بلوچی بتلے کہ مرچیگیں بلوچ راج ءِ ھمے وڑیں جاورھالاں گوں دُچار اِنت۔
شُو گْریو اَنت بے شُو ھم گْریونت
بُدُکاں دست ماں سر ءَ اِنت
اے گپ چہ کس ءَ چیر نہ اِنت کہ کساس بلاھیں مُدتے بلوچ ورنا ، کماش، کواس، شائر ءُ راجی جھدکار ءُ بلوچ دوزواہ آوار جنگ بیگ ءَ اَنت۔ گار ءُ بیگواہ کنگ بیگ ءَ اَنت۔ کس نہ زانت کہ زندگ اَنت یا شھید کنگ بیتگ اَنت۔ بلوچ ءِ اگاں دلوتے گار بیتگ بلوچ ءَ ھما دلوت ءِ پد ھم جتگ ءُ شوھاز کُتگ۔ مرچی بلوچانی نوک بروتیں ورنا ، پیرءُ کماش ءُ سالونکیں بچ گار ءُ بیگواہ اَنت۔ ھر کس ءُ نا کس زانت کہ بچانی آوار جنوک کے اَنت۔ اے جست ءَ چہ ھما مات پتاں یا ھما گْوھار کس ءُ وارساں کنگ بہ بیت گُڑا درد ءُ گم زانگ بنت۔ مُلّا بھادر اومرزئی گْوش اِیت
جی ھما ماتانی دل ءَ بات اِنت
کہ بچّ اِش ھندوستان سپاھیگ اَنت
بلے اپسوز کہ بلوچ وتی ماتیں گلزمین ءِ سر ءَ بے وس اِنت۔ بے یار ءُ مددگار اِنت، پریات ءُ زاری کنت۔ کوکار ءُ زھرشانی کنت۔ بلے کسے گوشاں مورے ھم نہ وارت۔ میان استمانی انسانی ھکّانی گل ھم کرّ ءُ کور اَنت۔ کہ آیانی بنکّی کار انسانی ھکّانی پلّامرزی اِنت۔ بلوچ گْوش اِیت
چہ منی بھت ءَ نیک بد گرد اَنت
سور بنت کنڈانی لُڑیں نوکاپ
زھر بنت گواشانی چبٹ وشّیں
نہ زاناں بلوچ ءِ بے بھتی اِنت یا کہ بلوچ ءِ آواز ماں میان استمانی ھلکواں سرکنوک نابود اَنت۔ لاھور ءَ پیشّی یے چات ءَ کپ اِیت گُڑا پاکستانی میڈیا جُنز اِیت ۔ مئے سالونکیں بچ ورناھانی لاش پٹّاں شگالیگ اَنت۔ مئے لاپ گاریں سیاستدان سرکار ءِ نمائندگ ءُ پُچکینیں واکدار چہ سرکار ءِ ترس ءُ بیم ءَ لگور ءُ لپرزگ اَنت کہ بے ترک ءُ توار اَنت۔
کسّھے مشھور اِنت
گْوش اَنت کہ یک ھلکے ءَ یک شپے ککڑے بیگواہ بیت۔ ایدگہ سباہ ءَ ھمے ھلک ءِ کماش ءَ کُلّیں مھلوک وتی گس ءَ داوت دات ءُ ورگ ءُ چرگ ءَ پد کماش ءَ دیم گوں دیوان ءَ کُت ءُ گْوشت۔ مرچی من شمارا پہ کارے ءَ اد ءَ یکجاہ کُتگ۔ تران کنان ءَ گْوشت ئِے کہ دوشی مئے ھلک ءَ کُکڑے بیگواہ بیتگ۔ ککڑ ءِ پد ءَ بہ جن اِت ءُ شوھاز ئِے کن اِت۔ مھلوک ءَ کلاگ گپت ءُ گْوشت کہ مئے سرکماش نی گنوک اِنت پہ ککڑے ءِ ھاتر ءَ اینچو مھلوک ئِے جم کتگ کند اِت ءُ کماش را کلاگ اِش گپت۔
چیزے روچ گْوست پد ءَ ھمے ھلک ءَ پسے گار بیت۔ کماش ءَ پد ءَ ھلک ءِ مردم جم کُت اَنت جست کُت کہ شما کُکڑ ءِ جست ءُ پُرس کُت۔ دگہ چیزے روچ گْوست گوکے بیگواہ بیت۔ پد ءَ ھما پیشی وڑ ءَ کماش ءَ مھلوک یکجاہ کُت پد ءَ ککر ءِ جست کُت۔ بلے پس ءُ گوک ءِ جست نہ کت۔ یک ءُ دو ماہ گوست ھمے ھلک ءِ کسانسالیں جنین زھگے گار بیت۔ سرکماش ءَ مھلوک پد ءَ جم کُت ءُ ککڑ ءِ جست کُت۔ نی مھلوک ءَ گوشت مئے کماش ءِ ھوش نزور اِنت۔ مئے جنین زھگے گار اِنت کماش ککڑ ءِ جست ءَ اِنت۔ نی گڑا مھلوک ءَ ھمت کُت جنین زھگ ءِ شوھازءَ کُلّیں ھلک در کپت ءُ دزّانی شوھاز ءَ یکجاہ بیت اَنت۔ دز اِش گپت اَنت۔ وتی جنین چہ دزّاں رکّینت۔ نی اشاں چار اِت ککڑ ءِ پٹ ءُ نشانی ھست اَنت۔ پس ءِ ھم سرگ ءُ پادگ گندگ بیت اَنت۔ ءُ گوک ءِ ھڈّ ءُ کامپول ھم ھمد ءَ کپتگ اِت اَنت۔ ایدگہ روچ ءَ سرکماش ءَ مھلوک جم کُت ءُ شاباشی دات اَنت کہ دُز شما شوھاز کُتگ اَنت نی سرکماش ءَ گْوشت کہ شما اگاں ھما اولی روچ ءَ ککڑ ءِ دز ھمے وڑ ءَ شوھاز کُتیں رند ءَ انچو کارزوالی نہ بیتگ اَت۔
نی مھلوک ءَ زانت کہ مئے کماش ءِ مول ءُ مُراد چے بیتگ۔ بلے آ کماش زانتکار ءُ گیرتمندیں انسان بیتگ اَنت وتی راج اِش دوست بیتگ۔ وتی راج ءِ پانک اِش جتگ۔
بازار ءِ کماش باران اِنت
سر ماں ڈنگر ءُ داران اِنت
(بلوچی بتل)
سنگتاں !
مرچی بلوچ گوں ھمے وڑیں جاورھالاں دچار اِنت۔ اگاں اے زورگیر ءِ آوار جنگ ءِ امل دارگ مہ بیت دیمتر ءَ اے آوار جنوک مئیگ ءُ شُمئے مات ءُ گْوھاراں ھم آوار جنت ءُ بارت مئے مُرتگیں مارا کبر ءَ چہ لانت کن اَنت۔ ءُ مئے پدریچ مئیگ ءُ شُمئے کبراں ھم لٹ جن اَنت۔ بہ ترس اِت ھما وھد ءَ کہ بلوچ راجدپتر نبشتہ کنگ بہ بیت۔ دپتر نبیس مارا تُک جنت۔ ھر مھلوک وتی اھد ءِ مانزمان اِنت۔ نی آپ چہ سر ءَ گْوستگ۔ ایشی ءَ مارا کشتگ نی بلوچ ءِ ننگ ءُ ناموس ءَ پُلگ لوٹ اِیت۔ بلوچ گْوش اَنت
نامرد پہ نان مر اَنت
مرد پہ نام مر اَنت
وھدے ننگ شُت نان چے درد ءَ وارت۔ نان پہ زر رس اِیت بلے ننگ پہ زر نہ رس اِیت۔
ھدامرزی ئیں سید ھاشمی گْوش اِیت
پشت ءَ نہ کیت پہ من ماڑی ءُ پُر دھلیں زمین
کوہ زر سوچیں برتکگیں بیراں چے کناں
اے دْرچ ءَ بلوچ شیرزالیں مات ءُ گْوھارانی جھد ستا کرز اَنت۔ کہ شپ ءُ روچ جاہ اَنت۔ وتی آوار جتگیں برات ءُ بچّانی شوھازگ ءَ برے پریس کلبانی دیم ءَ نشتگ اَنت برے دْراجیں روانک کشّ اَنت۔ شال ءَ بگر داں اسلاماباد پند اِش جتگ۔ پاد اِش تْرانبل بیتگ اَنت۔ شد ءُ تُنّ ءُ بے وراکی ءِ آماچ بیتگ اَنت۔ سردی ءُ گرمی ءِ پرواہ اِش نہ داشتگ۔ بلے سلام اِنت ھمے مات ءُ گْوھارانی ھمّت ءُ توکل ءَ۔ ھچ وڑیں اڑ ءُ جنجال ایشانی مارشتانی دیم ءَ اڑاند نہ بیتگ۔ اے ھما بلوچ جنین زھگ اَنت کہ ناں روچ ءَ دیستگ اَنت ناں ماہ ءَ۔ بلے وتی راجی زمہ داری اِش پورہ کتگ۔ اشاں ناں شپ اشتگ ناں روچ۔ اسلاماباد ءِ لدیگ دْروشمیں رسترانی دیم ءَ چو کوہ ءَ مک بیتگ اَنت۔ ءُ داں مرچی ایشانی جھد برجاہ اِنت ءُ دژمن ءِ دیم ءَ لگور نہ بیتگ اَنت۔
بلوچ شیرزال بی بی مھناز گْوش اِیت
من ھما انجیراں پتن تاکیں
بُرز ھما کوھانی سر ءَ رُستاں
