اے ساھت ءَ کہ من اے چاریں لبزاں نبشتہ کنگا یاں شپ نیم ءَ گوستگ، روچ ءُ رمس بدل بوتگ انت ۔
گوستگیں روچا ادا عید بوتگ او آؤکیں روچا ملکا عید بیت ، بلئے عید بس نام ءِ عید انت کہ کاینت ءُ رؤنت، پہ بلوچ ءَ وشی ءُ شاتکامی اش ماں نیست ۔
مئے عید ءِ سھب گوں چار ٹپ ءُ ٹوریں لاشانی دیما کپگا بنا بوت ، چار بلوچ بیگواھیں پسگ پاکستانی لشکر ءَ چہ زندان ءَ کشیت برت و ہرنائی ءَ دروگیں میڑے ءَ جت ءُ دور دات انت او پدا ٹاپار جت کہ چار بلوچ جنگول گوں ریاستی امن فورس (ڈیتھ اسکواڈ) ءَ میڑ ءَ شہید بوتگ ۔
عید ءِ روچ انت گونڈو نوکیں گُد ءُ جَر پوش انت ،وتارا شوک کن انت ءُ سمبھین انت، مردم قربانی ئے پس ءُ گوک کُش انت ، عید مبارکی ءُ حق پھلی کن انت یا مسیج راہ دیوکا بیت ، بلے بلوچستان یک شلہ ریاستے زوراکیانی آماچ انت ، اسلام ءِ دعویٰ داریں ملک کہ قرآنی آیات آں چہ وتی جنگی آپریشن آں نام دنت بلے نا اسلامی قدرے ھست ءِ نا انسانی اگبال سرپد بیت ۔
یک بلوچ جنین زھگے ماہ جبین بیسیمگے جاھ منند ءِ کہ ھپتگے پیسر چہ شال ءَ زورانسری اَوار جنگ ءُ برگ بوتگ انگتہ بیگواھ انت ، آھی گناہ ءُ میار چی انت کہ تو برتگ ؟ اگاں گناہ گار انت تو بیارے وتی کورٹ ءُ کچہری آں پیشی بکن ، ہما الزامے ءَ تو آہی سرا جنے بیا ثابت بکن پدا وتی قانون ردا سزا ءُ جزائی بدے ، بلئے ناں چش نہ کنت بلکہ ہمے وتی غیر قانونی او آئینی کرداں کہ بلوچ آنی سرا کنگا انت امیشاں چہ وتی پارلیمان او اسمبلی آں قانونی حیثیت دیگا انت ، بزاں کہ پاکستانی لشکر ءَ کدی کجام وھداں کجام بلوچے بگیر جرم برگ ءُ گار کنگ ءُ بند کنگے اجازت ءَ قانون دنت، ہمے قانون کہ زوتاں چہ بلوچستان ءِ اسمبلی ءَ پاس کنگ بوتگ ۔
بلوچ یکجہتی کمیٹی ءِ رھشون ڈاکٹر ماہ رنگ بلوچ گوں ایدگہ سنگتاں سے ماہ انت کہ غیر قانونی بندیگ کنگ بوتگ انت ، اے دومی عید انت کہ آ زندانی انت ۔
جرم ءُ گناہ اش چی انت ؟ اے گپا ہم بکشو صاحب ءِ واکدار کورٹ آں ثابت کت نہ کن انت، بس دفعہ امیش انت کہ اشانی ڈنا بوگ پہ لس مردماں یک بیھارے پمشیا ما اشاں بندیگ کنیں ۔
ڈاکٹر ماہ رنگ بلوچ ہما رھشون انت کہ پہ آہی گوانکے پدا لکھانی مہلوک ڈنا در ریچ اِت او جمع بیت ، ہزارانی مہلوکے راجی مُچیّ بیت ، چہ ڈاکٹر ماہ رنگ بلوچ یا آہی گلّے نیمگا کسے ءَ نکس نہ وارتگ نا کہ یک شیشگے پروشتگ بلے ہمے در کپتگیں مہلوک کہ تئی ریاستے زوراکیانی خلاف ءَ پر امن در کپتگ انت اشانی سرا ریاست ءَ وتی جبر ہم پیش داشتگ تیر گواری کتگ ، مردم شہید ءُ ٹپی کتگ انت ، گڑا جست اش انت کہ Maintenance of Public Order کئی سرا لاگو بہ بیت ؟ ڈاکٹر ماہ رنگ او آہی بندیگیں سنگتانی یا سرکارے سپاہی آنی ؟
بیگواھیں بلوچانی کھول ہمک سال وتی عید ءَ پریس کلب ءُ دگانی سرا گوازین انت ءُ دنیا ءَ پیش دار انت کہ پاکستان چونیں ظالم ءُ جابر یں ملکے، پہ دپ وتارا مسلمان یں ملکے گشیت بلے کرد ءَ چہ اسرائیل ءَ ہم گنتر انت ، إسرائيل اگاں فلسطينی جنگولے ہم جنگ ءَ جنت بلے آہی لاش ءَ کھول ءَ دنت پہ کل ءُ کسارت کنگ ءَ، اے ریاست بلوچ جنگولے لاش ءَ ہم پہ کل ءٗ کسارت کنگا نہ دنت ، حالانکہ دنیا ءَ اے قانون گیشینتگ کہ کجام ہم جنگولے جنگا جنگ بوت آہی لاش دیگ بہ بیت ۔
ریاستے زوراکیانی سرا امنچو نبشتہ بہ کنے یا گپ بہ کنے نہ کُٹ انت اے نوں بلوچ ءِ زندے بھر انت، پمیشا پہ بلوچ ءَ اے وشیں روچ ہم پہ نہ وشی گوزگ ءُ روگا انت ، بلوچستان ءَ چشیں لوگے پشت نہ کپتگ کہ ریاستی جبرے دیمپان نبوتگ ۔
بلوچ ءُ بلوچستان ءِ عید امیش انت کہ مے شمے دیما انت اگاں چمے بہ بیت پہ گندگا گوشے بہ بیت ۔
***
