رجانکار : میجر مجید
دپترانی اندر ءَ یک واکیایے کہ بے مٹ ءُ بے دروریں ویلے پجّار ءَ گوں زانگ بیت۔ اے واکیہ چوش اے وڑ اِنت کہ ابید چہ تیرے ءِ آس دیگ ءَ یک ریاستے ءَ وتی وتواجھی ءَ رزاکارانہ دومی ریاست ءِ دست ءَ دات۔ اے وتواجھی ءِ دست ءَ دیگ نوزدھمی کرن ءَ ایران ءِ ریاست ءَ وتی کُلّیں آمدن برتانیا ءِ کمنی یے ءِ ھوالہ کنگ اِنت۔ یک ھمے وڑیں جاورے بیست ءُ یکمی کرن ءَ مئے دیم ءَ زاھر اِنت کہ الّا ءِ بکشاتگیں مُلک پاکستان اسٹیٹ بینک ءِ آئی ایم اپ ءِ دست ءَ رھن کنگ ءِ اھوال اِنت۔ ھژدھمی ءُ نوزدھمی کرن ءَ روس وتی جنوبی بزاں زرباری سیمسرانی مھکم کنگ ءُ دیم ءَ کنزگ ءِ جھد ءَ اَت۔ برتانیا ھندوستان ءِ کش ءُ گْور ءِ الاکھانی ءُ وتی تاکت ءِ زور ءِ گیش کنگ ءِ جھد ءَ اَت۔ چہ اے دوئیں زوراورانی کنز ءُ مانکنزاں یک دومی ءَ گوں دیم پہ دیم کُت۔ چہ اے کش ءُ پش ءَ سنٹرل ایشا ءِ سامراجی سپارتکاری پوجی بیھار کشّیں پٹ ءُ پول چاریگ گری ءِ یک سلسلھے بندات کُت کہ ماں دپتراں ایشا ءِ گریٹ گیم گْوش اَنت۔ ایران ءِ ریاست اے گریٹ گیم ءِ یک لیبجاھے جوڑ بیت۔ گجر سرکار کہ وتی سرکار ءِ کانودی جواز ءِ چیل ءُ گر ءَ اَت گُڑا نگیگیں ماشی (معاشی) جاورانی آماچ اَت۔ آیاں وت ءَ را برتانیا ءَ گوں ھمگرنچ کُت ءُ برتانیا ءِ گْوشگ ءِ پد ءَ ایران ءَ پرانس ءِ سپارتکار چہ ایران ءَ در کُت اَنت۔
بلے چوش کی روس ءِ تاکت وریں پوج ایران ءِ سیمسراں موجود اَت۔ گُڑا گجراں جُھد کُت کہ روس ءِ دلجوئی ءَ بہ کن اَنت۔ اے رد ءَ ایران ءَ روس ءِ لھتیں کمنی پرمنٹ دات اَنت۔ بزاں کار ءُ بار کنگ ءِ اجازت دات۔ ءُ روس ءِ لھتیں بینکاناں ایران ءِ اندر ءَ برانچ بوجگ ءِ موہ دات۔ بلے اے کسانیں امل ھم برتانیا ءَ کابلِ کبول نہ اَت۔ برتانیا ءَ یکشل ءَ ھمے جھدکت کہ کجام ناں کجام وڑے ءَ گجر ءِ واکداراں وتی ایردست ءُ پرمانبردار جوڑ بہ کنت۔ اے رد ءَ آیاں الّمی زانت کہ ایران ءِ اکتسادی (اقتصادی) انان ءَ گوں وت بہ کن اَنت۔ ھمے جھداں گوں برتانیا ءَ پہ وت یک مھکم ءُ پلّامرز ءُ کابل بروسائیں ءُ پرمانبرداریں ھاکمے ناسر دین دست ءَ گپت۔ ناسر دین ءِ کمک ءَ گوں آیاں ایران ءِ بابت ءَ وتی منسب ءُ ارادھاناں سرانجام دات۔ ناسر دین ءِ اے مدت ءُ کمک ءَ ءُ برتانیا ءِ ھزمتکاری ءَ ملکہ وکٹوریا ءَ انگلینڈ ءِ جوانمردی ءِ مستریں منسب یا لکب Order of the Garter بکشات۔ ناسر دین چہ ملک ءِ لس دستور ءَ برتانیا ءِ کمنیاناں انچیں دوستیں رئایت دات کہ آیانی درور دنیاءِ راجدپتر ءَ چد ءُ پیش نہ بیتگ۔ 