بیوپائیں سنگتے ءِ نام ءَ
گوں من ءَ سنگتی کنگ گْران اِنت
گوں من ءَ سنگتی کنگ گران اِنت
بیدے درد ءَ دگہ نہ منت ءَ ھچ
دل وتی بستگ مُھریں جنگجاھے
ھیش ءُ نوش کَل کُت اَنت گِس ءَ رپت آں
شپ وتی کِسّہ ءَ کنگ لوٹ اِیت
روچ منی چارگ ءَ نئیت انگت
ماھکانی چہ شینکاں اندیم اِنت
گندگ ءَ آں من دور استالاں
کَوش شپ ءَ سنگت اِنت مُدام گوں من
بُست کن آں من چہ واب ءَ ھر پاس ءَ
دائم ءَ گِنداں بس تھاری اِنت
ھال ءَ کسے نہ دنت بانگواہ ءِ
پمن ءَ بس بھشت ءِ بوہ ءَ کنت
مھبلیں ھاک مکھیں ڈیھ ءِ
دل گْوش اِیت دائم ءَ بہ کن زیارت
کَور ءُ شیپانی سبزکیں ریکاں
سِتک منی انگت ءَ برجاہ اِنت
گام منی دائم ءَ تیز تر بنت
دل منی روچ پہ روچ ورنا بیت
گیر کاراں من ناجدیں بچّاں
گیر کاراں مدام من اورنگ ءَ
ٹپّ منی تاجگ اَنت دل ءِ انگت
بالی ءِ ھوناں گُلزمین تر اِنت
یاگی ءَ دل کُجا پراموشیت
زندگی ءِ گیشتریں بھر ءَ
آ مُدام گوں من ھمراہ اَت
سمّل ءَ باریں چے گْوشگ لوٹ ئے ؟؟
پہ کومل ءَ چے پہ تو پشت کپتگ ؟
شرتر اِنت دور بدار وت ءَ گوں من
گوں من ءَ سنگتی کنگ گْران اِنت
گوں من ءَ سنگتی کنگ گْران اِنت
