بانک ھسیبہ ءُ شیزالیں گُہارں پہ لچہ یے | دیدگ شوھاز

کئی گِلّہ آں بِماراں ءُ کئی ارساں بموکاں
کُجام کتاب ءَ بواناں کئی کتاباں
ھر عکس ءِ چہ وت تھار اَنت
ھر یکے چہ وت گار اَنت ءُ ملار اَنت
کئی گِلّہ آں بِماراں ءُ کئی ارساں بموکاں
سمی ءُ ھسیبہ ءَ بچاراں یا مھلب ءَ
یا شال ئے سُرمگیں ماہ رنگ ءِ دیدوکاں
ھر پُل ئے چہ وت گیمُرتگ ءُ مُرتگاں
کئی زَنْزَرگ ءُ ھیسکگاں گوش بدار اَنت
کئی گِلّہ آں بِماراں ءُ کئی ارساں بموکاں
تلوساں گُہار گُلزمین ءِ سباہ ءِ سارتُکیں سمین ءَ
پدا نوکیں پندلے سازت بیشکاراں
کئی زنگ ءِ مارشتاں آپ بدیاں
ءُ کئی مھرُمیں دیدگاں بچار انت
کئی گِلّہ آں بِماراں ءُ کئی ارساں بموکاں
نزاناں چنت شہسوار گونگی ءِ ڈساں شُتگ
کئی پادتراپاں گوش بداراں
کُجام عکس ءَ ءُ کُجام نگاھاں شانک بدیاں
ھر شیشگیں چم پہ ودار ءَ ودار اَنت
کئی گِلّہ آں بِماراں ءُ کئی ارساں بموکاں