مرد ءَ پہ نامرد ءَ نہ رنجیناں
بانز ءَ پہ بُومّ ءِ رتکگیں چمّاں
مارکس سے مُلّا تک کا سفر بلاھیں دْراجیں پندے بیتگ کہ بلوچ ھمے دراجیں ءُ نہ وشیں پند ءَ بُرّان ءُ جُنزان اِنت۔ داں ھما روچ ءَ بزاں مارچ 1948 ءَ کہ بلوچ ءِ آزادی ءُ وتواجھی ءُ آجوئیں ریاست پہ زور ء شمشیر تُمپ ءُ تاراج کنگ بوتگ۔ ھما روچ ءَ بگر داں روچ ء مرچی بلوچ آجوئی ءِ سپر برجاہ اِنت۔ بلوچ ءِ بُنکّی لوٹ آجوئی اِنت۔ اے لوٹ بدل نہ بیتگ۔ اے دراجیں پند ءَ بازیں جْوانیں سر ءُ بامرد راج پھاز شھید کنگ بیتگ اَنت۔ بازیں ماں تھاریں زنداناں گار ءُ بیگْواہ کنگ بیتگ اَنت۔ بلے چہ آجوئی ءِ جھد ءَ بلوچ پُشت ءَ نہ کنز اِتگ۔ بلوچ ءِ سر ءَ وڑ وڑیں زلم ءُ ناروائی ، تیرگواری ءُ نسل کشی بزاں چُک چینی ءُ بمب گواری ھم بیتگ۔ بلے بلوچ ءَ وتی بُنکی لوٹ آجوئی جھد یلہ نہ داتگ پرچا کہ بلوچ ءِ اسلی دردانی دارو آجوئی اِنت۔ آپ ءُ نل ءُ روزگار شھری ھکوک نہ اِنت بلے اے ھم زانگ لوٹ اِیت کہ آجوئی ءِ ھمراھی ءَ گوں راجانی دگہ بازیں ھک ءُ ھِشتِک ھمگرنچ اِنت۔چوش کہ سماجی انساپ، ساھل ءُ وسائل۔ بلوچ ءِ نیلبومیں زر، بلوچ ءِ دود ءُ ربیدگ، بلوچ ءِ ننگ ءُ ناموس، بلوچ ءِ چادر ءُ چاردیواری، بلوچ وانگ ءُ زانگ، بلوچ ءِ کار ءُ روزگار اے ھم جھد ءِ بھر اَنت۔
ءُ چوش کے ءَ گْوشتگ کہ وھدے کہ آجوئی جھد ءَ کن ئے وتی اندگہ شھری ھک ءُ ھکوکاں سرگْوز؟ انسان ءَ زندگ بیگ ءِ واست ءَ زند ءِ آسراتی ھم لوٹ انت۔ یک جوانیں چاگردے لوٹ اِیت۔ کار ءُ روزگار ، وانگ ءُ زانگ لوٹگ گُناھے نہ اِنت۔ اے دْرچ ءَ راجی رھشون واجہ ڈاکٹر الّا نزر ءَ نزر شانک دات اَنت ءُ وتی راج ءَ را سرپدی دات۔
منی مروچیگیں سرھال گوادر ءِ راجپھاز ءُ زِر پھازانی زھرشانی ءُ نندانک اِنت۔ کہ اے زھرشانی ءِ سرپرستی ءَ مولانہ ھدایت رھمان کنگ ءَ اِنت بلے اے زھرشانی ءَ گیشتر سول سوسائٹی ءُ لس مھلوک اِنت۔ کہ گوں زھرشانی ءَ ھوار اَنت۔ اے مھلوک کہ زھرشانی ءَ ھوار اِنت اے مُلّا ءِ پارٹی ءِ باسک نہ اَنت ناں کہ جمائت اسلامی ھمایتی اَنت۔ ءُ ناں کہ مُلّا ءَ دگہ جزباتی نارھے جتگ۔ ناں کہ وتی پارٹی ءِ بیرک ئِے جتگ۔ اے مُلّا ءِ لوٹ لس مھلوک ءِ لوٹ اَنت۔ ءُ "کول دائم پہ رژنائی ءَ زر اِیت”۔ مھلوک چہ بازیں زلماں تنگ آتکگ۔ مھلوک ھمے زلم ءُ ناروائیانی ھلاپ ءَ زھرشانی کنگ ءَ مُلّا ءَ یک پلیٹ پارمے ھمے درگت ءَ رسینتگ۔ اے کار باید اِنت کہ بلوچ راج دوستاں، پارٹی ءُ گلّاں بہ کُتیں۔ بلے راج دوستاں نہ کُت پرچا کہ راج دوست وت ماں وت جنگ ءُ جیگ پہ جیگ اَنت ءُ وتی اندری اڑ ءُ جنجالاں گیش نہ اَنت۔ وتی شمولیتی پروگراماں دلگوش اَنت۔ وتی اوٹ بینک ءِ گیش کنگ ءَ باج بری اِنت۔ اگاں ھمے نیکیں کار مُلّا ءَ کُتگ ھرابی چے اِنت؟۔ مُلّا ھم بلوچے۔ مُلّا ءَ ھم جھد ءِ ھک ھست۔ مُلّا ھم زر ءِ تیاب ءَ نشتگ۔ مُلّا ءَ ھم زرپھازی ءِ ھک ھست۔
ءُ اگاں راجدپتر ءَ چار ئے بلوچ راجی جنز ءِ اندر ءَ راجی ءُ دینی رھشونانی بلاھیں کردے گندگ ءَ کَیت۔ آ کرد راجدپتر ءِ بھر اِنت ءُ شموشگ نہ بیت۔ مولانا ارز مھمد دیوبندی، مولانا مھمد اُمر دیوبندی، مولانا دین مھمد مینگل، مولانا ابدلھک زامُرانی، مولانا شھید ابدلھالک، مولانا ابدلھمید کوھی ءُ دگہ بازیں دینی رھشوناں راجی جھد ءَ بھر زرتگ ءُ مولانا ارز مھمد ءُ مولانا مھمد اُمر دیوبندی ءَ کلات اسٹیٹ ءَ بازیں وھد ءَ اسٹیٹ بدر کُتگ اَنت بزاں جلاوتن کُتگ اَنت۔ زاناں مُلّایاں ءُ دینی رھشوناں جھد ءِ ھک نیست؟ ما ھمے گندیں کہ لھتیں بے ارزشتیں، پنڈوکیں چانیگ گر مولانا ءِ ھلاپ ءَ، اے زھرشانی ءِ ھلاپ ءَ نبشتہ کنگ ءَ اَنت۔ بے مکسدیں پروپیگنڈہ کن اَنت۔ شُما زان اِت کہ اے کُل سرکاری مردم اَنت؟ بلوچ سرپد بہ بیت کہ سرکار ھم وتی چانیگ گراں بلوچ ءِ ھلاپ ءَ کار گیپت۔ اے ھر دور ءَ بیتگ اَنت۔ شرّیں کارے کہ بیتگ آ کار ءِ ھلاپ ءَ چانیگ پنڈاں وت ءَ را زاھر کُتگ۔ انچوش کہ من پیش ءَ گْوشت بلوچ ءِ بُنکّی لوٹ آجوئی اِنت۔ آ دگہ گپے کہ باز مردم پہ جار ء بادشاھی اے گپ ءَ جت نہ کنت۔ بلے دل ءَ بلوچ ھر پارٹی یے ءَ بہ بیت آئی ءِ لوٹ آجوئی اِنت۔ بازینانی اندر ءَ وتی راجی ھکّانی لوٹ زھرشانی جھد اِنت ءُ بازارانی اندر ءَ وتی راجی ھکانی لوٹ ءُ زھرشانی جھد ءِ بھرے۔ سرمچار ءُ کوہ مرد بازارانی اندر ءَ زھرشانی کُت نہ کنت۔ کوہ مرد ءِ کار ءِ وتی رھبندے۔ مُلّا پازل گْوش اِیت،
میتگاں بینگ وپس اَنت ءُ تاھاپاں کُنیل
سرزھاں پادمال کن اَنت دِنگیں نرمزار
گوادر ءِ زھرشانی بلوچستان ءِ مستریں زھرشانی اِنت۔ ءُ ھاس کر زالبولانی روانک ءُ راج ءِ کرد بے مٹ ءُ بے درور اِنت۔ اے اولی بر اِنت کہ زالبولاں چشیں بلاھیں روانکے کشّ اِتگ۔ ءُ ھمے روانک ءُ زھرشانی استمانی ءُ میاں استمانی رسانکدراں شنگ کتگ ءُ ساڑاتگ۔ ھر کس کوہ ءَ شُت نہ کنت۔ ھر کس ھما جھد ءَ بہ کنت کہ کُت ئِے کنت۔
بلوچ تپاک ءُ یکجاہ بات
بلوچستان آجو بات
