بیا کہ موسم ءَ رنگ مٹّاتگ ءُ زِمستان ءِ ھلوتاں چاگِرد گوں وت ءَ ترّینتگ۔ شال ءِ آبستگیں دگ گوں زرگُل ءُ سیما ءِ ارس ءُ دِل ءِ دِریکگّاں پیوند اِنت۔۔۔۔۔۔۔۔۔۔۔۔۔۔، زیمیں چیھال ءُ آسیں ھیسکارگاں دُگنیا سر ءَ زُرتگ ءُ ھزار اُمیتیں واھِشت ءُ واھگانی بے اُوستیں کُنٹ رِمیزاں گِپتگ۔۔۔۔۔۔۔۔۔۔۔۔۔، بلے ودار ءِ دْروھاپیں اِنتزار انگت ءَ تُلُکّان اِنت۔۔۔۔۔۔۔۔۔۔
دُژمِن ھرروچ پندلے ساز اِیت ، روچے یکّے آوار جنت ءُ تھار دیمگیں زِندان ءِ ھون چکیں کُوٹی ءَ گوں سانکلاں بندیگ کنت ، روچے یک سوگاتیں بچّے گونڈلیں تیرانی آماچ کنت ءُ جوناں وتی وڑ ءَ کڈّ کنت، انگت وتی چرپیں نگن ءِ چانوگرانی دْروشم ءَ بیھار دنت کہ اے جمبولیں آس کہ من ءَ سوچگ ءَ اِنت۔۔۔۔۔۔۔تم بِہ بیت۔۔۔۔۔۔۔۔
بلے چو الم زانت کہ اے آس پرچا بالگ بوتگ۔۔۔۔۔۔۔۔۔۔۔۔۔؟
اے آس پرے ھاتِر ءَ بالگ بوتگ دانکہ آئی ءِ گامانی ھر نِشان بے نِشان ءُ پہ مُجّتی چرئے آپبنداں بیگواہ بِہ بیت۔۔۔۔۔۔۔۔
بلے! دِل نگیگیں اِھوال ھمیش اِنت کہ تئی بیگواہی ءِ چار سال توام بوتگ ءُ تو انگت ماں زِندان ءِ تھاریں کُوٹی ءَ گوں سانکلاں بندیگ۔۔۔۔۔۔۔۔۔۔۔۔۔۔۔
سیما ءُ زرگُل چہ تئی بیگواہی ءَ پد گوں وتی کھول ءِ ھمراھی ءَ اِیمن ء دِل کدی نہ بوتگ اَنت ، برے کُلاچی ءُ برے شال ءِ آبستگیں دمکاں سارتیں موسم ءِ کُٹّ ءَ شپاناں روچ ءُ۔۔۔۔۔۔۔۔۔۔روچاناں شپ کُتگ ۔ بِہ گِندئے پہ مئے ارس مینتگیں شار ءَ آتارگ ءِ پُلّے بِہ سْرپ اِیت ءُ تئی گِندگ ئے تُلُکّانیں ھوشام پہ مُجّتی سیراپ بِہ بیت۔۔۔۔۔۔۔۔۔۔۔۔، بلے ودار ، ودار ءَ اِیر بران اِنت۔۔۔۔۔۔۔
زرگُل ءِ لُنٹاں چہ تئی بیگواہی ءَ پد پن ءُ لالی نہ دیستگ کہ بے اشکامیں زِرد ءَ گمے تیلانک بِہ دنت ءُ وت ءَ دمے وشیانی بیٹ سر ءَ بِہ مار اِیت ءُ تئی آھگ ءِ اُوست ءَ دِل ءَ گْوات ءَ بِہ دنت۔۔۔۔۔۔۔۔۔۔۔۔۔، بلکیں آ گوں زِرد ءِ کٹمیں واھگاں چہ اندر ءَ پِیلُشتگ ءُ زاھر ءَ گوں وتی باریں بارگیں ڈیل ءَ گیمرتگ۔ گوں بھاریں زِند ءِ بھاری نوبتاں گْوش ئے پیراں سری ءِ پدیانکاں اُوشتاتگ۔۔۔۔۔۔۔
