ریلیز راشد حسین کمیٹی کی جانب سے جاری کیے گئے بیان میں کہا گیا ہے کہ متحدہ عرب امارات اور پاکستان سے جبری طور پر لاپتہ راشد حسین بلوچ کو تاحال منظر عام پر نہیں لایا گیا اور نہ ہی کسی عدالت میں پیش کرکے انصاف کے تقاضے پورے کیے جارہے ہیں۔
بیان میں کہا گیا ہے کہ رواں سال 26 تاریخ کو راشد حسین کے گمشدگی کو تین سال کا طویل عرصہ مکمل ہورہا ہے لیکن راشد حسین تاحال لاپتہ ہے۔ اس حوالے سے گذشتہ تین سال سے راشد حسین کی والدہ اور خاندان کے دیگر افراد مسلسل احتجاج کرتے رہے ہیں جبکہ اس دوران سندھ اور بلوچستان میں عدالتوں میں پٹیشن بھی دائر کیے گئے لیکن اس حوالے سے کوئی پیش رفت دیکھنے میں نہیں آئی ہے۔
بیان میں کہا ہے کہ راشد حسین کی متحدہ عرب امارات سے جبری گمشدگی کو تین سال مکمل ہونے پر اس کی والدہ 25 اور 26 دسمبر کو کراچی پریس کلب کے سامنے علامتی بھوک ہڑتالی کیمپ میں بیٹھے گی جبکہ چھبیس دسمبر کے دن پریس کلب کے سامنے احتجاجی مظاہرہ کیا جائے اور اسی روز سماجی رابطوں کی سائٹ پر بلوچ سوشل میڈیا ایکٹوسٹس کی جانب سے آگاہی مہم چلائی جائے گی۔
ریلیز راشد حسین کمیٹی نے بیان میں تمام مکاتب فکر سے تعلق رکھنے والے افراد مظاہرے اور ٹوئٹر کمپئین میں شرکت کی اپیل کی ہے جبکہ بیان کے توسط سے عالمی و علاقائی انسانی حقوق کی تنظیموں اور سیاسی جماعتوں سے راشد حسین کے بحفاظت بازیابی کیلئے آواز اٹھانے کی گزارش کی گئی ہے۔
