پاکستان کے صوبہ پنجاب کے دارلحکومت لاہور میں لبرٹی چوک پر آج بروز ہفتہ کو بلوچ اسٹوڈنٹس کونسل لاہور کی جانب سے جبری گمشدگی کے شکار طالب علم حفیظ بلوچ کی بازیابی کیلئے پر امن احتجاجی مظاہرہ کیا گیا۔
مظاہرے میں لاپتہ حفیظ بلوچ کی فوری رہائی سمیت پنجاب میں زیر تعلیم بلوچ طلباو طالبات کی ہراسمنٹ بند کرنے کا مطالبہ کیا گیا۔
احتجاجی مظاہرے میں مختلف مکاتب فکر سے تعلق رکھنے والے درجنوں افراد نے شرکت کی۔
واضع رہے کہ لاپتہ طالب علم حفیظ بلوچ کی بازیابی کیلئے اسلام آباد میں نیشنل پریس کلب کے سامنے ایک ہفتے سے احتجاجی کیمپ جاری ہے۔جہاں گذشتہ روز پولیس نے بلوچ طلبا کو شدیدتشدد کانشانہ بنایا اور انسانی حقوق ایکٹیوسٹ اور وکیل ایمان مزاری،محسن داوڑ سمیت بلوچ طلبا کے خلاف بغاوت کا مقدمہ درج کر کے ان کی فوری گرفتاری کے احکامات جاری کئے گئے جسے اسلام آباد ہائیکورٹ کے چیف جسٹس اطہر من اللہ نے روک کر پر امن طلبا پر حملہ کرنے والے ذمہ داران کیخلاف بغاوت کا مقدمہ درج کرنے کے ریمارکس دیئے۔
حفیظ بلوچ کو گذشتہ ماہ خضدار سے حراست بعد لاپتہ کردیا گیا تھا۔حفیظ بلوچ کے دوستوں نے الزام عائد کیا ہے کہ حفیظ کی جبری گمشدگی میں پاکستانی فورسز کی حاضر سروس میجر مرتضیٰ نامی شخص ملوث ہے۔
