اولی بَھر
چاردھی ماہ جوھان اَت ءُ سارتی ءَ ھر دْمک پیڑاتگ اَت ، ھیالانی اِستال باتِن ءِ آزمان ءَ جڑکوکیں ماہ ءِ کش ءَ ھزاراں جُستانی دامُن ءَ پہ پَسّوھانی گُوشدارگ ءَ ھُدوکناک اِت اَنت . من گوں وتی بے موہیں دِل ءَ جیڑگانی زِر ءَ اُوژناگ ءُ زھیرانی دست ءَ لاچار اِت آں کہ چے بِہ کن آں ۔
شپ نھنگام ءِ ساھگ ءَ جُنزان اَت ۔ من گوں وت ءَ گیروشگ کہ واب بِہ کپ آں ، ناگھاں الگشگے بوت ءُ من پچلرزّت آں۔۔۔۔۔۔
ھما دمان ءَ گِس ءِ تھتگانی ژامبلینگ بُنگیج بوت کہ “دروازہ کھولو۔۔۔۔۔۔۔۔۔دروازہ کھولو۔۔۔۔۔۔۔۔۔
من گوں اجکّا ءُ ھیرانگی ءَ اُوشتوک اِت آں کہ دُژمان ءُ زاھانی دْرد ءَ ، دْردگ بِندات کُت ۔
من پہ تُرس لرز گْوشت شُما کَے اِت۔۔۔۔۔۔۔۔۔۔۔۔۔۔۔؟
اے شپ ءِ نیم ءَ پہ گریبی دَر ءَ چونیں کارے شُمارا کپتگ۔۔۔۔۔۔۔۔۔۔۔۔۔۔؟
چاراں تھتگانی ژامبلینگ ءُ لَگت جَنَگ گوں تْرندی ءَ بُنگیج بوت ۔ زاہ ءُ دُژماناں من ءَ کَرّ کُت ءُ دومی نیمگ ءَ منی پیریں مات ءُ کسانیں گْوھار نازی ءِ گِریوگانی توار اَت کہ من ءَ گنوکیاں زُرت۔۔۔۔۔۔۔۔
ھمے مْیان ءَ پد ءَ آواز اتک ، اگاں دروازگ ءَ پَچ نہ کن ئے تئی پیریں مات ءُ کسانیں گْوھار ءَ ھُوشگ چوپ کن اِیں ۔ گوں اے ھبراں من پہ بے سمائی گِس ءِ دروازگ بُتک چاراں تُپنگیاں منی پیریں مات گوں اُردُلیں گْوھار ءَ سردی ءِ سر ءَ اُوشتارینتگ ءُ دست گوں شار ءَ بستگ اَنت۔
دروازگ ءِ پَچ بُوَگ ءَ ھوار من تْرانج بست پہ مات ءُ اُردُلیں گْوھار ءَ کہ تُپنگیاں من ءَ گوں کُنداکاں مان بَست۔
من گوں چیھال ءُ چیھانٹاں گْوشت ، مئے گناہ ءُ میار چی اِنت کہ شپ ءِ بے وھد ءَ مارا مئے جند ءِ ڈُرِتگیں بان ءَ چو بَزّگ ءُ لاچار کُتگ۔۔۔۔۔۔۔۔۔۔۔۔۔۔۔؟
چَرایشاں دو ءَ من ءَ گِپتگ اَت ءُ دگہ بازینے ءَ مئے گِس چاریں نیمگاں انگیر کُتگ اِت اَنت۔ یکّے ءَ گوں پد ءَ زاہ ءُ دُژماناں ھمے گْوشت ، ترا زِندان ءَ بَر اِیں سما کپ اِیت کہ تو چے کُتگ ءُ چے کنگ ءَ ئے۔۔۔۔۔۔۔۔۔۔۔۔۔۔؟
نابود ، گوں نابودیں کاراں۔۔۔۔۔۔۔۔۔۔۔۔۔۔
گوں اے گپّ ءِ اِش کنگ ءَ ھوار مات ءُ بزّگیں گْوھار ءَ زار جت ءُ گْوشت ، منی بْرات ءَ چے کُتگ زان ءَ شُما زِندان ءَ بر اِت ئے۔۔۔۔۔۔۔۔۔۔۔۔۔۔؟
چرئے تُپنگیاں گوں لھتے کُنداکاں منی پیریں مات ءُ بزّگیں گْوھار یکبرے پد ءَ دیم پہ دیم کُت اَنت کہ منا اُپّار نہ شُت ءُ دست بستگ اِت آں۔۔۔۔۔۔۔۔۔۔۔۔، بلے کوکار کُت ءُ گْوشت ،
