،،نوکیں توارے جہ بجنت،،
جنگان دشتی
توارے نوکیں جہ بہ جنت؟
ھمُک دیار ءُ دمک کربلاہ چیدگ انَت
گِسانی پیشگاہ شھیدی ھوناں سَمبھینتگ اَنت
لاشانی پتّار کئے ءَ گاڑینتگ اَنت
بمبار کُتگ بلوچ ءِ زندمان
مال ءُ مڈّی ءُ گِدّان دُرست بِباہ داتگ اَنت
پیر ءُ ورناہ کُل زندانی انَت
مکھیں مات ءُ گُھار آھنیں تیلاں پیڑاتگ اَنت
اُردکّیں کاڑانی پادوک تراولاں
کمبر ءِ لجّانی میار شھدّگاں چوناں بہ چار
دورپندیں روانک گیشنتگاں باُنکاں
زمستانی ٹنٹّیں چاھڑ دستوکاں زُرتگاں بانُکاں
بلوچ ءُ پشتون ءُ سِندھی گُھاریں لاڑوکاں
گیرت ءُ لجّانی چادِر دُژمناں دِرتگ اَنت
نوں چیزے پشتکپتگ پہ بلوچءَ؟
بند ءُ بوگ ئے سرآتکگ پہ سِندھودیشءَ؟
دگہ گپ ئے مَنتگ پہ پَشتون براتاں؟
نوں نوکیں آشوب ئے بِندات بہ بیت
یکمُشتی ءُ یکجاھی ءِ داوت بہ بیت؟
بلوچ ءُ سندھی ءُ پشتون برات بہ بیت
دجّال ءُ یزیدانی ونڈ ءُ ھیرات بہ بیت
جہ بہ جنت نوکیں باریگ ئے پدا
چیرجنگیانی لَڑّ نوکیں تھراں بہ باں
گرند ءُ گِرّوکانی کاروان ھساراں بہ باں
جنگجاھی میدان ھم تواراں بہ باں
نوکیں تراک پنجاب ءِ شھراں بہ باں
کرن ءُ نوبت پد بہ تراں دوبر
مات ءُ گُھار جنگی بہ پوشاں جامگاں
کریمہ ءِ پگر ءَ گوں پِگراں مان بہ کشاں
کریمہ ءِ جُنز ءَ گوں جُنزاں مان بہ تراں
بانُک مھرنگ گوں مھلب ءَ نِشتگ سنگراں
ھسیبہ ءُ پرزانہ ءُ ھانی گُل گوں دُختراں
ماما کدیر گوں روانک بُرّیں پیگمبراں
توارے نوکیں جہ بہ جنت
تیرسُپتگیں سنگرانی کوہ مزاریں سرمتاب
نوکیں چیرجنگیانی رِپکّاں گوں گونچان بہ باں
نوکیں پِگر ءُ نوکیں لیکّھاں گوں جُنزان بہ باں
باروٹی ایں لشکر ءِ کیمپ ءُ ماڑیاں پروشان بہ باں
نوکیں راھبند پر بہ ریچاں
نوکیں کارست ایر بہ تراں
زیت بہ بیت بیلاں کہ کاروان رپتگ
یک بہ بیت پتّر، یک بہ بنت جیڑھ
یک بہ بنت راھبند، یک بہ بیت گلّ ئے
بس انِت کوتائی
بس انِت تاتائی
سرگِراِت نوں کہ انگتیں جنگ
سرگرِات کہ جُنزیتگ توار آجوئی
سرگرِات کہ جنگ گُڈسریں منتگ
توارے نوکیں سَمبھین اِت توپگاں
سرگِراِت بیلاں
سرگِراِت بیلاں
