آزمانک
اُوستیگیں چم واجہ ءِ در ءَ سک ءُ دست پہ لوٹگ ءَ ھُدوکی اِت اِنت ، بلے واجہ ءِ وتی تب اَت کہ چے شکسا اِیت ۔ چُنڈے نگن ، چنکے آرت ءُ شکر، آنہ ءُ چم سُھرے ، یا بے ننگیں زاہ ءُ بد۔۔۔۔۔۔۔۔ ھرروچ اے بدّیں جاورانی دیمپانی ءَ دِل ریدگ اَت ءُ چمّانی ارس ءِ کانیگ ھُشک ءُ کلنڈ ، چی ءَ کہ واجہ ءِ گْور ءَ ابید ء چمداری ءَ دِگہ ھبر ءُ دانکے ءِ گْوشگ وتی سر ءِ سِندگ اَت۔
بیگاھے جمبراں بستگ اَت ءُ سارتی چہ وتی ڈوبر ءَ ڈنّ درکپان اَت کہ بے تاگتیں دِل ءَ بے سوبیں ارمانے ءَ چوڑ کشّ اِت ، من گوں اے بے سوبیں ارمان ءَ سک نگیگ بوت آں کہ اے ارمان ءِ پیلو بُوَگ ءَ چہ ساری پہ مرگ ءِ امبازگ ءَ ساڑی بُوَگی اِنت۔ چی ءَ کہ منی چمّانی دیم ءَ واجہ ءِ گپّانی بگیر ءَ بازیں کاردارے ھونواریں ملکموت ءِ دپار بوتگ ءُ کس ءَ چِڑکّہ نہ کُتگ ، من ءَ اُوں ھمے ساھار ءَ گْور جتگ اَت ءُ دومی نیزگاری ءِ تبدیں لِوار تْرند تْرند ءَ کشّگ ءَ اَت ، پمیشکا منی گیمرتگیں ھاٹیگ ءَ جاپ داتگ اَت ءُ زُبان لِلّ اَت۔
یکروچے من وتی بے دون ءُ کُدام بستگیں کُلّ ءِ تہ ءَ نشتگ اِت آں کہ وانگ ءِ زپتیں مولماں زُرت ، گُڑا من تیمیچ کُت پہ کلنڈیں پیتی ءِ نیمگ ءَ دانکہ وانگی یے بِہ وان آں بے اشکامیں زِرد تاھِیر بِہ گیت ءُ گاریں مُساپِر پہ وت درے بِہ شُھاز اِیت۔ وھدے من چہ ھاکاں سر ءُ چیریں پیتی ءِ بوجگ ءَ گاریں کِلیِتانی پولگ بِنا کُت ، چاراں کِلیِت گار اَنت۔
چہ بازیں پٹّ ءُ ھنڈ ءَ پد برونک ءِ چیر ءَ کپتگیں کِلیِت دز کپت اَنت ءُ کلنڈیں پیتی بُتک، چہ بوجگ ءَ رند من ءَ دو وانگی دز کپت ءُ آ دِگہ وانگی دو پادیں تُولگے ءَ وارتگ اِت اَنت یا دِگہ رسترے ءَ زانگ نہ بوت، چی ءَ کہ وانگ ءُ وانگیانی سر ءَ واجہ ءَ پابندی جتگ اَت ، پمیشکا کسے ءَ پہ وانگ ءُ وانگیاں ھُبّ ءُ واھگے نہ داشت کہ تاموریں شھر رُوژنا بِہ بیت ءُ ساھار ءِ وتگڑیں ھاکمی پہ مُدامی گُٹگِیر۔۔۔۔۔۔۔۔۔۔
من گوں بے تاھِیریں دِل ءَ کہ وھدے وانگی ءِ وانگ بِندات کُت ، تہ انچو سما بوت کہ من وت ءَ دیریں رستریں بنی آدمانی جنگل ءَ بیگواہ کُرتگ۔ چہ اے رسترانی جنگل ءَ وت ءَ چون پول آں ، ھمے ھیال مجگ ءِ رگ ءُ بنداں سوھان کنگ ءَ نہ اَت۔ زِندمان گوں نیزگاری ءِ تبدیں لِوار ءَ دیم پہ دیم ءُ چو گاریں مُساپِر ءَ بے مِنزلیں دگ ءَ رھادگ اَت کہ واجہ ءِ پرمان ءَ منی ھیالانی واگ سِست ءُ من ءَ جیڑگانی انگریں کُورُم ءَ چگل دات۔۔۔۔۔۔۔۔۔