مئے گناہ چی اِنت کہ شُما چو جِناور ءَ مارا لٹّ چوپ کنگ ءَ اِت۔۔۔۔۔۔۔؟
یکّے ءَ پد ءَ زاہ دات ءُ دومی ءَ سْیاھیں پُچّ ئِے منی چمّاں مانپُوشت ءُ گِرّان کُت۔۔۔۔۔۔۔۔
مات ءُ بزّگیں گْوھار گِریوگ ءُ زار جَنَگ ءَ اِت اَنت کہ منا گاڑی ءِ تہ ءَ چگل اِش دات ءُ رھادگ بوت اَنت۔۔۔۔۔۔۔۔۔۔۔۔۔۔۔۔۔۔۔۔۔۔، بلے منی گُوشاں ، ایڈسکگّانی توار اَنگت پیداک اَت۔۔۔۔۔۔۔۔۔۔۔۔۔
چہ کلاکے ءُ دو کلاک ءَ رَند گاڑیاں داشت ءُ منا پد ءَ زمین ءَ چگل دَیَگ بوت ۔ دو ءَ لھتیں کُنداک جت ءُ گِرّان کُت ماں کُوٹی یے ءَ دور دات ءُ دروازگ بند کُت ۔ دست ءُ چم بستگ اِتاں۔۔۔۔۔۔۔۔۔۔۔۔۔۔۔، پمیشکا سما نہ کپت چون ءُ چتوریں جاگھے۔۔۔۔۔۔۔۔۔۔۔۔۔
بس ھمے سما کپت کہ بام ءَ داتگ ءُ چہ دریگ ءِ شَماں روچ ءِ بْرانز سر کشّان اَنت۔۔۔۔۔۔۔۔۔۔۔۔،
بلے! مات ءُ بیچارگیں گْوھار نازی ءِ ایڈسکگّانی توار انگت گُوشاں ٹِلّینگگ ءَ اِت اَنت۔۔۔۔۔۔۔۔۔۔۔۔۔
ھمے ھیال ءُ جیڑگانی تہ ءَ گار اِتاں کہ بیچارگیں مات ءُ گْوھار ءِ چے ھال بیت کہ گِس ءَ دِگہ کس نیست۔۔۔۔۔۔۔۔۔۔۔۔۔۔، پت اگاں زندگ بوت اِیں۔۔۔۔۔۔من اے گم نہ کُت۔
چاراں جیڑگانی سر نہ سِستگ اَت کہ تھتگاں پد ءَ الھان کُت ءُ دَر پَچ بوت۔ در ءِ پَچ بُوَگ ءَ ھوار لَگت ءُ تُپنگی کُنداکاں من ءَ وتی
گْور امبازاں زُرت ۔ من ھما بے وس ءُ زلمان بید ء گِریوگ ءُ پِریات ءَ دست دِگہ ھِچّ ءَ نہ رست۔۔۔۔۔۔۔۔
چرئے جنوکاں یکّے ءَ بس کُت ءُ گوں دومی ءَ ھمے سوڑگ کُت ، اِیشر ءَ بس اِنت نوں اِیشگی مات ءُ گْوھار ءِ باری اِنت۔ گوں اے ھبر ءِ اِش کنگ ءَ منی جان ءِ ھاٹیگ دَر کپت ءُ من چہ ھوش ءَ بے ھوش بیتّ آں۔۔۔۔۔۔۔۔۔
نہ زان آں چینچو کلاک ءُ ادار گْوستگ اَت۔۔۔۔۔۔۔۔۔۔۔، وھدے بود کُت چاراں یکّے شاکارگ ءَ اِنت۔ گوں منی بود کنگ ءَ ھوار کُنداکاں پد ءَ بگلگیر کُت۔۔۔۔۔۔۔۔
من گوں بے وسی ءَ گْوشت۔۔۔۔۔۔۔، مئے گناہ چی اِنت کہ من ءَ ، منی مات ءُ گْوھار زِندانی کُتگ اَنت۔۔۔۔۔۔۔؟
ھمے جُست ءَ پد گوں لگت ءُ بوٹاں منی جان پد ءَ ریدگ کنگ بوت کہ یکّے ءَ پہ دُژمان گْوشت۔۔۔۔۔۔۔۔۔۔، ساھب کَیت تو وت زان ئے کہ ما چے کُتگ ءُ چے کنگ ءَ اِیں۔۔۔۔۔۔۔۔۔۔؟
من ءَ اُوپار نہ شُت ءُ من پد ءَ گْوشت ،
ھُدا ءِ بندگاں۔۔۔۔۔۔۔!!
