شہید حیات بلوچ ءِ نام ءَ …. میجر مجید

0
605

میجر مجید

کُشتگ تو مئے راج ءِ حیات
نوک اِنت فدا ءِ گنجیں یات
تئی بیرک ءَ آسے کپات
زُلم ءِ کلات تئی بُنگرات
پِنڈی گوں پِنڈوکاں سُچات
نام ءِ گِروک تئی ہچ مبات

بچے پُلئت چہ مادر ءَ
مات ءِ گُشان دستاں پتات
چمانی دیما مادر ءِ،
چم بستگ انت گِرّاں کتگ

پریات کتگ باز مادر ءَ
دست ئِے پہ ربّ ءَ دْراج کتگ
ہچی نہ کُت رحم نر ہَر ءَ
تیر گْوار کُت دہر ءِ رستر ءَ
یات کربلا ءِ نوک کتگ
زُلمء یزید زندگ کتگ
پِت بزگیں رنج ءُ مُلور
حیران ءُ بژنیگیں کھول
پُرسیگ بلوچ ءِ گُلزمین
ارسیگ کیچ ءِ مچکدگ
گْران اِنت چُشیں بچ ءِ سِدگ
بے موسم ءُ وہد ءَ روگ

پُرسیگ مئے مات ءُ گہار
پُرسیگ مئے ڈن ءُ ڈگار
پُرسیگ مئے کیچ ءِ چنال
پرسیگ گلیں برّ ءِ کہیر
ہوناں شہید ءِ سبز بیت
پُلیں مئے ڈیھ ءُ ڈگار
گیمرتگ ءُ مَژیّں کشار
ہر جاہ شُتگ زُلم ءِ توار
تاں حد ء سندھ ءُ قندھار
بولان ءُ دُزّاپ، چابہار

انگت تو وش واب ئے بلوچ
پادا کہ بام ءَ آستگ
درکپ چہ نرمیں گندلاں
جم کن مُکیمی ہمبلاں
مُہکم کن راجی سنگراں
گْرند اِت چو بشّی جمبراں
پْروش ات گُلامی سانکلاں
ہونواریں ڈیھ ءِ رستراں
دُز ءُ لگوریں رہبراں
کیچ ءِ چراگ گیمرتگ انت
شنگ اِنت تہاری ہر گْورا
ہونین اَنت الماسیں کلم
تاک تاک اُمیتانی کتاب
ہست ءُ نمیرانیں حیات
تو بزگیں راج ءِ حیات

LEAVE A REPLY

Please enter your comment!
Please enter your name here