کِشک ءَ گیوار ءِ گار بہ بیتیناں
ھمبلاں جھد ءِ ھوار بہ بیتیناں
تنگ اِتیں رکّانی لُڑیں نوکاپ
تاں جھان ھست اِنت ملار بہ بیتیناں
زالم ءُ زوراکاں بہ کنت گُٹگیر
پاھو ءِ مُھریں دار بہ بیتیناں
لجّ ءُ ننگانی تنگویں دیمپان
من گُل ءِ سِتریں شار بہ بیتیناں
کوچگ ءُ زید ءُ ملپداں رُمباں
دورسریں کَور ءِ ھار بہ بیتیناں
کینگ ءُ کست ءُ سھگریں دھر ءِ
مھر ءُ دوستی ءِ توار بہ بیتیناں
تئی انارکانی شپکدیں گْوربام
روچ ءِ بْرانزانی شھار بہ بیتیناں
شپ تھار ماہ ءُ کشک کوردیم اِنت
شپ جتیں بگّ ءِ مھار بہ بیتیناں
دژمن ءَ پادمال ءُ لپاشان ءَ
دھر ءِ سوچوکیں لوار بہ بیتیناں
من مجید دل پہ گُلزمین بستگ
بوجیگ ءَ جنز ءِ سوار بہ بیتیناں
