کِسّھے لیلوانی باھند کنت
تْراولیں اھد ءِ جگر کْواپگ بیت
مشکے ءِ سنگریں بدن ساچ اِیت
مُسلؔم ءِ کِسّھاں جپاھانی
ھون مینتگ ڈگار مِسکانی
دَورے سبزینتگ گُلیں جنگانی
میھی ءِ سوزیں جبین لیکّارتگ
آس اِتگ دُژمِن ءِ پلاریں اُوست
شھمگاں سادُؔو ( ساداللہ ) ءِ گریوکیناں ،
وارتگاں تیر شِل سریں منسؔور
درد گوں بچکندے ءَ ملم کُرتگ
گْرند اِتگ چو بھارگاھی گْرند ءَ
شیری گُلّڑ یلیں سِکؔندر جان
ڈیوایے رُوک کُتگ وپاھانی
چُکّ اِتگ ھاک ءُ مُشتگ اَنت جان ءَ
چو شھیدیں شیھک سِلیماؔن ءَ
داتگ بیھار ءُ جتگ گْوانک دُژمِن
ما مُرید ھانُلیں ھاک ءِ شیدا
وارتگ سوگِند گوں مکھیں مات ءَ
ما مِرّ اِیں ڈیھ ءِ پاسپانی ءَ
ماھِکانی ءِ سانکلاں بوج اِیں
نوک کن اِیں زاکؔر ءِ گُلیں یات ءَ
جَوراں تیلانک دے اِیں کُورچات ءَ
نام ءَ زِندگ کن اِیں سپرھاؔن ( سفر خان ) ءِ ،
مادر ءِ درد ءُ آہ ءُ پِریاتاں
زگریں چیھال ءُ دِل ءِ ھیسکاراں
پوشیں آجوئی ءِ پوشاک ءَ
نیلیں پہ اِیمنی زُوراک ءَ
داں نہ بیت آجو میزریں بُوستان
شپ تھاری نہ بیت گُلیں مھکان
کاڑ مھنازیں سر ءُ سرگْواپی ،
داں گُلیں شاریاں نہ گْوپتگ پنگ
مان اِیت داں گُڈّی بلوچ ءَ ، اے جنگ
مان اِیت داں گُڈّی بلوچ ءَ ، اے جنگ
