بلوچستان کے مرکزی شہر کوئٹہ کے علاقے سلطان دولنگی کے مقام پر مسلح افراد نے دوران ناکہ بندی بسم اللہ ساسولی نامی ایک بااثر شخص کو حراست میں لیکر گاڑی سمیت لے گئے۔
ذرائع کے مطابق سردارزادہ بسم اللہ ساسولی کو گزشتہ روز جمعرات کی صبح کوئٹہ سے پنجپائی کی جانب سفر کے دوران سلطان دولنگی کے مقام پر مسلح افراد نے مبینہ طور پر ڈبل کیبن گاڑی سمیت اغوا کر لیا۔
ذرائع کا کہنا ہے کہ بسم اللہ ساسولی کوئٹہ سے پنجپائی کے علاقے سرلٹھ جا رہے تھے کہ سلطان دولنگی کے مقام پر مسلح افراد نے ان کی گاڑی کو روک کر انہیں اپنے ساتھ لے گئے۔ واقعے کے بعد سے اہلخانہ کا ان سے تاحال رابطہ نہیں ہوسکا۔
واقعہ گزشتہ روز جمعرات کی صبح پیش آیا، جس کے بعد اہلخانہ میں شدید تشویش پائی جا رہی ہے۔ تاہم مغوی کی موجودہ صورتحال اور اغوا کے محرکات سے متعلق مزید معلومات سامنے نہیں آسکیں۔
خاندانی سطح پر بسم اللہ ساسولی سے رابطے اور ان کی بحفاظت بازیابی کے لیے کوششیں جاری ہیں، جبکہ واقعے کی مزید تفصیلات کی آزادانہ تصدیق ہونا باقی ہے۔
واقعہ کی ذمہ داری تاحال کسی تنظیم نے قبول نہیں کی ہے۔
