کشمیربھارت کا اہم حصہ ہے،پاکستان کی شہ رگ کیسے ہو سکتی ہے؟رندھیر جیسوال

پاکستانی آرمی چیف کی جانب سے ’اوورسیز پاکستانیز کنونشن 2025‘ میں اپنے خطاب کے دوران یہ کہا گیا کہ کشمیر پاکستان کی شہ رگ ہے جس پر انڈیا کے دفترِ خارجہ کے ترجمان رندھیر جیسوال کا کہنا تھا کہ ’شہ رگ میں کوئی غیر ملکی چیز کیسے ہو سکتی ہے؟‘

ہفتہ وار پریس بریفنگ کے دوران انڈیا کے دفترِ خارجہ کے ترجمان رندھیر جیسوال نے پاکستانی آرمی چیف کے خطاب سے متعلق سوال کے جواب میں کہا کہ ’کشمیر انڈیا کا ایک مرکز کے زیر انتظام علاقہ ہے اور انڈیا کا ایک اہم حصہ بھی۔ پاکستان کے ساتھ اس کا واحد تعلق اس ملک کی طرف سے غیر قانونی طور پر مقبوضہ علاقوں کو خالی کرنا ہے۔‘

واضح رہے کہ کشمیر کا ذکر کرتے ہوئے پاکستانی فوج کے سربراہ جنرل عاصم منیر نے کہا تھا کہ ’کشمیر پاکستان کی شہ رگ ہے اور کشمیر پر پاکستانی فوج اور حکومت کا موقف واضح ہے۔ ہم اسے نہیں بھولیں گے۔ ہم اپنے کشمیری بھائیوں کو نہیں چھوڑیں گے جو انڈیا کے قبضے کے خلاف لڑ رہے ہیں۔‘