گیشتر من گٹ ءُ سرشماں بیتاں
سر منی ھچ گْوات ءَ نہ چنڈینتگ
بشّامی ھوراں بِھ نہ ملّینتگ
بید ء شھداد ءِ نوگلیں ریشاں
مرچی مئے مات ءُ گوھاراں بی بی مھناز، بی بی بانڑی، شھید کریمہ مھراب، بی بی گل بی بی بلوچ، بی بی مریم ء شاھو ءُ بانک گنج پری ءِ راجدپتر نوک کتگ۔
مولوی ابدلّا روانبد گْوش اِیت۔
تاں جرس آواز نہ کنت کوچی
مَھری ماں راھاں نہ بنت کَتّار
شانک دنت پوڑے کہ جنوزامے
کدّ ءِ یک بمبے ءَ بہ کنت کوکار
مولوی ساھب گْوش اِیت اگاں جنوزامے دژمن ءِ نیمگ ءَ یک پوڑے دور بدات کد یک بمبے آواز ءَ کنت۔ اد ءَ مولوی ساھب میڈیا ءِ ارزشت ءِ گپ ءَ جنت۔
اے گپ الّمی اِنت مئے اے مات ءُ گْوھارانی اے جھد جوانیں رنگے کار اِیت۔ اے جھد ءِ آسر رژنا اِنت۔ پرچا ھک انساپ راستی زلم ءُ زور دروگ ءِ ماڑی ملّ اِیت
ھدامرزی سید گْوش اِیت
گار باں، توپان باں، بیگواہ باں بلّے سید
اے شگان ءَ جت مہ کنت کسے کہ پُشت ءَ کنز اِتگ
دگہ بلوچ شائرے گْوش اِیت
دیر بیت یا زیت بیت
بلوچ ءِ ھون ءِ جست بیت
سلام کرز اَنت۔ توسیپ کرز اَنت ھما شیرزالیں مات ءُ گْوھار شپ تاں دگّانی سر ءَ گَشتگ ءُ زالم ءُ جابریں سرکار ءِ ھلاپ ءَ وتی زھرشانی ءَ درشان کن اَنت۔ ۔ چوش کہ بانک ھُوران، بانک ھسیبہ کمبرانی، بانک سمّی بلوچ، بانک مھزیب بلوچ، بانک ڈاکٹر مھرنگ بلوچ، بانک نمرہ بلوچ، بانک تیّبہ بلوچ، بانک سیمک بلوچ، بانک مھگنج بلوچ، نسرُلّا بلوچ، راجی کماش ماما کدیر بلوچ ءُ دگہ بازین سر۔ ایشانی بلوچ گیرت ءَ اے دابیں انسان یک روچے راج دپتر ءِ تاکانی رژنائیں استال جوڑ بنت۔ بلوچ ءِ راجی شائر واجہ مبارک کازی گْوش اِیت
اتکگ اَنت گْرانیں نوبت ءُ جنگانی بھار
دیم پہ ماتکوھاں رپتگ اَنت ملّیں سرمچار
گوانک جتگ ڈیھ ءِ مادریں ھاک ءَ بزّگی
جَھ جتگ پیراں بستگ اَنت ورناھاں کتار
ملک بلوچانی پہ ھلو ھالو ءَ نہ روت
مشکتی ھلوایے نہ اِنت رندانی دیار
تاں جھان ھست اِنت نام مئے دھر ءَ ھست بیت
وھد ءِ دلبند ءَ نکش بنت پیشی یادگار
راجدپتر مدام وتی کْوھنی ءَ نوک کنت۔ اے چارگی اِنت کہ تئی راج ءِ بامرد ءُ شیزالاں چے کتگ ءُ مرچی چے کنگ ءَ اَنت۔ اد ءَ کرد سنگ ءُ شاھیم کنگی اَنت۔ بلوچ ءِ زیکیں کرد مئے مرچیگیں راج ءِ آدینک اِنت۔ ءُ مئے مرچیگیں کرد پہ بلوچ راج ءَ بلوچ راج ءِ پدریچاں باندات ءِ آدینک جوڑ بیت۔ بلوچ مرچی جنگ ءَ گپتگ۔ بلوچ جنگ بیگ ءَ اِنت۔ بلوچ بیگواہ کنگ بیگ ءَ اِنت۔ بلوچ مال مڈّی ڈنگاں پُل گل کُتگ۔ بلوچ ءِ دود ءُ دودمان دھر ءِ نرگرزاں لگتمال ءُ پولنگ کُتگ۔
منزور بسمل گْوش اِیت۔
تُنّیگیں دل ءِ ھوشام ءَ کج ءَ
سیہ ڈنّیں جبین ءِ کانجار
تلکار بہ بیتیں کہ شالا
ارسانی اپُرکیں شھماتاں
تپاکی آجوئی ءِ مانزمان اِنت
بلوچستان آجو بات
