اولی بھر
روچ اِیرلہ ءَ پد شپ ءَ وتی گُل میھ جتگ اِت اَنت کہ تئی پِدائی ءُ سر ندْر کنگ ءِ ھال من ءَ سر بوت۔ اے ساھت ءَ اِنسِرتگیں جیڑگانی گْواش ءَ ھیالے جھ سرّ اِت ءُ من ءَ ماں مادر ءِ کلات ءُ باگیں کولواہ ڈنڈار ءِ بھشت گوناپیں دمکاں سرے کُت کہ تو ھمود ءَ رُدوم زُرتگ ءُ داں وتی شکر ورنائی ءِ بھاریں نوبت ءَ سر بوتگ ئے۔۔۔۔۔۔۔۔۔۔
مِنجیں کھیرانی سارتیں ساھگ ءُ باٹیں کلیر، گزّ ءُ کَور، کپوتانی کُوکُو ءُ شانتلانی زئیپیں نالگ، کُلّیانی شیزارگ، جُوپاگ ءِ دُن ءُ وشبو، زردُکّ ءُ دْرچکانی رُمب ءُ ریچ، مکتب ءِ گیرانی گْرنچ، زِندمان ءِ اے دِگہ تک ءُ پھناتاں گْوازینتگ ءُ تْراولیں پند گوں تئی شھدیں بچکند ءُ شکّلیں یاتاں وت ءَ آژنا کنان اَت۔۔۔۔۔۔۔۔۔
توئے! من ءُ مکتب ءِ پِرگْوستگیں بارِیگ، بلے گْوست مرچی چو نُوک سوریں کاڑ ءَ سینگار ءُ واناک اَت۔ چہ یاتانی بُتکگیں دریگ ءَ ھر یات وتی پُوشاکاں مٹّ کنان ءُ وتی کِسّو ءِ گْوشگ ءَ چاڑِکّہ اَت۔
من اِسٹاپ روم ءَ نندوک ءُ تو اتکگ ئے، سر مئے ڈرائینگ ءِ پیریڈ اِنت، ما کُلیں نودربر تئی ودار ءَ نِشتگ اِیں، من پہ بچکند سرچنڈینت ءُ گْوشت: شر بُرو من پیداک آں۔
تئی رَوَگ ءَ پد من دیم پہ شُمئے کِلاس ءَ دات ءُ اتک آں، چاراں ڈرائینگ ءِ وانگی ( کِتاب ) پیسر ءَ ٹیبل ءِ سر ءَ اِیر اِنت، گُڑا من گوں بے تِرک ءُ توار ءَ وانگی زُرت ءُ بورڈ ءِ سر ءَ اکس ءِ کشّگ بِندات کُت۔ چہ اکس کشّگ ءَ پد من شُمے کُلیں نودربرانی ڈرائینگ ءِ کاپی دزنِبشت ( دزنِشان/ دستخط ) جت اَنت، من گوں ھمے اِرادگ ءَ کہ رواں آپیس ( آفیس ) ءَ، انچو تو گوں دِگہ نودربرے ءَ چِڑکّہ کُت ءُ گْوشت: سر ٹائم انگت ءَ باز ھست، تو مارا کمیں جُھد ء آجوئی ءِ بابت ءَ سرپدی بِہ دے۔۔۔۔۔۔۔۔۔
تئی ھمے ھبر من ءَ بے کِساس دوست بوت، چی ءَ کہ منی نِزوریں کُوپگاں اے راجی ڈُبّہ اَت کہ من گوں وتی نِزوریں زانت ءُ زانگ ءَ شُمارا راجی جُھد ءُ پہ ڈیھ ءِ پاسپانی ءَ کولیگ بوتگیں سرانی بابت ءَ سرپدی بِہ دے آں دانکہ باندا شُما ھم پہ ایردستیں راج ءُ گُلامیں سرڈگار ءِ موکگ ءَ راجکاری ءُ جنگ ءِ پِڑ ءَ وتی ونڈ ءُ بھر ءَ بِہ دے اِت۔۔۔۔۔
