نشتگاں زند ءِ کسہ ءَ وان آں
من وتی جند ءِ کسہ ءَ وان آں
داھم ءَ جھندم ءُ بھشت کناں
من ھُداوند ءِ کسہ ءَ وان آں
اشک ءِ داستان شے ءُ ھانی ءِ
چاکریں رند ءِ کسہ ءَ وان آں
گوں ترا کُرتگیں اُو ماتیں زمین
اَھد ءُ سوگند ءِ کسہ ءَ وان آں
میزران اِنت گُلیں بلوچستان
من کسرکند ءِ کسہ ءَ وان آں
شانک دے آں دیدگاں البُرز ءَ
پُلیں ھِلمند ءِ کسہ ءَ وان آں
ڈیھ پہ ارزانی ءَ نہ دات ءَ کدی
ما ھمُک رند ءِ کسہ ءَ وان آں
زندگی چون گْوزان اِنت لھم لھم ءَ
من وتی پند ءِ کسہ ءَ وان آں
یات کناں پنواں وتی کیچ ءِ
سسی ءِ سِند ءِ کسہ ءَ وان آں
سَید ، کازی ، منیر ، اتا شات ءِ
پازُل ءِ مند ءِ کسہ ءَ وان آں
جاہ ءِ آھو کدی نہ بیت بے ھال
من وتی ھَند ءِ کسہ ءَ وان آں
من ھما مھروانیں انسان ئے
لُنٹ ءِ بچکند ءِ کسہ ءَ وان آں
من وتی نابزانتیں سرباز ءِ
شَیر ءِ پربند ءِ کسہ ءَ وان آں
