بلوچستان کے ضلع پنجگور میں نامعلوم مسلح افراد کے حملے میں تین افراد ہلاک ہوگئے جبکہ حملہ آور ایک شخص کو حراست میں لیکر اپنے ہمراہ لے گئے۔
تفصیلات کے مطابق پنجگور کے تحصیل گوارگو میں گذشتہ رات دو بجے کے قریب محلہ جمعدار احمد ہیتک میں ایک درجن کے قریب مسلح افراد نے نغمان نامی شخص کے گھر پر حملہ کردیا۔ حملہ اس وقت کیا گیا تھا جب ایک کمرے میں رحمدل عرف خلیل احمد، محمد صادق، نسیم، یاسر و دیگر افراد موجود تھے۔
علاقائی ذرائع کے مطابق مسلح افراد نے بڑے پیمانے پر چھوٹے بڑے ہتھیاروں کا استعمال کیا جس کے نتیجے میں رحمدل عرف خلیل احمد ولد یار محمد، محمد صادق ولد آدم، نسیم ولد فقیر موقع پر ہلاک ہوگئے جبکہ یاسر ولد فقیر محمد نامی شخص کو مسلح افراد حراست میں لکر اپنے ساتھ لے گئے۔
لیویز ذرائع کے مطابق شدید فائرنگ، آر پی جی و دیگر آتشی ہتھیاروں کے استعمال کی وجہ سے گھر کو آگ بھی لگ گئی جس سے گھر کو بھی نقصان پہنچا ہے۔