من کہ جُھد ءِ بابت ءَ دنیگا وتی گپّ ھلاس نہ کُتگ اِت اَنت پیریڈ ھلاسی ءِ گنٹی لگ اِت، گُڑا من مجبُور بوت آں کہ وتی گپّاں چہ ھمد ءَ آسر بِہ کن آں دانکہ دومی پیریڈ ءِ واھُند بئیت ءُ وتی ڈُبّہ ءَ پیلو بِہ کنت، بلے تو انگت ءَ گوں من ءَ سر ءُ بُن کُت کہ اے پیریڈ اسلامیات ءِ پیریڈ اِنت، ھاپِز ساھب ءَ ما ٹاھین اِیں، تو وتی گپّاں بجن۔۔۔۔۔۔۔
من ترا تسلّا دات ءُ گْوشت: زمیر جان ( پراز جان ) من چو کُت نہ کن آں کہ دِگر ءِ پیریڈ ءَ ابید موکل ءَ بِہ گِراں، بلے سُھب ءَ کسمت ما شُما الم وتی ھبراں دیم ءَ بَر اِیں۔۔۔۔۔۔۔۔
من گوں ھمے گپّاں چہ شُمئے ششُمی کِلاس ءَ درکپت آں ءُ دیم پہ آپیس ( آفیس) ءَ رھادگ بوت آں۔ دو پیریڈ ءَ پد چُٹّی بوت، ما ھر یکّے دیم پہ گِسانی نیمگ ءَ جُنزان بوت اِیں۔ من گوں آ دِگہ ٹیچرانی ھمراھی ءَ دیم پہ گِسانی نیمگ ءَ جُنزان اِت آں، تو ھم گوں وتی سنگت ءَ مئے پد ءَ پیداک اِت ئے۔
ما وھدے دو راہ ءَ سر بوت اِیں، گُڑا آ دِگہ ٹیچر دیم پہ وتی بُندر ءَ من دیم پہ وتی میتگ ءَ، بلے چاراں تو انگت منی پد ءَ پیداک ئے۔۔۔۔۔۔۔۔
تو وھدے من ءَ رسینت، ترا دِگہ سنگتے ھم ھمراہ اَت، چی ءَ کہ شُما ھرروچ پیادگ چہ وتی میتگ ءَ پہ وانگ ءَ ڈنڈار ءِ وانگجاہ ءَ کا اِت ءُ روئے، اے شُمئے کُلیں نودربرانی مُدامیگیں وڑ ءَ رو ءُ آ ھست اَت، ابید آ نودربراں کہ آیاناں پرپٹ ءُ سواری ھست اَت۔
شُما کہ من ءَ رسینت، ما شُما یکجاھی ءَ دیم ءَ جُنزان اِت اِیں کہ تو انچو درّائینت، سر تو آر ڈی ( آر ڈی: رھمدل پنّام ء آر ڈی کہ مرچاں چہ جُھد ءَ گِسر کپتگ ) ءُ سنگتاں بِہ گْوش من ءَ وتی ( بزاں! بی ایس او آزات ءِ باسک ) باسک زُور اَنت، اول من اجکّا بوت آں کہ تو بی ایس او ءَ نہ ئے، بلے پد ءَ پہ تھمبل گْوشت: شر آر ڈی ءَ گْوش آں ترا وتی سنگت ءُ ھمراہ کن اَنت۔۔۔۔۔۔۔۔۔۔۔
من وھدے وتی گِسانی نزّیک ءَ سر بوت آں، گُڑا ترا گوں سنگت ءَ سلاہ جت کہ بیا اِت گِس ءَ نانے بور اِت ءُ نُوں دیم پہ وتی ھند ءَ بُرو اِت۔ تو پہ بچکندے پسّو ترّینت ءُ گْوشت: سر پاکیں ھاوند ترا سلامت بِہ کنت، ما رو اِیں کہ مارا دیر بیت۔ من ترا باز سلاہ جت، بلے تو پہ آھگ ءَ ساجو نہ اَت ئے، پمشکا من شُمارا موکل کُت ءُ شُما دیم پہ وتی میتگ ءِ پاند ءَ رھادگ بوت ئے ءُ من وتی گِس ءَ۔۔۔۔۔۔۔۔۔
روان اِنت۔۔۔۔۔
