تو کہ بچکند اِتگ ماتیں گُلزمین ءِ مھر تئی بچکندانی تہ ءَ سھرا بوتگ، تو کہ شاکار اِتگ کوھنگ ءِ تمردیں ڈیل آشنا بوتگ ، تو کہ گال اِتگ سسّا ءِ چمّگ ءَ تِنگار بستگ ءُ مُروارِد اُوکار اِتگ ، تو کہ جُنز اِتگ ئے نازبوئیں گیرانی آتار ءَ تیوگیں دمک ءُ در وتی کوار ءَ مانجتگ اَنت ، تو کہ رپتگ ئے گیدی ءِ رنگ لگوشتگ ءُ ھمُک دیم ءَ کہ چم کپتگ اَنت ویرانی ءِ سنج بُتکگ ءُ تاموری ءَ مانشانتگ ۔
بیگاہ ءِ کَوش ءُ سُھب ءِ ھیر بوئیں سمین تْرکّلاں پِردار اِیت۔ ماھِکانیں شپ ءِ شار ءَ تئی گِستائی ءِ گم ءَ پُولِنگ چِتگ ءُ نودانی تْراولیں گِلگ وتی پلّوا ءَ گِرھن داتگ اَنت۔ تھاری ءِ باتِن ءَ تئی ڈکّ اِتگیں پُتینک ءِ ڈس ءُ نشان ءَ ھمبلاں ابید دُژمِن
دنیگا ناپُوہ اِنت۔
چہ ترا رند دُژمِن مُدام تئی گِس ءَ کَیت ءُ مات ءُ گِس ءِ مردُمانی ھمراھی ءَ لوگبانُک ءَ برے رنگے ءَ بیھار ءُ پادتراپ دنت کہ من ترا آوار جناں ءُ زِندانی کناں ۔ ھمے وڑ ءَ شھر ءِ چوکّیں چارِیگاں ھم شین زُرتگ ءُ شیکل اَنت کہ تئی لوگبانُک ءِ گْوانکو ءَ زنگ بجن ءُ ھمے بِہ گْوش ما ترا چِست کن اِیں ، ترا مرچی پِلاں گُد گْور ءَ اَنت۔ تو مرچی۔۔۔۔۔۔۔۔۔۔۔۔۔، تئی جود ءِ جون ءَ ما زان اِیں کہ لشکر ءَ کُجا کلّ کُتگ ، اگاں تو۔۔۔۔۔۔۔۔۔۔۔۔۔۔۔۔۔۔۔۔، گُڑا ما ترا گْوش اِیں گوں۔
بلے ملنگو تو زان ئے کہ تئی شیرزالیں بانُک ءَ چے گْوشتگ۔۔۔۔۔؟؟ من زان آں تو سرپد نہ ئے ، بلے اے ھبر ءَ تو پہ سِتک زان ئے کہ تئی بانُک تئی لیکوی سنگتے ، آئی پسّو پہ دُژمِن ءُ چارِیگاں نپت ءُ بیر گْوار اِیت۔
ھمے وڑ ءَ من ترا اے ھبر ءَ ھم ھال دے آں کہ تئی شھیدی ءَ پد ھندی چارِیگ ءُ لگوریں لشکر انگت ءَ بیمّ ءِ آماچ اَنت ، کُجام دمک ءَ کہ تیرے آس گیت تئی نام آئی زُبان ءَ کَیت ءُ ھمے گْوش اِیت کہ اے رھمین ءِ سنگت اَنت۔۔۔۔۔۔۔۔۔
گُڑا تو بِہ گْوش۔۔۔۔۔۔۔اے آئی پُروش نہ اِنت۔۔۔۔۔۔۔۔؟؟ من زان آں تو پہ ٹھک ءُ بچکند گْوش ئے ھو اے آئی پُروش ءُ زِند ءِ ھِساب کُتگیں روچ اَنت کہ پش کپتگ اَنت، چی ءَ کہ اے راجی جُنز ءَ دُژمِن اندر ءَ کْواپگ ءُ نپسیاتی نادْراہ جوڑ کُتگ۔
اِیشی ءِ مستِریں منّانک ءُ درور زِیکّیں تئی باگیں کیلّکور ءِ وئیل اِنت کہ رستریں لشکر ءِ سِپائیگاں میتگ میتگ ءَ دور کُتگ ءُ لسّہ ءُ شیشاریں شارانی بانُکانی لجّ ءُ ننگ لگتمال ءُ کماش پیری تیرباران ءُ شھید کُرتگ۔
