افغانستان کی صورتحال کے باعث پاک افغان سرحدی علاقوں کے غیر معروف راستوں سے محدود پیمانے پر افغان باشندوں کی آمد کا سلسلہ جاری ہے لیکن بلوچستان حکام کاکہنا ہے کہ ابھی صوبے میں افغان پناہ گزین کی آمد نہیں ہوئی ہے اور نہ ہی اس حوالے سے صوبے میں کوئی کیمپ بنایا گیا ہے دوسری جانب محکمہ صحت نے افغان پناہ گزین کی متوقع آمد کے پیش نظر کنٹی جنسی پلان مرتب کرلیا۔
افغانستان کے غیر یقینی حالات کے پیش نظر وہاں کے مختلف علاقوں سے افغان باشندے بلوچستان میں مقیم اپنے رشتہ داروں کے پاس نقل مکانی کررہے ہیں یہ افراد کوئٹہ،قلعہ عبداللہ اور چاغی کے علاقوں میں آرہے ہیں اس سلسلے میں کمشنر افغان ریفیوجیز بلوچستان مسعود احمد خان کا کہنا تھا کہ بلوچستان میں ابھی تک کوئی افغان پناہ گزین نہیں آئے ہیں۔
انہوں نے بتایا کہ وفاقی یا صوبائی حکومت کی جانب سے بھی افغان پناہ گزین کیلئے کوئی کیمپ قائم کرنے کوئی احکامات موصول نہیں ہوئے ہیں دوسری جانب بلوچستان کے محکمہ صحت نے صوبے میں افغان مہاجرین کی متوقع آمد کے پیش نظر کنٹی جنسی پلان تشکیل دے دیا ہے پارلیمانی سیکرٹری صحت ڈاکٹر ربابہ خان بلیدی کا کہنا ہے کہ بلوچستان میں لگ بھگ آٹھ لاکھ افغان مہاجرین کی آمدمتوقع ہے۔
