پنجگور کے ایڈیشنل سیشن جج اسد اللہ رئیسانی کوئٹہ سے پنجگور جاتے ہوئے راستے میں پراسرار طور پر لاپتہ ہو گئے ہیں، جس سے عدالتی و انتظامی حلقوں میں شدید تشویش پھیل گئی ہے۔
ذرائع کے مطابق ایڈیشنل سیشن جج اسد اللہ رئیسانی بدھ کی صبح کوئٹہ سے اپنی نجی گاڑی میں گن مین کے ہمراہ پنجگور کے لیے روانہ ہوئے تھے، تاہم وہ اپنی منزل پر نہیں پہنچ سکے۔
موصولہ اطلاعات کے مطابق جج کا اپنے اہل خانہ اور متعلقہ افراد سے آخری بار رابطہ ‘کلغلی’ کے مقام پر ہوا تھا، جس کے بعد ان کا موبائل فون بند ہو گیا اور ان سے تمام تر رابطے منقطع ہو گئے۔
واقعے کے بعد جج اسد اللہ رئیسانی کے اہل خانہ، قانونی برادری اور انتظامی حلقوں میں شدید تشویش پائی جاتی ہے، جبکہ سیکیورٹی اداروں کی جانب سے ان کی تلاش کا کام جاری ہے اور معاملے سے متعلق مزید معلومات کا انتظار کیا جا رہا ہے۔
واضح رہے کہ بلوچستان میں سیکیورٹی اور انتظامی کنٹرول کی ابتر صورتحال کے باعث اہم شاہراہوں پر سرکاری حکام اور انتظامی اہلکاروں کے اغوا اور لاپتہ ہونے کے واقعات میں مسلسل اضافہ دیکھا جا رہا ہے۔
