سندھ کے ضلع نوشہرو فیروز کے علاقے مورو میں وزیر داخلہ سندھ ضیاالحسن لنجار کے گھر کو نذر آتش کرنے کے مقدمات گرینڈ ڈیموکریٹک الائنس (جی ڈی اے) کے رہنماؤں کے خلاف درج کرلیے گئے۔
پولیس ذرائع کے مطابق وزیر داخلہ سندھ ضیا الحسن لنجار کے گھر کو جلان ےکے دو الگ الگ مقدمات درج ہوئے ہیں۔
سرکار کی مدعیت میں درج مقدمے میں جی ڈی اے رہنما غلام مرتضیٰ جتوئی اور مسرور جتوئی سمیت 14 ملزمان اور 30 نامعلوم افراد کو نامزد کیا گیا ہے۔
مقدمات کی فرسٹ انفارمیشن رپورٹ (ایف آئی آر) کے متن میں کہا گیا ہے کہ مرتضیٰ جتوئی اور مسرور جتوئی و دیگر رہنماؤں کے کہنے پر لنجار ہاؤس کو جلایا گیا۔ ایف آئی آر میں مزید کہا گیا ہے کہ لنجار ہاؤس پر حملے اور نذر آتش کیے جانے کے واقعے میں کروڑوں روپے کا نقصان پہنچا۔
