسِل جان ءِ گْراں بھائیں گپّانی کدر ءُ بِستار نہ پھم اِت، بلے وھدے کہ مزن ءُ گوں درانڈیھیں زِند ءَ دُچار کپت آں، گُڑا پھم اِت کہ ملنگیں ھاسِل جان ءَ من ءَ پہ وانگ ءِ بارو ءَ راست گْوشتگ، بلے چے کن آں کہ وھد ءُ موسم دائم ءَ ھمراہ نہ بَہ اَنت۔
وھد گْوزان اَت ءُ من ھم مزن بیتگ اِت آں، من ءَ اے ھال ءَ گِپت کہ ھاسِل جان گوں منزور جان ءِ ھمراھی ءَ سِلاھبندیں جُھد ءَ گوں ھمگرنچ اِنت۔ اے مْیان ءَ مزنیں مُدّتے گْوستگ اَت کہ من گوں منزور جان ءُ ملنگیں ھاسِل جان ءَ ڈیک نہ وارتگ اَت۔
وھد ءِ ھمراھی ءَ من گوں وتی کماش ءَ نِندوک اِت آں کہ مارا ھالے رست منزور جان پہ وتن سالونک بوتگ، گُڑا کماش ءَ دِرّائینت اے راہ ھمیش اِنت، بلے لانت پہ ھمایاں کہ چہ اے راہ ءَ پدکِنِز بَہ اَنت ءُ دُژمِن ءِ دیم ءَ سر ءَ جھل کن اَنت۔ ھمے سرجھلی پہ ھِچّ بلوچ ءِ تالہ ءَ نبشتگ مبات، داں بلوچ راج زِندگ اِنت اے سْیاھیں پُولنگ شُودگ ءُ ساپ کنگ نہ بیت۔
من ءَ گیر اِنت یکرندے منی سر گوں کماش ءِ ھمراھی ءَ ملنگیں ھاسِل جان ءِ ھنکین ءَ کپت، وھدے ھاسِل جان ءِ چم پہ من ءَ کپت اَنت، گُڑا پہ کندگ دِرّائینت ئے، ھاں ڑے مامو تو۔۔۔۔۔۔۔۔؟
من گْوشتگ تو شال ءَ وانگ ءَ ئے، بلے مرچی اِد ءَ، تو نہ وان ئے نگھبت ھاھاھاھاھاھاھا۔۔۔۔۔
من ھم پہ کندگ ھاسِل جان ءِ پسّو ءَ گْوشت: مارا اے دُژمِن کُجا وانگ ءَ کِلّیت، اے پہ مئے ھوناں تُنّیگ اِنت۔ پمشکا من وتی وانگ دیم ءَ بُرت کُرت نہ کُتگ، چی ءَ کہ زِندانی بُوَگ ءِ بیمّ ءَ تو وت زان ئے کہ چینچو بیمّناک اِنت ھاھاھاھاھا۔۔۔۔
وھدے من ءُ کماش چہ ملنگیں ھاسِل جان ءِ ھند ءَ درکپتیں ءُ دِگہ دیمے ءَ رپتیں، گُڑا دوبر گوں ھاسِل جان ءَ من ڈیک نہ وارت دانکہ آئی نمیرانی ءَ۔
من گِس ءَ نِندوک اِت آں کہ رسانکدر ءَ ھالے شِنگ اِت ھوشاپ ءِ دمگ ءَ لھتیں راجپھاز دُژمِن ءَ شھید کُرتگ، گُڑا اے ھبر ءِ اِشکنگ پمّن ءَ سک تورناک اَت، چی ءَ کہ ھوشاپ ءِ زِیکّیں ٹپّ تاجگ اَت ءُ نوکیں ٹپّے دوبر تاجگ بوت۔
من گوں ھمے جیڑگاں گُلائیش اِت آں کہ شپ ءِ بام ءَ دات ءُ روچ ءَ ٹِکّ کُت، گوں زِند ءِ کاراں مانگیشّ اِتگ آں کہ رسانکدر ءَ منی چمّانی دیم ءَ ھاسِل جان ءِ اکس کپت ءُ تیراں تیوگیں دیم ءُ جان سُپتگ اَت، اول من ءَ باور نہ بوت کہ اے ھاسِل جان اِنت۔ بلے ساھتے ءَ پد چاراں رسانکدر ءَ ھاسِل جان ءِ نام ھم گوں سنگتاں شِنگ ءُ تالان اِنت، پمشکا من ءَ اے بے باوریں ھبر باور کنگ کپت ءُ چہ دِل ءِ بنداں جتائیں ھیالے ءَ سرکشّان کُت، بلے زُبان گُنگ اَت۔ بس چہ لُنٹاں ھمے ھبر بُتک کہ تو اُوں پہ وتن نمیران بوت ئے۔۔۔۔۔۔۔۔۔۔۔۔۔
