بلوچستان کے علاقے نوشکی میں آتشزدگی کے بعدآئل ٹینکر دھماکے سے پھٹ گیا جس سے 40افراد جھلس گئے ،ایک کی ہلاکت کی اطلاعات ہیں۔
نوشکی میں تیل بردار ٹینکر میں لگی آگ کو بجھانے کے دوران ٹرک کی ٹینکی پھٹنے سے موقع پر موجود درجنوں افراد جھلس گئے۔
اس دوران موقع پر موجود فائر بریگیڈ بھی آگ کے لپیٹ میں آگیا۔جس سے 40سے زائد زخمی افراد جھلس کرزخمی ہوگئے۔
زخمیوں کوسول ہسپتال نوشکی منتقل کردیاگیا اور ایمرجنسی نافذ کردی گئی۔
کوئٹہ سے ایمبولینسوں کو طلب کرگیا تاکہ شدید زخمیوں کو کوئٹہ منتقل کیا جاسکے۔
زخمیوں میں ایک کی ہلاکت کی اطلاعات سامنے آئی ہیں ۔
ڈپٹی کمشنر نوشکی امجد سومرو کے مطابق دھماکے میں 40 سے زائد افراد زخمی ہوئے، زیادہ جھلس کر زخمی ہونے والوں کو ہیلی کاپٹر کے ذریعے کوئٹہ منتقل کیا جائے گا۔
انہوں نے بتایا کہ جھلس کر زخمی ہونے والے دیگر افراد کو کوئٹہ ریفر کردیا گیا، مزید بتایا کہ ٹرک اڈے میں کھڑے آئل ٹینکر میں لگی آگ پر قابو پانے کی کوششوں کے دوران دوسرا واقعہ ہوا۔
ڈپٹی کمشنر کے مطابق فائر بریگیڈ کا عملہ قریب ہونے کے بعد جھلس کر شدید زخمی ہوا، شہریوں کو جائے وقوع سے ہٹانے کے لیے موجود 4 پولیس اہلکار بھی جھلس کر زخمی ہوئے۔
ادھر، ترجمان حکومت بلوچستان شاہد رند نے بتایا کہ نوشکی میں افسوس ناک حادثہ ہوا، آئل ٹینکر میں اچانک آگ بھڑک اٹھی، آگ کی شدت سے موقع پر موجود فائر بریگیڈ کی گاڑی بھی متاثر ہوئی۔
ان کا کہنا تھا کہ حادثے میں 30 سے زائد افراد کے جھلسنے کی اطلاعات ہیں، زخمیوں کو ابتدائی طبی امداد کے بعد سول ہسپتال اور بی ایم سی منتقل کیا جار رہا ہے۔
ترجمان حکومت بلوچستان شاہد رند نے کہا کہ ہسپتالوں میں ایمرجنسی نافذ کرکے متاثرہ افراد کو طبی امداد فراہم کی جار رہی ہے، واقعہ افسوسناک ہے، اس کی تحقیقات کی جا رہی ہیں۔
