![](http://dailysangar.online/wp-content/uploads/2022/06/Zakir-Majeed-Baloch-final-copy.jpg)
اِنسانی راجدپتر ءِ تاکدیماں بے مُول ءُ مُرادیں زِندمان زِندے گْوشگ نہ بیت داں جْوانیں مکسد ءُ پنت چکاریں لیکّھے ءِ واھُند مہ بَہ ئے، چی ءَ کہ مرگ ءَ پد زندگ بُوَگ چہ ھر بالاد ءِ سِکت ءُ واک ءَ در اِنت۔۔۔۔۔۔۔۔، بلے بلوچ چاگِرد ءَ لھتیں انچیں سر ودی کُتگ کہ مرگ ءَ بِل آ بلکیں زِندگی ءَ ھرگور ءَ نامان ءُ نامدار اَنت۔۔۔۔۔۔۔۔، چہ ھمے سراں یکّے زِندانی ئیں زاکر مجید اِنت کہ سینزدہ سال اِنت زِندان ءِ تھاریں کُوٹِی ءِ ھون دونتگیں دِیوال ءِ نِوان ءَ نِشتگ ءُ گوں جبین ءِ لھڑیں جوش ءُ پاھار، درد ءُ دور، زُورانسری ءِ داستان ءُ آجوئی ءِ زیبائیں نام ءُ چکنکاریں نِدارگ ءَ ھستمان ءِ ساھگ ءَ پہ آیوکیں پدریچ ءَ نبیسّگ ءُ کشّگ ءَ اِنت۔۔۔۔۔۔۔۔۔
ھما واب کہ زاکر جان ءَ وتی اُورتچار ءُ دُورگِندیں نِگاھاں دیستگ اَت، ھما واب ءِ مانا کنگ ءَ زِندان ءِ تاموریں دْروشم ءَ گوں وتی جان ءِ آزگیں زیم ءُ تْراولاں رجگ ءُ گوناپ دَیَگ ءَ مُلمہ اِنت، پمشکا مرچی زاکر جان بلوچ راج ءِ ورناھانی دِلپسُندیں بامرد اِنت کہ آئی دیمونی ءِ کِسّہ روچ پہ روچ وت ءَ نبیسّگ ءَ اِنت ءُ نوکیں درونے شکساھگ ءَ اِنت۔۔۔۔۔۔۔۔۔۔۔
چی ءَ کہ مرچیگیں وانِندگ ءُ بلوچ راج ءِ کُنگُریں ورناہ ھمائی ءَ وتی رھشُون لیک اَنت کہ آ پہ دیمونی دَیَگ ءَ چاڑِکّہ ءُ وت ءَ راج ءِ ھزمتکار گْوش اَنت ءُ پیشدار اَنت۔۔۔۔۔۔۔۔۔
اے درگت ءَ زاکر جان ءِ زِندان ءِ درد سرّیچیں داستان اے ھما داستان اِنت کہ بلوچ راج ءِ دِل ءِ دِریکگانی توار جوڑ بوتگ ءُ ھمے ڈسّگ ءَ اِنت کہ تو وت ءَ جھان ءِ گْوستانک ءَ پہ مُجّتی ابدمان ءُ زِندگ گِندگ لوٹ ئے گُرا چہ دیمونی ءِ دِیدانک ءَ گامے پدکِنز مبو، چی ءَ کہ پدکِنزوکیں راج ءِ جھان ءِ راجدپتر ھست کدی نی مان اَنت۔۔۔۔۔۔۔۔۔، مرچی اے راج کہ راجے ءِ نام ءَ سھرا بَہ اَنت اِیشانی پُژدر ءَ دیمونی داستانے ھمگرنچ اِنت کہ اِیشاں پہ وتی ھستمان ءَ دیمونی داتگ ءُ اے پدیانک ءَ سر اَنت اگاں نا مرچی باریں وھد کُجام تند، دنز ءُ مُجانی تہ ءَ بیگواہ اِتاں۔۔۔۔پہ درور ریڈ انڈین۔۔۔۔۔۔۔۔۔
