من چی نبشتہ کناں …….؟
منی ند ءِ تہ ءَ انچو ھاٹیگ مان نیست کہ من ڈاکٹر منان جان ءِ وڑیں مزن شانیں رھشونے ءِ بابت ءَ نبشتہ بہ کن آں ، آئی راجکاریں بالاد ءِ ستا گوں منی وڑیں نابزانتے ءَ بوت نہ کنت۔ بِہ گندئے آئی راجکاری ءِ کد ءُ بالاد ءَ را مئے وڑیں نبشتہ کارے ءِ اے گالانی ھاجت ھم مہ بیت، ھو مردم ءِ جند ءَ کمو تاھیر رس ایت کہ من وتی راجی رھشُون ءِ پنچُمی سالروچ ءِ دَرگت ءَ وتی کد ءُ بالاد ءِ رِد ءَ ند چست کرت ءُ چار گال ءُ دو دانک نبشتہ ءِ دْروشم ءَ دیم ءَ آؤرت۔۔ـ
شھید ڈاکٹرمنان جان بے دروریں رھشونے اَت،گل ءِ مھکم کنگ ءُ راج ءِ یکجائی ءِ واستا روچ ءُ شپ ئِے نہ زانت ءُ اے ھم نہ زانت ئِے کہ کدی ءُ کُجام جاہ ءَ تر ءُ تاب ءَ بوتگ آں۔۔۔
ڈاکٹر راجی رھشُونی ءِ دراھیں تَک ءُ پھناتاں سرپد اَت، مدام بہ دیستیں آ راجی گل “بلوچ نیشنل موومنٹ ءِ کاراں دست ءُ گُلائیش اَت۔ گپّ ءُ ھبر ءَ آ جتائیں کردے ءِ واھند اَت، مردم شُناسیں رھشونے اَت، گل ءِ باسکانی کارانی تہ ءَ نزوری یے ھچ رنگ ءَ برداشت نہ کرتگ اَت ، شَریں کارستانی درگت ءَ سنگت ءِ دلبڈی دَیَگ، انگت گیش جُھد کنگ ءُ ساڑایگ۔ آئی تَب جُتائیں تبے اَت، اگاں کسے آئی ءِ دیوان ءَ بہ نشتین ءُ مسکرا، ھندگ ءُ وش گپّی مدام آئی دیوانانی بَھر اَت ۔ کسے کہ واجہ ءِ دیوان ءَ نشتگ ، گڑا دل ءَ ئِے پاد آیگ ھچ پیم ءَ نہ لوٹ اِتگ۔۔
ڈاکٹر جان شَرگداری ءِ چیدگ اَت، من گوں باز رھشُوناں ھور نشتگ آں، بَلے شھید ڈاکٹرمنان جان ءِ شَرگداری ءِ تب ءُ سِنچ ءَ شَر سرپد اَت۔ اگاں گپّے کنگی بوتین ئِے دیم پہ دیم کرتگ اَت ئِے، آئی گْوشگ ءَ مردم ءَ را نہ تورینتگ اَت ، پرچا کہ راستی ءِ بُنیاد ءَ گوشتگ ئِے ،شکل ئِے نہ چار اِتگ ءُ ھاتر ئِے نہ کرتگ، کارے چار اتگ اَنت ۔ منی نِزّ ءَ دوھزار یازدہ ءَ ما تنزیمی دوراھے ءَ (گل ءِ تر ءُ تابے ) ءَ ماں جاہ ء آھو شندی ءَ شُت ایں، بی این ایم جاہ ء آھو ھنکین ءِ شندی ءِ بُنزہ ءِ دیوانے اَت۔ تنزیمی کارانی توک ءَ بازیں نزوری دیست ئِے ، ھمے دیوان ءِ مھمان ء ھاس اَت، گُڑا بُنزہ ءِ سنگتاناں گْوشت ئِے آشوب ءُ مسکرائی نہ بیت،ھمراھداری کن اِت، گل ءِ کار ھرچ ھساب ءَ کنگی اَنت،اے ھم گْوشت ئِے کہ شما وتی دلاں بہ چار اِت ءُ جست بہ کن اِت، مرچی پیسلہ بہ کن اِت رند ءِ پَشل بُوَگ ءَ چِہ مرچی شَرّتر اِنت شما انچو بزان اِت ،شما دو دپیں بانے ءَ اِت یک دپے ءَ دَور کرتگ ءُ دومی دپ ءَ دَراھتک کن اِت، ھمے باسکاں دیمتِر ءَ ھمراھداری نہ کرت یک پہ یک تَچان ءُ دراھان بوت ـاَنت۔۔۔
بی این ایم ءِ 2008 ءِکونسل شیشن ءَ گچینکاری ءَ شھید چیئرمین گلام مھمد بلوچ ءِ ھلاپ ءَ اُوشتاتگ ءُ باز سنگت نہ وش بوتگ اَت ءُ ھمے گْوشتگ اِش،تو واجہ ءِ ھلاپ ءَ اُوٹ ءَ مہ اُوشت، گْوشتگ ئِے شما من ءَ اوٹ مہ دے اِت، بَلے من اُوشتاتگ آں۔ من زاناں من کپ آں ، بزاں سوبین نہ باں، باندا آشوبی چُوشیں رویاتے اے مہ ٹھین اَنت کہ رھشونے ءِ دیم ءَ گچینکاری ءَ ھچ کس مہ اُوشت اِیت ءُ اے پِڑ ءَ آیانی دیم ءَ ھچ کس دَر مئیت۔ چوناھا گچینکاری گلانی لازمی بھرے ءُ آشوب ءِ یک جوانیں دْروشمے ءُ مُچّی ءِ ءُ ھمدستی ءِ ٹوھیں درورے۔۔
سی ءُ یک بھاران پہ بلوچ راج ءَ سْیاھیں روچے زانگ بیت،پرچا کہ شھید ڈاکٹرمنان ءِ وڑیں مزن بالادیں رھشونے چہ بلوچ راج ءَ دائمی پچگرگ بیت ءُ ھمے روچ ءَ شھید ڈاکٹرمنان جان ،شھیدساجد جان، شھید اشرپ جان ، شھید بابو نوروز جان ءُ شھید ھنیپ جان شھید کنگ بنت، شھید ڈاکٹرمنان جان گوں ھمراھاں ءُ سی ءُ یک بھاران دوھزار شانزدہ ماں مستونگ ءِ دمگ کلی دتو ءَ شھید کنگ بنت۔ سی ءُ یک بھاران ءِ شھیدان ھور سرڈگار ءِ آجوئی ءِ واستا پہ دراھیں شھیداناں سُھر چکیں دْورت گْوش آں۔۔۔
