لبزانک بنی آدم ءِ زندمان ءِ جلواہ اِنت ، لبزانک زبان ءِ ارواہ اِنت ، لبزانک چاگرد ءُ راج ءِ بِراہ اِنت ۔ لبزانک گوں راجی زبان ءَ بندوک اِنت ۔ گوں کمیں لبزاں شیرکن ایں درشاندابے ءَ وتی وانوک ءُ گوشداروکانی ھیال ءُ مارشتانی وتی نیمگ ءَ کنگ ءُ سرپد کنگ ءِ نام لبزانک اِنت ۔ زبان ءُ راجدپتر ءِ پھازوک لبزانک اِنت ، راجی ءُ چاگردی جیڑھانی پیشدارگ ءُ گیش ءُ گیوار کنوک لبزانک اِنت ۔ لبزانک چو آدینک ءِ وڑ ءَ اِنت تئی چاگرد ءِ ھر ندارگ ءَ شریں وڑے ءَ پیشداریت ، لبزانک راستی ءَ پدر کنت ۔
لبزانک ءِ جلواہ ناکی ھمیش اِنت کہ بنی آدم ءِ زندمان ءِ لوٹاں گوں پُل ءُ ماہ ، استال ءَ درور دنت ءُ درپشوکین چھرگے پیشدار اِیت ۔ لبزانک زبان ءِ ارواہ پمیشکہ گوشگ بیت کہ تئی راجی زبان ءِ لبزاں زندگ داریت ءُ گار ءُ بیگواھے ءَ نیل اِنت ۔ لبزانک راج ءُ چاگرد ءِ بِراہ پمیشکہ گوشگ بیت کہ تئی راجی دود ءُ ربیدگ ، ماتیں گلزمین ءِ درچک ءُ دار ، نیلگیں زر ، سرومگین مات کوہ ، سبزوکین کشاراں نازین اِیت داں تو وتئی دود ءُ ربیدگ ، گوں ماتیں گلزمین ءَ مھر بکن ئے ءُ بے ھال مہ بئے ۔
لبزانک دو جاہ ءَ بھر اِنت یکے شَیر ءُ شائری اِنت ، دومی ردانک اِنت ۔ شائری ءِ تھر باز اَنت دستونک ، سلھیں دستونک ، لچھ ، رم لچھ ، آزاد لچھ ، سوت ، نازینک ، موتک ، ھالو ، لیکو دگہ بازیں تھر ھست اَنت ۔ یکبرے ما شَیر ءُ شائری ءِ سرا چمشانک ءِ دئے ایں ، شائر وتی ھیالاں چون درشان کن اَنت ۔
راجے کہ بہ بیت کُنگ نہ مانیت ، نہ مانیت
مانیت ایں اداروک ءِ بزان زندگ ءُ مُردار
سَید ھاشمی
دانکہ پہ سمی ءَ پیداک نہ بیت دودائِے
پہ تئی دوداءَ کدی بیرگیریں بالاچ نہ بیت
سَید ھاشمی
بولی اگاں وشیں جند ءِ بند اِنت
وتی راہ ءَ یل دنت مردم رد اِنت
گلام ھسین شوھاز
ھون ءِ کہ پہ ھک ءَ رچیت
ھاک ءِ تہ ءَ بیگواہ نہ بیت
اِتا شات
من پزل دانکہ ھیات آں بس ھمے گپ ءَ گُش آں
جی بلوچ ءُ جی بلوچی ، جی بلوچستان مئے
پَزل ھیات
شائری مردم ءِ باتن ءِ درد ءُ مارشتانی گوں کمیں لبزاں درانگاز کنگ ، ھمئے کمیں لبزانی ھما وڑ کماھگ کہ آھانی پُشت ءَ یک کسھے ودی بہ بیت ۔ وانوک ءُ گوشداروک ءَ یک کرارے بہ رس اِیت ۔ ردانک ھمے وڑ اِنت چو شائری ءِ داب ءَ اِنت آئی ءِ باز تھر اَنت آزمانک ، کسمانک ، سرگوست ، کسھ ، تامُرساچی ، اھوالکاری اِنت تئی چارگرد ءَ جوان ءُ گیچین ایں رنگ ءُ دروشمے پیشداریت ۔ لبزانک پہ راج ءُ چاگرد ءَ وشھالیں بانداتے ءِ جنُزگ ءِ سکین ءَ دنت ۔ لبزانک تئی راجی بزگی ءُ لاچاریانی سرا ھم تران کنت ۔ لبزانک راجدپتر اِنت شَر ءَ شر گوش اِیت ءُ شِر ءَ شِر ۔
