سیمی بھر
31 جنوری 2016 ءِ سُبھب ءِ ساھت دَہ اَت کہ منی گْوانکو ءَ ٹِلینگگ کُت، من کہ گْوانکو ءِ رِنگ گِپت ءُ ھبر کنگ بِندات کُت چاراں باگی جان اِنت، من گوں باگی جان ءَ سلام ءُ دْروت ءَ پد پُرس اِت کہ ھالاں دئے چے اھوال نوکیں؟
گُڑا باگی جان ءَ انچو دِرّائینت ءُ گْوشت: ڈاکٹر منّان ساھب ءِ ھالاں دئے گوں تو ھالے بوتگ، من گْوشت ھو! دوشی ساھت نُھ ءَ منی ءُ واجہ ءِ ھال بوتگ، زان ءَ ھیر اِنت۔۔۔۔۔؟
چاراں باگی جان چو گِلّوتگ اِنت، من زانت کہ گوں واجہ ءَ الم بدّ ءُ بیرانی یے بوتگ۔ من دوبر جُست کُت ءُ گْوشت: ھاں باگی جان! ھالاں دئے ھبر ءِ جِند چی اِنت۔۔۔۔۔۔۔۔؟
باگی ءَ پد ءَ پہ گِلّوتگی دِراّئینت کہ واجہ منّان ماں مستونگ کلی دتو ءَ گوں سنگتاں شھید کنگ بوتگ، من کہ وھدے من چہ باگی جان ءِ زُبان ءَ اے ناوشیں ھال اِش کُت، پمّن اے گْرانیں گم ءِ کُوپگ ءَ کنگ سک گْران بوت۔
اے ساھت ءَ من کہ چمّ ھرگْور ءَ شانک دات اَنت، اندوھانی مُجاں زمین ءُ آزمان وتی امبازاں زُرتگ اَت ءُ واجہ منّان گوں وتی زانت سرّیچیں بالاد ءَ سھرا ءُ دیم ءَ میلانک اَت۔ چی ءَ کہ واجہ منّان منی نِگاھاں تھنا بلوچ نیشنل موومنٹ ءِ بُنجاھی مزن کارگشاد ( مرکزی سیکریٹری جنرل ) ءُ گُلامیں بلوچ راج ءِ پُھتوئیں رھشُون نہ اَت، بلکیں دُگنیا ءِ کُلیں ایردستیں راجانی رھشُون اَت، پمشکا تھنا پمّن، پہ بلوچ نیشنل موومنٹ ءَ نہ، بلکیں واجہ منّان ءِ گوں سنگتاں شھیدی پہ بلوچ راج ءَ مزنیں تاوانے اَت۔۔۔۔۔۔۔۔۔۔۔۔
چہ اے ناوشیں ھال ءِ شِنگگ ءَ لھتیں روچ ءَ پد من گوں پارٹی ءِ بُنجاھی لیبر سیکریٹری واجہ چیپ اسلم بلوچ ءُ سنگت سِراج ءِ ھمراھی ءَ دیم پہ واجہ چیئرمین ءِ نیمگ ءَ شُت اِیں۔ چہ پارٹی ءِ بُنجاھی کمیٹّی ءِ دیوان ءَ پد من ءَ ڈُبّہ ءُ زِمہ واری دَیَگ بوت کہ من پارٹی ءِ دیمروئی کارانی درگت ءَ مکران ءِ تر ءُ تاب ءَ شُت آں۔ چہ ھپت ءُ ھشت ماہ ءِ گْوزگ ءَ پد من واتر کولواہ ءَ اتک آں۔
یکروچے من چہ شاپکول ءَ دیم پہ جت ءِ نیمگ ءَ رَوَگ ءَ اِت آں کہ راہ ءَ سِلاہ بندیں پرپٹے ءَ گوں ڈیک وارت، چاراں سنگت ءِ پُشت ءَ دبوکھیں ورنایے ھم سِلاہ بند اِنت۔
من گوں سنگت ءَ سلام ءُ دْروت بوت آں، منی ءُ سنگت ءِ دْروت دنیگا ھلاس نہ اَت چاراں پُشت ءِ ورناہ بِشکُرّگ ءَ اِنت، من زانت کہ اے ورناہ منی آشنایے، دبوکہ اَت پمیشکا من جاہ نیاؤرت۔
چہ سلام ءُ دْروت ءَ پد من ءَ سنگت ءَ پول کُت، ھالاں دے دیریں درا نہ بوتگ ئے، باریں کُجام ھند ءُ دمگاں بوتگ ئے۔۔۔۔۔۔؟
من پہ سنگت ءِ پسّو دَیَگ ءَ چاڑِکّہ بوت آں کہ سنگت ءَ پسّو دے آں، بلے چہ منی پسّو ءَ پیسر پُشت ءِ ورناہ ءَ چِست ءُ چابُک ءَ دِرّائینت، تو کماش مارا سلام ءُ دْروت ءَ نیل ئے، انچو ٹھک دَیَگ ءُ کندگ ءَ لگ اِت ھاھاھاھاھاھا۔۔۔۔
من کہ سنگت ءِ ٹھکّانی توار اِش کُت، چاراں اے وَ زمیر اِنت، من انچو دِرّائینت، ھاں ڑے زمیر تو کدی کوہ گرد ءُ سرمچارے بوتگ ئے۔۔۔۔۔۔؟
چاراں زمیر ءِ کندگانی گِروک گیش پہ شھمگ ءَ چاڑاں بوت، دبوکھے دُور کُت گوں من سلام ءُ دْروت کنگ ءَ لگ اِت۔ من کہ زمیر گوں راجپانیں تُوپکّ ءَ دیست، دِل ءَ گرکے جت ءُ یکرندے پد ءَ مکتب ءُ ڈرائینگ ءِ پیریڈ منی دیم ءَ میلانک بوت۔۔۔۔۔۔۔۔۔۔۔۔۔۔
راہ رواجی گِدارے ءَ پد، من زمیر جان گوں سنگت ءَ رُکست کُت ءُ دیم دات پہ جت ءُ آتراپ ءَ۔ وھد دیم ءَ کِنزان اَت کہ من یکرندے پد ءَ چہ وتی مسکیں میتگ ءَ درکپت آں ءُ پارٹی ءِ دیمروئی کارانی دیم ءَ برّگ ءِ واستا گوں پارٹی ءِ لیبر سیکریٹری واجہ چیپ اسلم بلوچ ءِ ھمراھی ءَ باگیں مکران ءِ تر ءُ تاب ءَ شُت آں۔
وھد گوں تْرندیں گاماں دیم ءَ گام جنان اَت کہ ما چہ مکران ءِ تر ءُ تاب ءَ پد، پد ءَ ماں شھید بابا (مھم جان ) ءِ پِت ءُ پیرُکی ھنکین دشتُک زامُران ءَ اتک اِیں۔ اِد ءَ من کسانیں مُدّتے گْوازینت ءُ پد ءَ دیم پہ دِگہ دیمے ءَ سپر ءَ درکپت آں۔۔۔۔۔۔۔۔۔۔۔۔
روان اِنت۔۔۔