1890 ءَ آئی ءَ ایران ءِ تمباک ءِ کار ءُ بار سنت (صنعت) سرجم ءَ برتانیا ءِ کمنی ءِ سروک میجر ٹالبوٹ ءَ را بکشات۔ اے منّگ نامہ ءِ ھساب ءَ تمباک ءِ کار ءُ بار بھا ءُ بُرد۔ چہ تمباک ءَ دگہ چیز ءِ جوڑ کنگ ھم ھوار اَت۔ اے یکّیں رئایت نہ اَت کہ ایران ءَ برتانیا ءِ کمپنی یے ءَ داتگ اَت۔ ایران ءِ کسٹم بزاں پُردو ءُ ملک ءِ کُلّیں آمدنی ءِ گر ءُ دار Reuter کمپنی ءِ دست ءَ دات۔ ھمے منّگ نامہ رند تر ءَ Reuter کنسٹرکشن ءِ نام ءَ نامدار بیت۔
اے منّگ نامہ ءِ تہ ءَ ایران ءِ روڈ ءُ دگ ٹیلی گراپ ءُ کارھانہ پیکٹری۔ مڈی شوھاز کنگ ءِ بازیں لس مھلوک ءَ گوں ھمگرنچیں کار ءُ روزگار پنچ سال واست ءَ یک مکرر کُتگیں زرّے ءِ بدل ءَ۔ ءُ ایران ءِ کُل آمدن ءِ 60% بیست سال ءِ واست ءَ دیگ ھم شامل اَت۔ ھندوستان مشرِک وستا ءِ دو دمگاں برتانیا ءِ اے بالادستی ءِ برجاہ داروک لارڈ کرزن اَت۔ لارڈ کرزن چہ گل ءَ بال اَت ءُ آئی ءَ درّائینت کہ منّگ نامہ یک ملکے ءِ مڈّیاں گوں دگہ ملکے ءِ سودا کنگ ءِ اولی درور اِنت۔ ناسر دین ءَ مجّتی لگام دیگ ءُ آئی ءَ روس ءَ دیر دارگ ءِ ھاتر ءَ ھندوستان ءُ برتانیا ءِ واکداراں ایران ءِ اندر ءَ مزن نامیں مُلّا زر ءُ مال کُت اَنت ءُ آیانی رھشونی ھم کت دومی نیمگ ءَ ھمے واکداراں دائم ءَ ایران ءِ ھاکم ءَ را پوجی ارش ءِ ترندیں بیھار دات کہ اگاں ایران ءِ ھاکم چہ برتانیا ءِ ایردستی ءَ آجو بیگ ءِ جھد ءَ بہ کنت یا کہ برتانیا ءِ لوٹاں کبول مہ کنت دومی نیمگ ءَ ھمے باڑھی مُلّایاں پرمات ءُ زر ءُ مال دات کہ ناسر دین ءِ ھلاپ ءَ سیاسی چست ءُ ایر بنا بہ کنت۔ ھالانکہ ایران ءِ ھاکم اے درجہ ءَ نہ اِت اَنت کہ آبازیں سر ءُ تاب بہ کن اَنت۔ یا کہ پہ وت ءَ نوکیں دوزواھے جوڑ بہ کن اَنت۔ پد ءَ ھم آیتُلّایاں تھران ءُ اسپھان ءِ برتانیا ءِ سپردکارانی کمک ءَ گوں ناسر دین ءِ ھلاپ ءَ سیاسی چست ءُ ایرے بندات کُت۔ ءُ لوٹ کُت کہ ایران ءَ جمھوری نزام آرگ بہ بیت۔ سیاسی زانت ءِ راجدپتر ءِ اے ھم یک بے دروریں ویلے کہ اسلامی مُلا جمھوریت ءِ واھوک ءُ آروک بہ بنت۔ جمھوری ترتیب ءِ مُلّایانی ھساب ءَ انچیں املے کہ آ اسلامی کانودانی ھلاپ اِنت۔ ھمے وڑ ءَ ملایاں ناسردین ءِ ھلاپ ءَ جھد بندات کت۔ آزادھیالیں مھلوک ءِ ھلاپ ءَ زانت ءُ بیچارگیں ناسردین ءِ برتانیا ءِ واکدارانی نیمگ ءَ اے کلّیں کم شرپی ءُ بے ازتی ءُ پندلاں چہ پد ءَ ھم مرد برتانیا ءِ وپادار اَت۔ بلے انچو زانگ بیت کہ برتانیا ءِ واکداراں اے پیسلہ کتگ اَت کہ ناسردین بدل کنگ بہ بیت۔