پمشکا مرچی مارا زاکرجان ءُ اے دِگہ زِندانی ئیں بلوچ پُسّگانی ھما گْوانک دائم ءَ گونجَنگ ءَ اِنت کہ زِندگ بُوَگ ءِ واستا ھژدری اِنت کہ وت ءَ پہ دیمونی دَیَگ ءِ واستا ساجو ءُ جاڑی بِہ کن، اگاں نا پہ ترا آتارگیں آکبت کدی نہ دْرپش اِیت کہ تو چہ آئی ءِ جلشکاں وتی راجی زِندمان ءَ گوناپ بِہ دئے ءُ یک راجے ءِ بِستار ءَ گیدی ءِ دِلبند ءَ ابدمان بِہ بَہ ئے۔۔۔۔۔۔۔
گُڑا ما واھگانی کُجام لد ءُ کھچراں وت ءَ پُولگ ءَ اِیں کہ مئے ھستمان ءِ رنگانی آپشار آجوئی ءِ نور بِہ شنز اِیت ءُ ما تِلاھیں زِندمانے ءِ ھُدابُند، اِیمن ءُ وژھالیں سرڈگارے ءِ وتواجہ بِہ بَہ اِیں۔۔۔۔۔۔۔۔۔۔
مرچی ما شُما کُل چہ زُوراک ءِ اے ھبر ءَ آشنا ءُ سرپد اِیں کہ آ گوں ھمے واھگاں واب گِندگ ءَ اِنت کہ من بلوچ راج ءَ آئی جِند ءِ گُلزمین ءِ سر ءَ ھما جاہ ءُ پدیانک ءَ سر بِہ کناں کہ آ سر چِست کنگ ءِ توان ءُ ھاٹیگ مدار اِیت ءُ چہ ھر وشی ءَ زِبھر بِہ بیت۔۔۔۔۔۔۔۔۔۔۔، بلے ما کُجام دِیدانک ءِ ھُدابُند اِیں کہ مئے شھیداں ھما دِیدانک ءِ پانپاہی ءَ وتی سر بائینتگ اَنت ءُ زِندانی پُسّگ تھاریں کُوٹِی ءِ نِوان ءَ رُژن ءِ پُولگ ءَ بندی ءُ ھزار گونگیں سکّیانی دیمپان۔۔۔۔۔۔۔۔۔۔۔۔
گُڑا اے مئے راجی ڈُبّہ ءُ زِمہ واری بیت کہ ما وتی شھید ءُ زِندانی ئیں پُسّگانی ھما دیستگیں واب ءِ مانا کنگ ءَ ھر وڑیں دیمونی ءِ دَیَگ ءَ چک ءُ پد مہ بَہ اِیں کہ آیاں وتی بے مُلْیں سر ببا داتگ اَنت ءُ زِندان ءِ اندر ءَ تھاری ءِ دامُن چاک داتگ ءُ گوں درد ءُ دور، گوں وتی آسشانیں اُپّارگاں آجوئی ءِ چکنکاریں نِدارگ ءَ کشّگ ءَ اَنت۔۔۔۔۔۔۔۔
چوش کہ ما چہ اے ھبر ءَ کدی شمشکار مہ بَہ اِیں کہ دیمونی ءِ داستان ءِ وانگ راستے کہ وانگیانی تہ ءَ پہ وانگ ءَ سک زیبا ءُ شیرکِن اِنت، بلے وھدے ما وت گوں ھما داستان ءِ نبیسّگ ءَ دیم پہ دیم بَہ اِٰن گُڑا نوں زان اِیں کہ دیمونی چی یے۔۔۔۔۔۔۔۔۔۔؟
