پاکستانی فوج نے دعویٰ کیا ہے کہ اس نے 24 مئی کو کوئٹہ میں ہونے والے ٹرین حملے کے بعد بلوچستان کے مختلف اضلاع میں متعدد کارروائیوں کے دوران 17 عسکریت پسندوں کو ہلاک کیا ہے۔
منگل کو پاکستانی فوج کے شعبہ تعلقات عامہ (آئی ایس پی آر) کا ایک بیان میں کہنا تھا کہ 24 مئی کو ٹرین پر ہونے والے حملے کے بعد فوج نے مستونگ، نوشکی، زہری، خضدار اور کیچ کے اضلاع میں انٹیلی جنس کی بنیاد پر متعدد کارروائیوں میں 17 عسکریت پسندوں کو ہلاک کیا ہے۔
خیال رہے 24 مئی کو کوئٹہ میں چمن پھاٹک سے گزرنے والی فوجی اہلکاروں کو لے جانے والی شٹل ٹرین پر فدائی حملے میں متعدد افراد اور زخمی ہوئے تھے۔ حملے کی ذمہ داری بلوچ لبریشن آرمی (بی ایل اے) نے قبول کی تھی۔
آئی ایس پی آر کا کہنا ہے کہ ہلاک ہونے والے عسکریت پسندوں کے پاس سے اسلحہ، بارود اور تیار کی گئی بارودی سرنگیں بھی برآمد ہوئی ہیں۔
ماضی میں آئی ایس پی آر کے اس طرح کے دعوئوں کے بعد مارے جانے والے افراد کی شناخت لاپتہ افراد کے طور پر ہوتی رہی ہے جنہیں دوران حراست یا جعلی مقابلوں کے نام پر ماورائے عدالت قتل کیا جاتا رہا ہے۔