ایردستی پہ لبزانک ءَ یک زنڈیں تاوانے ، زورگیر ءِ جُھد ھمیش اِنت کہ آ ایردستیں راج ءِ لبزانکی گَلاں ھلاس بکنت ءُ وتی منوگراں دیم ءَ بیاریت ۔ ایشی ارزان ایں درور پاکستان اِنت ۔ مئے ءُ شمئے دیم اِنت ، بلوچ ءِ لبزانکی کاروان ءَ ھچ وڑ ءَ دیم ءَ روگ نیل اِیت ، ھما لبزانکی گَل راج ءِ ھزمت ءَ کنت ءُ راستی ءَ پدر کن اَنت آ بند کنگ بوتگ اَنت ، اگاں یک شائر ءُ نبشتکارے وتی ماتیں وتن ءَ بہ نازیں اِیت ءُ راستی ءَ دیم بیاریت ، گڑا آ الم گرگ ءُ گار ءُ بیگواہ کنگ بیت ، شھید کنگ بیت ۔ چی ءَ کہ راجانی تہ ءَ لبزانک یک گرانکدریں مڈی ے شائر ءُ نبشتکار ءِ یک بلاھیں ارزشتے بلوچ راجی جُنزا اے ناشرکاریں اِستان ءِ ناشری سرجمیں دگنیاے دیم ءَ پاشک کُرتگ ۔ بلوچ راجی آجوئی لوٹوکیں گلاں پہ ناشرکاریں پاکستان ءِ ھلاپ ءَ وتی ھر وڑیں جُھد کوشست برجم داشتگ اَنت ۔
انُچش کہ گوستگیں روچ ءَ بلوچ راجی زرمبشت ءَ ( بی این ایم ) نبشتکاری اِزم ءِ سرا مراگشے داشتگ اَت ، بلوچ راجی زرمبشت ءِ بُنجائی کمک کارگشاد واجہ اُستاد بابل لتیپ ، واجہ دلجان بلوچ ، واجہ ڈاکٹر جلال بلوچ گوں بلوچ راجی زرمبشت ءِ باسک ءُ نبشتکاراں یوان ءِ کرت ۔ اے باز جوانیں گام گیجے اَت ، اگاں من بہ گوش آں اُستاد بابُل لتیپ پما سارتیں ساھگے ءِ ھساب ءَ اِنت من رد نہ باں ، چی ءَ کہ مئے ھر نوکباھندیں نبشتکار ءَ آئی ءِ سکین ءُ دلبڈی گون اَنت ، واجہ ڈاکٹر جلال بلوچ مئے رھدبر بوتگ آئی نبشتانکانی وانگ ءَ مارا توکل ءُ ھاٹیگ ءِ داتگ ۔ واجہ دلجان بلوچ ءِ مھر ءُ دلبڈی مارا داھم ءَ گون بوتگ اَنت ۔
اے مراگش ءِ تہ ءَ ساڑی ایں سنگتاں ھرکس ءَ یک جوانیں رنگے وتی ھیال درشان کُت اَنت ، اے ھبر راستے کہ ما نودربر ایں یکے چہ دومی ءَ چیز ءِ دربر ایں ، اے وڑیں مراگش مارا الم یک جوانیں زانت ءُ زانشتے دنت ۔ بلوچ راجی زرمبشت ءَ چہ 2004 ءَ بگر داں روچے مرچی وتی جُھد یک مھکمیں رنگے ءَ بَرجم داشتگ ۔ مرچی بلوچ راج ءِ دیم ءَ شریں وڑے ءَ پدر اِنت ، بلوچ راج وت زانت ءُ سرپد اِنت ۔ بلے اے وڑیں نبشتکاری اِزم ءِ سرا مراگش مارا گیش ءَ چہ گیش سوھو ءُ شیوار کنت ۔ سنگتانی جھُد ستائے لاھک اِنت ۔ من پُر اُمیت آں اے وڑیں مراگش دائم ءَ دارگ بنت ۔
