آبنائے ہرمز میں موجودہ صورتحال کے باعث کویت کے لیے سامان لے جانے والے ایک بحری جہاز کو گوادر پورٹ کی جانب ڈائیورٹ کر دیا گیا ہے۔
گوادر پورٹ اتھارٹی کی جانب سے جاری ایک اعلامیے کے مطابق یہ مئی 2026 میں گوادر پورٹ پر لنگر انداز ہونے والا پہلا بحری جہاز ہے۔
ایم وی شو لانگ نامی اس جہاز میں 16 ہزار 77 میٹرک ٹن ٹرانس شپمنٹ کارگو موجود ہے، جس میں 13 ہزار سے زائد پیکجز پر مشتمل چینی ساختہ صنعتی آلات اور پائپس شامل ہیں۔
اعلامیے میں کہا گیا ہے کہ یہ سامان کویت کے لیے روانہ کیا گیا تھا، تاہم آبنائے ہرمز میں جاری صورتحال کے پیشِ نظر جہاز کو گوادر منتقل کیا گیا۔
چیئرمین گوادر پورٹ اتھارٹی نورالحق بلوچ کے مطابق اپریل 2026 کے دوران گوادر پورٹ پر چار ٹرانس شپمنٹ جہازوں کی آمد ریکارڈ کی گئی، جو اُن کے بقول اس بات کا ثبوت ہے کہ علاقائی سطح پر متبادل تجارتی راستوں کی تلاش میں گوادر پورٹ کی اہمیت میں اضافہ ہو رہا ہے۔
چیئرمین گوادر پورٹ اتھارٹی کا کہنا ہے کہ ڈائیورٹ ہونے والے جہازوں کے لیے برتھنگ، کارگو ہینڈلنگ اور دستاویزی کارروائیاں مؤثر انداز میں مکمل کی جا رہی ہیں، جس سے پورٹ کی آپریشنل تیاری اور عالمی تجارت کے لیے ایک قابلِ اعتماد مرکز کے طور پر اس کی حیثیت مزید مضبوط ہو رہی ہے۔
