شاری شھیدانی سروک
راج ءِ منی آگاہ کنوک
پہ ھَکّ ءُ انساپ ءَ مِروک
نپت گونگیں بْرمش ءَ بلوک
آجوئی ءِ زند ءَ ھُدوک
زندگ نمیران ئے مُدام
ماں تنگویں راجی سْرپاں
تاں اے جھان ءُ آ جھان
راجی منی زند ءِ نشان
لُمّہ کریما ءِ گُمان
آزمان ءُ ماہ ءُ کَلکشان
دْرپش ئے تھار ماھیں شپاں
مئے ھلک ءُ دوار ءُ میتگاں
میاں اُستمانی ھلکواں
آشوب ءِ دِنگیں سرمچار
پھر کن اَنت بْرات ءُ گْوھار
شِیر اِت پَھِل بات مادر ءِ
جھد ءُ جَپا تئی بابُل ءِ
تو بانڑی تو مریم ئے
مھناز ءُ لیلا ھالد ئے
دپتر پد ءَ نوکاز کُتگ
پگرے دگہ شوھاز کُتگ
مَرگ پہ گَلے امباز کُتگ
آشوب ءِ گُلبانگ ساز کُتگ
راستی مروچی زندگ اِنت
دْروگ بے وس ءُ شرمندگ اِنت
جُنز ءِ گَلَگ رُمبان کنت
دیم پہ مُراد ءِ منزل ءَ
ھر نیمگ ءَ جُنزان کنت
تئی پاکیں ھونانی رگام
مئے کوچگاں شنزان کنت
سبز اِیت آشوب ءِ نھال
لشکر تئی رمبان کنت
چوڑیگ دست ءِ پْروشتگ اَنت
موردانگ ماری لنکُکاں
کَید ءُ جَوَکّ ءُ باھوبند
ژلّیں سلاہ دست ءَ کُتگ
راج سرجمیں سوگہ کُتگ
بازین کیت تئی رندپد ءَ
توکل بہ دنت مارا ھُدا
