مجھے اور زندگی دے کہ ہے زندگی ادھوری
میری موت سے نہ ہوگی میری غم کی ترجمانی
لہتیں انچیں غم است کہ انسان ءَ پر آئی ءِ سگگ ءِ ہاترا زندگی پکار اِنت ،
ہما غم کہ گوں راج ءُ زمین ءَ بندوک بنت پراشاں زندگ بؤگ المی اِنت ۔۔۔
زندگ بؤگ ایوکا ساہ کشگ ءِ نام نہ اِنت ، بازیں مردگے است کہ ساہ کشّنت ، چو کہ مردہ ضمیر ، مردہ غیرت ، مردہ ننگ ، ءُ منی نز ءَ آ انسان ہم مردگ شمار اِنت کہ آئی ءِ تہا زانت ءُ سرپدی مہ بیت ۔۔۔
ءُ باز انچیں مردم ہم است کہ آیاں ساہ ءَ دروہتگ بلئے زندگی ءَ اناں۔۔۔
چو کہ سرداریں واجہ حمیداللہ ءُ بانکیں گہار کریمہ بلوچ ۔۔۔
گشنت کہ دو ہزار بیست ءِ سال پہ بلوچاں یک شومیں سالے ،
اے وَہ راستے ، بلئے من گشاں کہ نگبہتیں سال پہ بلوچاں کجام بوتگ ؟
بلئے راستی دو بلائیں نام ۔۔۔ دو بلائیں پگر اے سال ءَ چو بلائیگ ءَ ایر بُرت اَنت ،
راستی وَہ اشنت کہ منا وَہ بانک ءِ ساہ دروہگ ہم باور نہ بیت ۔۔۔
اے گرانیں ساہت اَنت ، اے گرانیں وہدے پہ ایوکا ء بانک ءِ کہول ءَ نہ بلکن پہ کُل بلوچ ءَ ،ءُ من پہ جزم گشاں کہ ایوکہ سامیہ ءِ دل بن نہ اِنت بلکن سرجمیں بلوچ راج بگندئے چہ آئی ءِ گہاراں ہم گیش غمیگ اِنت ۔ بلئے پدا اوں ما گشیں کہ ما پہ اے وڑیں ہستیاں کہ آ شہید بنت ماتم نہ کنیں ، چیا کہ
روئیں وہ جو قاتل ہیں ان شہیدوں کے
ہم زندہ جاواداں کا ماتم نہیں کرتے
ءُ راستی منا وَہ آئی ءِ ساہ ءِ دروہگ ہم باور نہ بیت ، منا چوں باور بہ بیت ؟ منا آئی ءِ کندگ ، آئی ءِ چارگ ، آئی ءِ ہمک لبز مرچی یات پیداک ۔۔ یات مرت کننت ؟ پگر مرت کنت ؟ ھیال مرت کننت ؟؟ اگن اناں گڑا من ہم گشاں کہ بانک نہ مرتگ زندگ اِنت ۔۔۔
منا آئی ءِ توسیپ کنئگ ءِ ہچ زلورت نہ اِنت ، چیا کہ آ محتاج توسیپ نہ اِنت ۔۔۔ بلئے اینچو من گشاں کہ آ یک انچیں مردمے بوتگ کہ ہچبر کسے ءَ ردیں سوجے نہ داتگ ،
منی کتاب ءِ چھاپ ءَ پد فیس بک ءَ بازیں مردمے منی زاہ ءُ بد ءَ شروع بوت گڑا یک روچے منا مسیج کت ءُ گشتئے ، تو ہر چند کچکانی جواب ءَ دئے اے کچک وتی وکگ ءَ بس نہ کننت ، تو سوچ اشاں ، اشاں ادا زاناں کئے پشت گیتکگ ؟
آ یک ایوکہ دزگہارے نہ بلکن یک گہارے اَت ، مرچی من پہ راستی گشاں کہ من اے نہ فہماں کہ چہ ما یک دزگہارے ، یک ہستی یے جدا بوتگ بلکن اچ ما مئے جند ءِ گہار جتا بوتگ ۔۔ ءُ جتا ہم جسمانی صورت ءَ بوتگ ، زہنی ، پگری صورت ءَ مدام مانیت ۔۔ داں کہ یک بلوچے است ءُ داں کہ یک بلوچے بیت ۔۔۔ اے وڑیں پگر نہ مرنت ، اے وڑیں شخصیت ختم نہ بنت ۔ راجدپتر ہچبر گار بیت ؟
مرگ وَہ برحق اِنت ہرکسی سرا است ملکموت ہر کس ءَ کشت ءُ گار کت کنت ، بلئے اے ہما مردم اَنت کہ مرگ ءَ ہم اے کشت نہ کت اَنت ءُ ملکموت ءَ ہم گار کت نہ کتنت ۔
من گشاں ءُ زوراکیں ملکموت بگندئے تو گشت کہ من آئی ءَ کشاں بلکن آ مریت ، بلئے تئی منتوار کہ تو آ ابدمان کت ۔۔۔ نو ہچ وڑیں زوراکی ، ہچ وڑیں پندل ، ہچ وڑیں ہیلہ آئی ءَ چہ بلوچ راج ءِ دل ءَ در کت ءُ کشت کُت نہ کنت ۔ بگندئے چیزے مدت ءَ لہتین بدگمانی بوتگ بلئے راستی زوراکیں ملکموت ءَ ہمک بدگمانی گوں آئی ءِ ہوناں ششت ءُ آ ابدمان ءُ نمیران کت ۔ ملکموت تو پہ اے ساہ ءِ گرگ ءَ سوبین نہ بوتئے ، ءُ نہ کہ باج بُرت ۔۔۔
تو وتی سرجمیں تاگت پہ یک صنف ءِ نازکے ءِ بیران (ابدمان )کنئگ ءِ ہاترا ہرچ کت؟؟ ۔۔۔ افسوز پہ ترا ۔۔۔ سد افسوز۔۔۔
بلئے ماتم کنئگی نہ اِنت ۔۔۔ چیا کہ پہ ابدمان ءُ زندگیناں ماتم کنئگ نہ بیت ۔۔۔ ماتم پہ مردگاں کنئگ بیت ۔
بلوچ ءُ بلوچیت است بات ءُ اے وڑیں ہستی مدام است بات اَنت ۔۔
