سیمی بھر
منی پُل گونگیں نازینک!
تئی کاگد کہ من ءَ سر بوت ، گوں سر بُوَگ ءَ ھوار من پہ بے تاھِیری کاگد ءِ وانگ بِنا کُت ۔ چہ وانگ ءَ رند من ءَ انچو سما بوت کہ اے کاگد ءِ اندر ءَ تو وتی ھیالانی گوناپ گوں منی مارِشتاں کُتگ ، چی ءَ کہ من پہ ھمے واھگانی موکگ ءِ جنگ ءَ تُوپکّ ماں کُوپگ ءَ دْرتکگ ءُ دیم پہ ھساریں کوھاں داتگ دانکہ منی راج ءِ تلملمیں کاڑانی تلکاریں لُنٹانی زپتیں بچکند وت ءَ بینگے بِہ مُش اَنت ، ھِنّی زِبھریں کاڑانی کلمانٹیں واھگ سیراپ بِہ بَہ اَنت ۔ مات ءُ پِتانی لالیں بچّ ءُ گوھریں جِنکّ شادِھانی سِیمسراں شادان بِہ بَہ اَنت۔ ازگاریں ڈگار ءِ نیزگاریں بلوچ راج وتی سرڈگار ءِ سر ءَ آجوئیں زِندمانے بِہ گْوازینیت ءُ آئی ءِ راجی پجّار ءُ ھستمان پہ مُجّتی بِہ مان اِیت۔
منی پُل گونگیں نازینک!
من نہ رپتگ آں، بلکیں وتی ارواہ گوں تئی ارواہ ءَ پیوند کُتگ ءُ دیم پہ ھشیمیں کوھاں داتگ ، چی ءَ کہ من مار اِتگ تئی دیستگیں واب ءُ بے مُلّیں واھِشت گُلامیں زِند ءَ گوں من سمبرینگ نہ بَہ اَنت دانکہ آجو نہ بوتگ آں ، ءُ اے گُلامی ءِ چکپُروشیں زِند ءَ منی راج ءِ ھر واھگ چو رستر ءَ پِلِکّ اِتگ۔
من مار اِتگ اگاں من تھنا پہ تئی مِسکیں واھگاں بِہ جیڑاں ءُ سُھریں بشانگ ءِ مُراداں بِہ بَہ آں ، گُڑا اے رستریں گُلامی من ءَ منی ادارُکی واھشتانی ھمراھی ءَ پِلِکّ اِیت ءُ پہ ابد بیگواہ کنت ، منی راجی ھستمان ءَ گار ءُ گُمسار کنت ، گُڑا پرچا من ھما کاروان ءِ ھمسپر نہ بَہ آں کہ آ پہ راجی آکبت ءِ سمبھینگ ءَ در کپتگ اَنت ءُ دیم پہ آجوئیں مِنزل ءِ پاند ءَ پند بُرّگ ءَ اَنت۔
منی پُل گونگیں نازینک!
من سرپد آں کہ اے راہ گوں دیمونیاں مِنزل کنت ءُ وتی پند ءَ بُرّ اِیت ، اِد ءَ کسے شھید ءُ کسے زِندان ءِ تھاریں بندی ھانہ ءِ باھوٹ بیت۔ ءُ راج ءِ بازیں پُسّگے ءَ شھیدی ءِ شھدیں کدّہ نوش کُتگ ءُ پہ دائِمی نمیران اَنت ، لھتے چو منی داب ءَ انگت دیم پہ مِنزل ءَ رھادگ اِنت، ءُ لھتے چہ مادنیں راہ ءَ بَرگشتگ۔
منی پُل گونگیں نازینک!
گم مہ کن ، من وت ءَ الم پہ تو سر کن آں دانکہ دُگنیا ترا اے شِگان ءَ مہ جنت کہ نازینک ءِ دِشتار زباد چہ راجی جنگ ءَ لگور بوتگ ءُ دُژمِن ءِ چانٹ ءَ وتی سر پہ سُجدگ ءَ دور داتگ۔
نازینک!
تو سرپدے کہ مئے راجدپتر ءِ تاکدیماں چنّو ءُ باجو ، چہ راجی جنگ ءَ تتکگیں سِپاھی ءَ گوں کُجام نام ءَ یات کن اَنت۔۔۔۔۔۔۔۔۔۔؟ گُڑا تو بِہ گْوش اے گپ من ءَ چتور شات بیت کہ منی نام ءِ ھواری ءَ تئی نام ھم ھراب گِرگ بِہ بیت ۔ چوش کہ مرگ پہ ھر سھدار ءَ المی اِنت ، بلے راجدْروہ ءُ لگوری ءِ مرگ اِسپیتیں گُد ءِ سر ءَ ھما سْیاھیں پُولِنگ ءِ درور اِنت کہ کدی ساپ نہ بیت۔
منی پُل گونگیں نازینک!
تئی مھر چکاریں کاگد کہ من ونت ، کاگد ءِ لبز لبز ءَ منی زِرد ءِ ڈگار ءَ انچو لھم لھم ءَ شنز اِت چو کہ بھارگاہ ، ءُ ھر لبز لبز ءِ اندر ءَ جتائیں تام ءُ لِزّتے مان اَت ، جتائیں کِسّہ ءُ کارِستے ھمگرنچ اَت کہ منی ایردستیں راج ءِ لھڑیں پاھار ءُ آزمان جکسّیں چیھالانی درشانی ءَ کنگ ءَ اَت۔
پمیشکا مرچی من گوں ترا اے اھد کن آں! وھدے کہ پہ ترا پہ مُرادے واتر بِہ بَہ آں ، گُڑا تئی مھر سرّیچیں کاگد ءَ دوبر ترا سوگات کن آں ءُ زِرد ءِ ڈکّ اِتگیں رازانی رودپتر ءَ بوجاں کہ پہ تو ، پہ ماتیں گُلزمین ءُ آیوکیں پدریچ ءِ دْرپشوکیں آکبت ءَ منی چِراگیں دِل ءَ کُجام واھگ ءُ واھشت سینگارتگ اَنت ، ءُ اُمیت کن آں کہ تو داں منی آھگ ءَ ودار کن ئے۔
تئی وتی یاگی ئیں زباد