ءُ ھمے داب ءَ۔۔! سیما ءِ ارساں وتی باتِن ءَ دپترے نویس اِتگ ءُ مُدام گوں تئی انگریں یاتاں وت ، وت ءَ روچے سد رند ءَ تسلّا دنت ءُ سھڑینّیت۔ وھدے ھاٹیگ ءِ بالاد کہ کمّیں پدرد بیت۔۔۔۔۔۔۔۔، گُڑا بیدے ارس شلگ ءَ دِگہ ھِچّ راہ ءُ در نہ گِند اِیت ، چی ءَ کہ آئی ءَ ھاکمیں وھد ءِ زُوراکانی ھر در ءُ دروازگ ٹُکّ اِتگ ءُ زِرد ءِ پِریات سر کُتگ۔۔۔۔، بلے ھِچّ پہ ھِچّ۔۔۔۔۔۔۔۔۔
چی ءَ کہ ھاکمیں وھد ءِ زُوراک تھنا زِرد ءِ چیھال ءُ آسیں ھیسکارگاں نہ مار اَنت ، بلکیں آیاناں ھمایانی زُبان ھبر ءُ سرپد کنگ لوٹ اِیت۔۔۔۔۔۔۔۔۔۔، اگاں نا زوراک ءِ اے زورانسری مئے راجی ھُنڈالاں ولگوج کنت۔۔۔۔۔۔۔۔۔
بلے لکّی جان! تو پہ ھمے زُوراک ءِ گُروناکی ءِ آس دَیَگ ءَ مرچی زِندان ءِ تھارونکیں کبس ءَ گوں ریز ءُ سانکلاں بندیگ ئے۔۔۔۔۔۔۔۔۔۔
چی ءَ کہ تو وتی زِند ءِ واھگانی زیبائیں ادارُکی ءِ لد وت ، پہ سما ءُ سسّا اے کُورُم ءَ چگل داتگ ، بلے پہ ھمے مکسد ءَ کہ منی راجی زِندمان کُورُم مہ بیت ۔ آیوکیں پدریچ وتی کُڈُک ءِ پیژگاہ ءَ باروٹی ءُ اباشکُو مہ بیت۔۔۔۔۔۔۔کہ من کَے آں۔۔۔۔۔۔۔۔۔۔
راستے۔۔۔۔۔! پہ اے الماسیں روچانی پلگارگ ءَ سھت ءُ زیوریں زِند ساچانیں موسم گوں دْرشکیں لِوار ءَ میڑینگی اِنت دانکہ تو باج بر بِہ بَہ ئے۔۔۔۔۔۔۔۔یا پہ مڑاھے مرگ ءَ وش آتک ءُ امباز بِہ کن ئے ، بلے گامانی مھتل دارگ ءُ پد ءَ کِنزگ آسری سودایے نہ بیت کہ مُدامی وژنام بِہ بَہ ئے۔۔۔۔۔۔۔۔۔۔۔
بلے لکّی جان۔۔۔۔۔۔۔! سیما ءُ زرگُل ءِ دِل کدی اے گپّ ءَ نہ منّ اِیت ، بلکیں آ ھمے اُمیت ءَ دْروھاپیں اِنتزار ءِ جوسر ءَ نِشتگ ءُ ودارِیگ اَنت، بِہ گِندئے تُلکّانیں ھُوشام پہ مُجّتی سیراپ بِہ بیت۔۔۔۔۔۔۔۔۔
ءُ ھمے ھُوشام اِنت کہ زِند ءِ گامانی اندر ءَ ھاٹیگے ودی کنت ءُ گیشیں دردانی چکّاس ءَ سبر ءِ کدّہ ءَ تِنگین اِیت۔۔۔۔۔۔۔۔۔۔۔۔