اے پوج گلپ ءِ ریاستانی ھم پانگ پاس بوت ءُ پاکستان ءُ مجاھدین ءُ تالبانانی جوڑ کنوک ءُ ترتیب دیوک جوڑ بیت۔ ایشی ءِ بدل ءَ جمھوری ءُ مھزبیں مگربی ملکاں پاکستان ءِ سر ءَ پوجی ھاکمیت ءِ ھلاپ ءَ ھچ نہ گْوشت ءُ اے ملک ءِ ایر دستیں راج بلوچ ، سندی ءُ پکتونانی سر ءَ ناٹاپاریں زلم ءُ زوراکیانی سر ءَ چم پوشی کُت۔ ایشی ءِ بدل ءَ گلپ ءِ ریاستاں مگرب ءِ گْوشگ ءِ پد ءَ الّا بکشاتگیں ملک ءَ را وڑ وڑیں مالی مدت ءُ کمک کُت کہ اے مدت ءُ کمک ءَ پہ پاکستان ءَ اکتسادی ھالتاں برجاہ دارگ ءِ واست ءَ الّمی ات۔ پرچا کہ اے ملک ءِ مالی ھالت پوجی ھاکم ءُ آئی ءِ اتھادی ءُ سیاسی ءُ مزھبی گروھاں بے ایمانی ءُ رشوت ءُ کرپشن ءِ سوب ءَ جھل ءَ روگ ءَ اَت۔ سویت یونین ءِ پرشت ءُ پروش ءَ پد ھندوستان ءَ گوں مگرب ءِ جنگی ءُ مالی اکتسادی اتھاد جوڑ بوگ ءَ رند پاکستان ءُ مگرب ءِ دوستی ءِ رنگ بدل بیت اَنت۔ نائن الیون ءَ پد تالبان ءِ مدت ءُ کمک کنگ، اوگان ءِ جمھوری ءُ آزاد پگریں نزام ءِ کروجگ ءُ ھمے زیتاں تالبانانی ھوالہ اوگانستان ءِ گرگ پاکستان ءِ ریاست ءِ نیمگ ءَ وتواجھیں ءُ دوستیں یورپی ملکانی بے ازت کنگ ءِ یک کارستے اَت۔ کہ چہ اے امل ءَ اَت۔ چہ ایشاں پیش اسلامی جوھری بمبانی جوڑ کنوک ھم پاکستان ءُ مگربی دوزواھاں ڈاہ زُرت۔ مگرب ءَ اے اسلامی جوھری بمب کُلیں جھان ءِ سلامتی واست ءَ یک ھترھے زانت۔ ءُ گوں چین ءِ توتو پوتو بیگ ءَ ءُ وام ءُ شام ءُ پوجی کمک ءِ بدل ءَ گوادر ءُ کراچی بندرگاھاں چین ءِ ھوالہ کنگ ءَ نزیکی ءَ پہ پاکستان ءِ مگربی واجہ ءُ ھدابنداں تکانسری کارستے اَت۔ اے پشدر ءَ بازیں ٹپّاسکار اے سرپد بنت کہ الا بکشاتگیں ملک ءُ آئی ءِ جوڑ کنوک سک سرپرستانی نیام ءَ جاورھال جوان نہ اَنت۔
بلے آ اے سرپد بنت کہ پاکستان ءِ جوڑ کنوک ءُ سرپرستاں امیت یلہ نہ داتگ۔ ءُ انگت پاکستان ءَ وتی یک ناپرمان ءُ آوارگیں زھگے سرپد بنت۔ بلے دگہ بازیں ٹپاسکارانی گمان ءُ شک ءُ شبہ ءُ بے بروسائی گیش بوتگ اَنت کہ ایشانی نیام ءَ دوستی پیشی وڑ ءَ بیت نہ کنت۔ ٹپاسکارانی ھیال اِنت کہ اے ناپرمانیں ءُ بے بروسائیں زھگ بزاں کہ پاکستان نی کابل کبول نہ اِنت۔ ھمے سوب ءَ مگرب ءِ لوٹ اِنت کہ وتی جوڑ کتگیں ناپرمانیں ریاست ءَ سرجم ءَ وتی دست ءَ بہ گیپت۔ پاکستان ءِ اکتسادی ءُ مالی جاور انچو ھراب اَنت کہ آیاں آ بازیں ھساب ءَ تاوان چنوکیں جاورانی آماچ اَت۔ پہ پاکستان ءَ مستریں جیڑہ کنگال بیگ ءُ وامانی دیم ءَ درنیایگ ءِ جاور اَنت۔ پاکستان ءِ ھاکمیں پوج تکانسر اِنت کہ ملک ءِ سالانہ آمدن کمّ اِنت۔ پاکستان ءِ پوج تکانسر اِنت کہ بید چہ مگرب ءِ چندہ ءُ پوڑیاں پاکستان وتی ٹوھیں پوج ءَ وتی دراھیں پوجی ادارھاں ءُ آئی ءِ تل ماں تلیں مالی سیاسی پائدگاں گوں اے کم آمدنی ئیں ریاستی مڈیاں داشت نہ کنت۔ کنگال بیگ ءِ دارگ ءُ اکتسادی ڈُرگ ءِ دیم ءَ دارگ ءِ ھاتر ءَ پاکستان ءِ پوجی ھاکماں اے پیسلہ کُت کہ پاکستان ءَ وتی اسٹیٹ بینک ءِ واگاں آئی ایم اپ ءِ منّوگر بیت۔ دومی ایش اِنت کہ پاکستان ءِ کُلّیں مالی ءُ اکتسادی جیڑاھانی ماملہ آئی ایم اپ ءِ ھوالہ کنگ بیتگ۔ اے ھساب ءَ مردم ءَ را نوزدھمی کرن ءِ ایران ءِ مالی ماملات ءُ رویٹر ءِ دست دیگ ءَ ترانگ ءَ گیج اَنت۔ بازیں مالی ءُ سیاسی ٹپاسکاراں شک اِنت کہ پاکستان ءِ سماجی ءُ سیاسی ماھول انچیں ترسناکیں املے ھست اِنت کہ آئی ایم اپ ءِ ھوالہ ءَ بیگ ءَ رند ھم پاکستان ءِ اکتسادی سرکشگ ءُ یا تیجار بیگ نا ممکن اِنت۔
اے جاورانی رد ءَ آکرکار آئی ایم اپ ءِ مالی مدت ءُ کمک شرت شروت بدل بنت۔ ءُ سیاسی تپاسکار گمان کن اَنت کہ دیمتر ءَ آئی ایم اپ کمک گوں پاکستان ءِ اسلامی بمبانی مگرب ءِ ھوالہ کنگ ءِ جوڑ دیگ بنت۔ اے ھساب ءَ پاکستان ھندوستان ءِ کجام وڑیں پوجی جمبشے دیم ءَ داشت نہ کنت۔ ٹپاسکاراں گمان اِنت کہ اگاں پاکستان اے جوھری بمبانی دیگ ءَ منوگر مہ بیت گُڑا اے امل ءِ نتیجہ سک دیر رو اَنت۔ اے مزھبی ملک ءِ بزان پاکستان ءِ ھمپُسگ ءَ گوں آسر بیت۔ آیانی گْوشگ اِنت کہ پاکستان ءِ مالی ماملاتاں آئی ایم اپ ءِ ھوالہ کنگ در اسل پاکستان ءِ آسر بزاں ھلاسی ءِ بنگیج اِنت۔ ٹپاسکارانی گوشگ اِنت کہ وھدے کہ آئی ایم اپ وتی واماں وڑے ناں وڑے ءَ دست گیپت۔ گُڑا مگرب پاکستان ءَ دست ءَ بڈ ءَ جنت ءُ ھدا ءِ نام ءَ ویل کنت۔ ءُ پاکستان یک انچیں سیاسی اپراتپری یے ءِ ءُ اکتسادی انتشاری ءِ آماچ بہ بیت کہ اے جنجال ءَ در کپگ گوں پاکستان ءِ دلپروشیں ءُ کم پکار واریں پوج ءِ واست ءَ ناممکن اِنت۔ بلوچ، سندی، پکتون ءُ اے دگہ سرکشیں راجانی زرمبشت ءِ دیم ءَ داشت نہ کنت۔ ءُ اگاں ماملات ھمے وڑ بہ بنت گُڑا پاکستان ءِ ڈُرگ ءُ ھمپسگ دیر نہ کنت۔ پاکستان ءِ ھمپسگ پہ ایر دستیں راجاں ناں کہ ایوک ءَ تْراپے ءُ ھاڑوے بلے پہ آیاں بازیں شریں وھد ھم پیداگ کنت۔ پاکستان ءِ جاوراں پد کوم پرستیں کوتانی واست ءَ آیانی سروکانی رژن ءُ زانت ءِ چکّاسے۔ آ راجانی سروکانی واست ءَ اے جاورانی ٹپاسگ یک بلاھیں پُرستے کہ آ وت ءَ را تیار بہ کن اَنت ءُ پہ ھما وھد ءَ کہ الّا ءِ بکشاتگیں ملک ھمپسگ ءَ رند وت ءَ را جاڑیگ بہ کن اَنت۔
تپاکی آجوئی ءِ مانزمان اِنت
بلوچستان آجو بات
