بلوچستان کے ساحلی شہر اورماڑہ میں بلوچی زبان کے عظیم شاعر مرحوم مبارک قاضی کے نام پر منعقدہ تقریب کے حوالے سے انتظامیہ نے پاکستان کی عسکری حکام کی ایما پر اپنے ہی جاری کردہ نوٹیفکیشن کو منسوخ کرتے ہوئے پروگرام کی اجازت دینے سے انکار کر دیا ہے۔
ذرائع کے مطابق مرحوم شاعر مبارک قاضی کے یومِ پیدائش کے موقع پر کل بروز 24 دسمبر 2025 کو منعقد ہونے والے پروگرام کے لیے جاری کردہ این او سی کو انتظامیہ نے اچانک منسوخ کر دیا اور اس سلسلے میں اورماڑہ کی مقامی انتظامیہ کو باضابطہ طور پر آگاہ کر دیا گیا ہے کہ وہ کسی بھی صورت پروگرام منعقد کرنے کی اجازت نہ دیں۔
ذرائع کا کہنا ہے کہ مقامی انتظامیہ نے مؤقف اختیار کیا ہے کہ انہیں بالا حکام کی جانب سے سخت احکامات موصول ہوئے ہیں، جن کے تحت مبارک قاضی کے نام پر کسی بھی قسم کی تقریب یا پروگرام کے انعقاد کی اجازت نہیں دی جا سکتی۔
انتظامیہ کے اس اقدام پر ادبی حلقوں اور مقامی عوام میں تشویش پائی جا رہی ہے، جبکہ بلوچی ادب سے وابستہ افراد نے مرحوم شاعر کی ادبی خدمات کو خراجِ تحسین پیش کرنے کے مواقع محدود ہونے پر افسوس کا اظہار کیا ہے۔