ما چے کُتگ۔۔۔۔۔۔۔۔۔۔، ءُ چے کنگ ءَ اِیں۔۔۔۔۔۔۔۔۔؟
برو وتی ساھب ءَ بِہ گْوش بِیا۔۔۔۔۔۔۔۔۔۔۔۔۔۔
گوں اے ھبراں لٹّ ءُ کُٹّ کمّی ءِ بدل ءَ گیش ءُ تھارگ ءَ ایر دات۔۔۔۔۔۔۔۔۔۔۔۔،
من پد ءَ ماں کُنجے ءَ چگل دَیَگ بوت آں کہ تُنّ ءَ سک بے وار کُتگ اَت۔ من گوں بستگیں چمّاں پہ بے وسی گْوشت۔۔۔۔۔۔۔۔۔۔، من تُنّیگاں من ءَ کمّیں آپ بِہ دئے اِت ۔ چاراں آپ ءِ بدل ءَ یکبرے پد ءَ تُپنگی کُنداکاں چو بشّی جُڑ ءَ شلگ بِندات کُت ءُ دومی نیمگ ءَ بے ننگّیں زاہ ءُ دُژمانانی نپت ءُ بیراں۔۔۔۔۔۔۔۔۔
چہ لٹّ ءُ کُٹ کنگ ءَ پد من ءَ کہ آپ دَیَگ بوت ، آپ ،آپ نہ اِت آں۔۔۔۔۔۔۔
بلے وائے بے وسی!
منی چم ساری ءَ بندوک اِت اَنت ءُ من دِل ڈڈّ کُت گوں بوچّاں آپ تِنگ اِت آں ، بلے منی ھیال تانسر ءَ مات ءُ نازی ءِ نیمگ ءَ اَت کہ اے ناشرانی دست ءَ بیت چوشیں کارے بِہ کن اَنت۔ چی ءَ کہ زرینہ گوں تِپلّیں زھگ ءَ۔۔۔۔۔۔۔۔۔۔، ھنیپہ گوں وتی زھگاں۔۔۔۔۔۔۔۔۔۔۔۔۔۔۔۔، چہ مشکے ءَ مات نورملِک گوں وتی نیاڑی ئیں جَنِکّاں۔۔۔۔۔۔۔۔۔۔۔۔۔۔۔۔۔، دِگہ ھزاراں بلوچ زھگ ءُ زالبُول اِیشاں چِست کُتگ ءُ زِندانی کُتگ اَت ، گُڑا منی بزگّیں مات ءُ گوھار ءِ چے بسات۔۔۔۔۔۔۔۔۔۔
اے ھیال ءَ کہ من ءَ چو زامُر ءَ پتاآن کُت ، گُڑا تُپنگیانی لٹّ ءُ کُٹّاں گیش ھمے گم من ءَ باتِن ءَ وران اَت ءُ زِندگ بُوَگ ءِ ھاٹیگ وت ءَ پیچّان اَت۔۔۔۔۔۔۔۔۔