کماش پیری پرے ھاتِر ءَ شھید کُرتگ کہ آئی پہ وتی گْرانازیں جِنکّ ءِ ننگ پھریزی ءَ دُژمِن بیھار داتگ ءُ گْوشتگ کہ منی ارواہ داں ڈُوبر ءَ ساڑی اِنت پہ ترا مرگ اِنت کہ تو وتی گاماں دیم ءَ شھار بِہ دے پہ منی ننگ ءِ لگتمالی ءَ ، چی ءَ کہ بلوچاں وتی سر بکشاتگ بلے لجّ ءُ ننگ نہ بکشاتگ۔
آ تئی رسم ءُ رواج ، دُود ءُ ربیدگ ءِ بھر اِنت کہ دُژمِن ءِ وش آتک ءَ ڈُھل ءُ سُرنائی بوتگ ئے۔ ما پہ ننگ ءَ مُرت کن اِیں ، بلے ننگ بیپاری ءَ چو باجوئیں چمّ چُٹّ ءُ کاسگ چٹّانی وڑ ءَ بے شرپی ءَ پہ وت کدی شات نہ کن اِیں ، چی ءَ کہ مارا وتی گْوست ءُ ملّ مِڑوکیں کمبرانی کَول ءُ گُشتن ، ننگ پھازی ءِ داتگیں درونت ، راجدپتر ءِ ساٹ اِتگیں داستان شرّی ءَ گیر اَنت۔
بلے بیا بِل اِیشی بگر آئی! رھمی من ءَ تئی دِگہ ھبرے گیر آھِگ ءَ اِنت ، آ ھبر اِیش اِنت کہ من ءُ تو کماش رھمت نِندوک اِت اِیں کہ من گْوشت کماش تو اے بیگاہ ءِ بے چاڑیں موسم ءَ گوں زھیروکے ءَ ساچان بہ کن دانکہ مئے گمے اِیر بِہ لھ اِیت ءُ نوکیں جوزگ ءُ مارِشتے آچ بِہ گیت ، ترا یات اِنت گُڑا کماش ءَ چے گْوشت۔۔۔۔۔۔۔؟؟
کماش ءَ کندگ کندگ ءَ پسّو دات کہ منی زھیروکاں کہ شُمے گمانی گْرانیں بار سُبک بیت گُڑا الم زھیروکے گْوش آں ، بلے منی گمانی گْرانیں بار ءَ کَے سُبک کنت۔ تو پہ ٹھک پسّو ترّینت ءُ گْوشت: کماش تئی گْرانیں بار ءَ ماتیں گُلزمین سُبک بِہ کنت مئے کارے نہ اِنت۔
بلے مرچی نہ تو ساڑی ئے نہ کماش گِندگ بیت! من ءُ تھنائی ، ند ءُ رودپتر ، پُرشتگیں کُرشی ءُ ژندیں ٹیبل ، کُوپے سْیاہ چاہ ءُ سِگریٹ ءِ چیلک بستگیں دُوت ، موکو ءِ شِنگ اِتگیں تند ، بے دروازگیں گِس ءُ نیم بُندگیں دریگ ، ناشی ءِ تْرندیں شِیکگ ءُ زِمستان ءِ آپبندیں موسم باتِن ءِ دوار ءَ گوں شُمے لیکہ ساچیں گیراں اَھدے ءِ کِسّہ ءَ گْوپگ ءَ اِنت۔
راستے کہ نہ تو ساڑی نیکہ کماش گِندگ بیت! بلے شُمے تْراولیں پند ءِ ھون سینگاریں داستان راجدپتر ءِ بھر ءُ دِلانی گْوانک ءُ توار جوڑ بوتگ۔ ھر زھگ کہ اے جنگ آماچیں ڈیھ ءَ ودی بیت ، آ الم تئی دابیں منلگو ءُ دربیشیں رھمتاں پجّا کار اِیت ءُ وت ءَ ھمے رنگ ءَ گوناپ دَیَگ ءِ جُھد ءَ کنت۔
ڈیھ ءِ کُجام آتراپ ءَ کہ تیرے آس گیت، من ھمے سرپد بہ آں کہ رھمی ءُ رھمت کیلّکور ءُ گیشکور ءِ آپبنداں پہ ڈیھ ءِ پاسپانی ءَ جنگ ءَ اَنت۔ گُڑا وھد ءَ مجال کہ شُمے دابیں کُنگراں بے ھال بِہ کنت ءُ بِہ شموش اِیت ، چی ءَ کہ شُما راج ءِ دِلانی اندر ءَ پہ مُدیمی ابدمان بوت ئِے ءُ آیوکیں اُوبادگ پہ ناز ءُ شان شُمے سِپت ءَ کنت ءُ ساڑا اِیت۔۔۔۔۔۔۔۔۔۔
