بلوچ یکجہتی کمیٹی نے بلوچستان نیشنل پارٹی کے وڈھ سے کوئٹہ لانگ مارچ کو قابل احترام قدم قرار دیتے ہوئے کہا کہ تمام سیاسی اور سماجی قوتوں کو اجتماعی مزاحمت کا راستہ اختیار کرنا ہوگا۔
ترجمان بی وائی سی نے اپنے ایک بیان میں کہا ہے کہ ہم عوامی جدوجہد اور عوامی مزاحمت کے ہر عمل کی مکمل حمایت میں کھڑے ہیں۔ اس نازک وقت میں ہم سمجھتے ہیں کہ بلوچ سماج کے اندر تمام سیاسی اور سماجی قوتوں کو اجتماعی مزاحمت کا راستہ اختیار کرنا ہوگا۔ ایک متحد تحریک کے ذریعے ہی ہم اس نوآبادیاتی نظام کو ختم کر سکتے ہیں۔
بیان میں کہا گیا کہ جبر اور استبداد پر بنے ڈھانچے کے اندر انصاف کی تلاش ہی اس کی بنیادوں کو مضبوط کرتی ہے۔ جبر کے نظام کو مکمل طور پر جڑ سے اکھاڑ پھینک کر ہی حقیقی انصاف حاصل کیا جا سکتا ہے۔ مسلسل عوامی مزاحمت سے ہی ظلم کی شکست ممکن ہے۔
ترجمان نے کہا کہ بلوچستان نیشنل پارٹی کا لانگ مارچ کا اعلان قابل تحسین اقدام ہے اور ہم اس فیصلے کا احترام کرتے ہیں۔