اگاں ما چہ اے ھبر ءَ گوں دِلپھکی ءَ سوھو ءُ سرپد بوت اِیں کہ اے دیمونی داستان ءَ کہ ما وانگ ءَ اِیں، اِیشی ءِ نبیسّگ ءَ گوھریں سراں وتی زِندمان ءِ ادارُکی ئیں روچ کُربان کُرتگ اَنت، ءُ مارا ما ھم ھمے داب ءَ وتی ادارُکی زِند ءِ چاریں روچ ھمے داب ءَ کُربان کنگی اَنت، گُڑا شھیدانی دیستگیں واب ءِ مانا چو دِرین ءَ بُج اِیت ءُ رنگانی شار ءَ تاپ ءَ دنت۔۔۔۔۔۔۔، گُڑا نوں زِندانی ئیں پُسّگانی درد چکاریں دیمونی ءِ داستان وتی رودپتر ءِ تاکاں پرّیچان کنت ءُ مارا اے زانت ءُ زانگ ءَ شکسا اِیت کہ دیمونی چی یے۔۔۔۔۔۔۔۔۔۔۔؟
پمشکا! مارا گوں زاکر جان ءَ ھوار کُل زِندانی ئیں سر یات کنگ ءُ گیر آرگی اَنت کہ آ زِندان ءِ تھاریں کُوٹِی ءَ گوں رستر ءِ کُجام زُلم ءُ زُوراکیاں دیم پہ دیم پہ کَے ءَ ۔۔۔۔۔۔۔؟، اگاں ما چہ اے ھبر ءَ سرپد ءُ آشنائیں گُڑا وت ءَ چہ اے جُست بِہ کن اِیں کہ ما گوں راجی جُنز ءَ چینچو اِیماندار اِیں۔۔۔۔۔۔؟، ما پہ راجی جُنز ءِ پلگارگ ءَ کُجام گزا جتگ ءُ یا جَنَگ ءَ اِیں۔۔۔۔۔۔؟، وھدے اے جُستانی پسّو چہ مئے باتِن ءَ درکپت ءُ زُبان ءَ ھور دیمونی دَیَگ ءِ پِڑ ءَ سر بوت، گُڑا ما پہ سِتک وتی گْواچن ءُ مادنیں دگ شوھاز اِتگ ءُ مارا دیم پہ مِنزل ءِ پاند ءَ جُنزگی اِنت، چی ءَ کہ تو جُنز ئے گُڑا تئی گٹّ ءُ گریں پند ءِ مشکل ارزان ءُ جلجاہ نزّیک بیت۔۔۔۔۔۔، اگاں نا تھنا پہ نِندگ ءُ چاچ ءِ جَنَگ ءُ ڈیل دَیَگ ءَ ما وتی شھیدانی دیستگیں واب ءَ کدی مانا کُت نہ کن اِیں، ناکہ زِندانی ئیں بلوچ پُسّگانی آچشیں درداں درمان۔۔۔۔۔۔۔۔۔۔۔، گُڑا ما بِہ زان اِیں کہ وھد ءِ لوٹ ءُ گزر چہ مارا کُجام لوٹ ءَ کنگ ءَ اِنت۔۔۔۔۔۔ءُ مارا یک بلوچ پُسّگے ءِ بِستار ءَ پہ ماتیں گُلزمین ءِ موکگ ءَ جُھد ء آجوئی ءِ پِڑ ءَ کُجام کِردار پیلو کنگی اِنت۔۔۔۔۔۔۔۔۔۔، داں ما گوں اَمَلی گامگیجاں جُھد ءِ پِڑ ءَ اِیر نہ کپتگ اِیں اے جُست مارا باتِن ءَ چو رمیز ءَ وران کنت ءُ سْرپتگیں پُلّانی وشبو۔۔۔۔۔۔۔۔۔۔زِندان ءِ تھاریں کُوٹی ءِ آس مال اِتگیں بالادانی گْوانک۔۔۔۔۔جنوزامیں کاڑانی سْیاھیں گُشان۔۔۔۔۔۔۔۔چورھیں زھگانی چیھال۔۔۔۔۔۔۔۔تپتگیں ھاک ءِ انگریں ھیسکار۔۔۔۔چو جُستے ءَ مان اِیت ءُ ما چہ اے گیدی ءَ دمکاں دیم پہ مُجّتی ئیں تھاری ءِ پاند ءَ سپر کن اِیں۔۔۔۔۔۔۔، پمشکا گُڈّی ءَ گْوش آں کہ تو اگاں زِندگ بُوَگ لوٹ ئے گُڑا اے جُستانی پسّو کنگ ءَ چاڑِکّہ بو، اگاں نا آکبت وت، وت ءَ کدی نہ سینگار اِیت۔۔۔۔۔۔۔۔