بلوچستان کے ضلع کیچ میں اپسی کہن اور شیپچر کے علاقوں میں نامعلوم مسلح افراد نے پاکستانی فورسز کی دو چیک پوسٹوں پر بیک وقت حملہ کیا، جس کے نتیجے میں علاقے میں شدید جھڑپیں پھوٹ پڑیں۔
مقامی باشندوں کے مطابق رات گئے تک دھماکوں اور بھاری فائرنگ کی آوازیں سنائی دیتی رہیں، جس سے علاقے میں خوف و ہراس پھیل گیا۔
ابتدائی اطلاعات کے مطابق ایک طویل اور شدید لڑائی کے بعد حملہ آوروں نے دونوں چوکیوں پر قبضہ کر لیا۔
غیر مصدقہ ذرائع کا کہنا ہے کہ چوکیوں پر تعینات تمام اہلکار ہلاک ہو گئے، جبکہ حملہ آور ہتھیار اور دیگر فوجی ساز و سامان لے کر نامعلوم مقام کی جانب روانہ ہو گئے۔
عینی شاہدین کا کہنا ہے کہ حملہ آوروں نے دونوں چوکیوں کو آگ بھی لگا دی۔ تاہم ابھی تک کسی تنظیم نے اس کارروائی کی ذمہ داری قبول نہیں کی ہے، اور سرکاری حکام کی جانب سے بھی واقعے کی باضابطہ تصدیق یا تردید سامنے نہیں آئی۔
علاقے میں کشیدگی برقرار ہے اور مزید تفصیلات کا انتظار کیا جا رہا ہے۔
