منی ڈیھ ءِ ھمُک دمک ءَ ، ھند ءُ میتگ ءَ ، دشت ءُ کُوچّگاں ، لد ءُ کھچراں تنگوئیں بچّانی ھمراھی ءَ ھیکّانی ھم جون ، ھڈّ ءُ کانپول دست کپ اَنت۔۔۔۔۔۔۔
بلے دومی نیمگ ءَ زمین ءِ دِلداریں جنگولانی مھر ءِ گْوارِشت ، تْراولیں گیرانی ھلوت ،چاڑ مینتگیں موسم ءِ نیمونیں اُوست ، زنگ آماچیں ارس ، جون کھچریں زِید ءِ گُباریں اکس ءِ ھوناکی ، زِرد ءِ کلاتیں دِیوال ءِ ڈُرّتگیں بالاد ، گیمُرتگیں شاھاں بُلبُلانی گمیگیں چیھال ، باتِن ءِ تلکار پیچیں گْواش ءَ آس شروکیں ھیال ءِ آدینک۔۔۔۔۔۔۔۔۔۔۔۔۔۔۔۔سسّا چکاریں آشنائی یے ڈسّ اِیت۔۔۔۔۔۔۔۔
ھمے آشنائی مُجّتی ئیں زِندمان ءِ مانزمان اِنت ، اگاں کُجام راجاں نا آشنائی ءِ لُمب اِتگیں کُرود ءِ ساھگ ءَ وتی کمرزانی بستگ ءُ تِکّو داتگ ، آ مرچی پہ مُدامی بے نام ءُ نِشان اَنت۔۔۔۔۔۔۔۔
چی ءَ کہ دُگنیائی ءَ پہ راج زِندگ ءُ چیدگ ھما بَہ اَنت کہ آئی ءِ تہ ءَ وتی ڈسّگ ءِ ، وتی پُولگ ءُ شُھازگ ءِ ، وتی رکّینگ ءُ پھازگ ءِ ھاٹیگ منتگ ، آ کدی نہ مان اِیت کہ چرئے سِنچ ءُ زانت ءَ زِبھر اِنت۔۔۔۔۔۔۔
بلے من ءَ۔۔۔۔۔۔۔!
وتی بلوچ راج ءِ سوسنیں ورنایانی سر ءَ پھر اِنت ، کہ آ جنگ ءِ پِڑ ءَ ساڑی ءُ پہ آیوکیں پدریچ ءِ مِسک مینتگیں سُھب ءَ دیمونی دَیَگ ءَ اَنت ، اے درگت ءَ مزن بند ءُ نیلگیں سائجی ءِ ھسار بالادیں شھید اِمداد جان پہ بِچکند گوں سنگتے ءَ گْوانکو ءَ تْران کنان ءَ گْوش اِیت :
” اے گرم ءَ من وت ءَ رکّین آں۔۔۔۔۔گُڑا دیم ءِ گرماگ ءَ چوں کن آں پُل ، اللہ زِندگی یے بِہ دنت۔ اے ھیال ءَ درا اِت جگر۔۔۔۔۔گرم ءِ ، سارت ءِ ، بس جُنز۔۔۔جُنز”۔۔۔۔۔۔۔۔۔
چی ءَ کہ جُنزگ تئی دُوریں پند ءَ نزّیک کنت ءُ ترا مِنزل ءَ پُجّارینّیت ، آ راجاں کہ جُنزگ ءِ بدل ءَ وتی ادارُکی واھشتانی کابیل آپ کُتگ۔۔۔۔۔۔۔۔نہ منتگ اَنت۔۔۔۔۔۔۔۔۔
مرچی بلوچ راج پہ وتی ابدمانی ءَ بھار شنزیں ڈیھ ءِ جون کھچریں زید ءَ مان دیان ءُ دیم ءَ جُنزان اِنت۔۔۔۔۔۔۔۔۔۔۔۔۔۔دانکہ زِندگ بِہ ماناں۔۔۔۔۔۔۔۔
ھمد ءَ من ءَ مھروان ءُ دِلدوستیں سنگت بْرمش ءِ گْوشتگیں دانکے گیر کَیت کہ آئی ءَ مئے سنگتانی دیوان ءَ گْوشتگ اَت ، من زاناں۔۔۔۔۔۔! منی دِشتار آ نہ اِنت کہ مات ءَ پمّن گِچین ءُ ھبربندی کُتگ ، بلکیں منی دِشتار ءُ وابانی ٹھلیں بانور۔۔۔۔۔۔بھشتیں گُلزمین اِنت۔۔۔۔۔۔، ءُ اے واھگ منی زِندمان ءِ اولی ءُ آھِری واھگ اِنت ، اے واھگ ءِ دیم ءَ چونیں جنجالے ودی بِہ بیت۔۔۔۔۔من چو سائجی ءِ تلاریں بالاد ءَ آئی ءِ دیم ءَ میلانک بَہ آں۔۔۔۔۔۔بلے پد نہ کِنز آں۔۔۔۔۔۔۔
مرچی آئی ءَ گوں وتی کُتگیں کَول ءَ وپا ءِ سرّیچیں تاس تِنگ اِت ءُ وت ءَ چو تیھریں ھسارے ءَ چیدگ کُت ، پہ بلوچ راج ءِ نوگُلیں ورنایاں مُدیمی ئیں سبکّے کہ ھر ساھت ءُ دمان گیر آرگ بیت۔۔۔۔۔۔
