شپ اِنت بھار ءِ آجوئیں بام
اے روچ ءِ برانزانی زندگی اِنت
تھار اندیمیں ساھتاناں
زمین ءِ وھمانی گون اَنت ارمان
ءُ سھب بال اَنت دلاں پہ زیمر
پہ روچ ءِ برانزانی آجوئی ءَ
ھمُک رُژنا تھارمرگیں شپانی چماں
چہ وھد ءِ داناک ءَ زندگی یے زیان داتگ
پہ ھون زنداپ، چراگ ءِ اسرار بلیتگ اَنت
تھاریانی مست ءُ گروناکیں چمّ ء کلّ ءَ
کورمیمی ءِ دید ءَ چہ اجگیں زند ءِ
وژبواں گوں شُتگ اَنت پہ ابد رُژنائی ءِ ھیال
شپچراگ ءِ دل ایمنی ءِ بہ شھم ایت سوتاں
دیرمان ءِ گنوکیں ڈیوا ءِ آس ءِ زیمر
ایمنی ءِ مُجتی ئیں سھار ءِ لولیاں
چراگ پھازاناں دنت ءُ نازین ایت
ھون ءُ ھِنّی ءِ نوک ارمان ءِ دل کُجام اِنت؟
بام پیوندیں رُژنائی؟
داں سھب بَلوکیں چراگ ءِ امروز؟
کِشک شناسیں مساپرانی یاگی ئیں گم؟
ھیال پھمیں شپانکے ءَ پہ ماھِکان ءِ بے کِماری؟
پیرمرد ءِ پِیڈّیں پگرانی سرانوئیں دل؟
اِے بام زند ءِ دل کُجام اِنت
سھار ءِ پیریں روچ ءِ ارواہ
کجام بروت شنز ءِ تہ ءَ ودی بیت
کدی پہ بام ءَ سھار مان اِیت
کد اے کشکانی اُزر ھَل اَنت
کے اِنت کہ مساپرانی زگریں نشاناں پوہ بیت
کہ روچ ءِ برانزانی آجوئی ءَ
داں ھوش مان اِیت جنزگ ءَ اَنت
شپ اِنت کہ روکپت ءِ دادے پہ روچ!
منی زمین ءِ ھمک نوکبروتیں رُژن پھاز ایمنی ءِ سوت ءَ
زمانگ ءِ کبر ءِ سرونّ ءَ کَیت، کنت الھان
پہ روچ ءِ برانزاں سکین بال اِیت
٭٭٭