اے ساھت ءَ تھنا من ءُ منی کولنجیں ھیال ، پاؤلو کوئیلو ءِ گِدار ” گُناہ ” ءِ پنچُمی تاکدیم اَت چہ وت ءَ در دُور پہ ھُشکاوگیں گیابانے ءَ جیڑگ ءَ اِت آں، بلے زِند ءِ مَھری شِلنگ اَت ءُ گامانی دیم ءِ گامینگ ءَ جوابے داتگ اَت۔
گُڑا من ءَ انچو سما بوت کہ پاؤلو کوئیلو ءِ اے پنچُمی تاکدیم ءِ نبشتگیں لبز منیگ اَنت۔ ” ھر سُھب من وتی چمّاں گوں نام گِپتیں ” نوکیں روچ ” ءَ پچ کن آں تہ ھمے گمان ءُ مارِشت بیت کہ من اِیشاں پد ءَ بند بِہ کن آں ، گندلانی سر ءَ بِہ کپ آں ءُ پاد میا آں ، بلے من چوش کُرت نہ کُت “۔ ءُ دومی منی جبین ءَ اے ھبر ءَ چہ بُندر ءَ جاہ کُتگ اَت کہ وت ءَ کدی زوال مہ کن ، بلکیں توارے جکسّین ءُ سپر بِہ کن دانکہ باندا بے مِنزلیں دگ ءَ گاریں مُساپِر پہ وتی پُولگ ءَ سربتگ مہ بَہ اَنت۔۔۔۔۔۔
من کہ واجہ ءِ پرمان ءَ پد وت ءَ دربار ءَ سر کُرت ، چاراں لھتیں ھون میچلیں جون کپتگ ءُ پرّ پرّکوی شانگ ءَ اَنت ، من ءَ چہ باتِن ءَ بے سمائیں ھاٹیگ ءَ سُرک جت ءُ سوھو کُت کہ بِہ گندئے نُوں تئی بارِیگ اِنت ، بلے من دِل ءَ جزم اِت آں کہ من وَ ھِچّی نہ کُرتگ۔
ھو! واجہ ءِ میتگ ءَ وانگی ءِ وانگ وتی زِند ءَ مرگ ءِ دپ ءَ چگل دَیَگ اَت، پمیشکا واجہ ءِ چمّاں من اُوں گُناھکارے اِت آں۔۔۔۔۔۔۔
من کہ واجہ ءِ در ءَ سر بوت آں ، چہ منی دْروت ءَ پیسر واجہ ءِ تیرکمانیں جلّاد ءَ گْوانک پِر کُت ءُ گْوشت: ھاں مُراد! تو بزاں چیروکائی وانگی وان ئے ءُ مھلوک ءَ واجہ ءِ بگیر ءَ پاد کن ئے ، چو نزانتگ کہ مئے چارِیگاں تئی ھر گامانی ھِساب داشتگ۔ نُوں تئی توار پہ مُجّتی اِیرموش ءُ گُٹگِیر کنگ بیت۔۔۔۔۔۔
من ادارُکے ءِ ھاموشی ءُ بے تواری ءَ پد پسّو دات ءُ گْوشت: ھو واجہ! تو گوں وتی تیرکمان ءَ من ءَ مرچی الم کُش ئے ، بلے منی توار ءَ کدی اِیرموش ءُ گُٹگِیر کُت نہ کن ئے۔ چی ءَ کہ من چہ مرگ ءَ پد وت یک توارے بَہ آں ، ءُ اے توار ءِ اِیرموش کنگ تئی تیرکمان ءِ وسی گپّے نہ اِنت، نیکہ نیزگاری تبدیں لِوار ءِ اِیرگْوات ءَ پہ مُدامی زُلمانی ساھگ ءَ کُوچنڈ اِیت۔۔۔۔۔۔۔۔۔۔
من ھمیش آں! بِہ کُش من ءَ وت ءَ اِیمن کن ، بلے تئی اِیمنی وابے ءُ منی توار، توارے بیت ءُ ترا ھر شپ چہ واب ءَ گُڑینیت کہ کدی اِیمن نہ بَہ ئے۔۔۔۔۔۔۔۔۔۔
اے گپّ ھلاس نہ اَت کہ تیرکمان ءِ شِل سریں تیر ماں سینگ ءَ پیوست بوت ، گوں گُڈّی ھِکّگ ءَ زُبان ءَ پہ بے سمائی ھمے ھبر پد ءَ درکپت ءُ بے سما بوت آں۔۔۔۔۔۔۔
منی توار ، توارے بیت۔۔۔۔۔۔۔۔۔۔۔
