ضلع جھل مگسی میں مسلح افراد کی جانب سے متعدد مقامات پر حملوں کے بعد صورتحال انتہائی کشیدہ ہو گئی ہے اور جھڑپیں جاری ہیں۔
ذرائع کے مطابق گنداواہ شہر، لشّار آباد اور کوٹڑہ پولیس اسٹیشن سمیت مختلف مقامات کو نشانہ بنایا گیا ہے۔
گنداواہ میں مسلح افراد نے پولیس چوکی پر حملہ کرکے اسے نذرِ آتش کردیا۔ حملہ آور چوکی میں موجود اسلحہ اپنے قبضے میں لے گئے اور ایک پولیس اہلکار کو اغوا کرکے ساتھ لے جانے کی بھی اطلاعات ہیں۔
واقعے کے بعد علاقے میں شدید خوف و ہراس پھیل گیا۔
لشّار آباد میں بھی مسلح افراد نے پولیس چیک پوسٹ پر قبضہ کیا اور بعد ازاں عمارت کو آگ لگا دی۔
دوسری جانب کوٹڑہ پولیس اسٹیشن پر بڑی تعداد میں مسلح افراد نے حملہ کیا، جہاں بھاری فائرنگ کا تبادلہ جاری ہے۔
ذرائع کے مطابق فرنٹیئر کور (FC) کے اہلکار بھی موقع پر موجود ہیں اور جوابی کارروائی میں مصروف ہیں۔
حملوں کے بعد سیکیورٹی اداروں کی اضافی نفری مختلف مقامات پر تعینات کر دی گئی ہے، جبکہ حکام کی جانب سے تاحال کوئی باضابطہ بیان سامنے نہیں آیا۔
